ក្បួន ៧យ៉ាង ដែលសហគ្រិនត្រូវដឹង មុនប្រគល់ភារកិច្ចទៅឲ្យក្រុមការងារធ្វើការជំនួស
នៅពេលអ្នកប្រឡូកក្នុងអាជីវកម្ម អ្នកគឺជាអ្នកទទួលខុសត្រូវខ្ពស់ និងមានការងារធ្វើរាប់រាយជំពូក។ អ្នកតែម្នាក់ឯងអាចដើរតួយ៉ាងច្រើនដូចជា ជាអ្នកលក់ ជាអ្នកគ្រប់គ្រងដឹកនាំ ជាបុគ្គលិក ជាអ្នកទំនាក់ទំនង ឬជាគណនេយ្យករជាដើម។ មុនដំបូងអ្នកពិតជារីករាយក្នុងតំណែងទាំងនេះ ប៉ុន្តែយូរៗទៅអ្នកមានអារម្មណ៍កាន់តែធុញថប់ ហត់នឿយច្រើន ធ្វើការងារគ្មានពេលសម្រាកសូម្បីតែថ្ងៃចុងសប្តាហ៍ក៏គ្មានពេលផង។
នៅពេលឈានដល់ដំណាក់កាលនេះ វាជាពេលវេលាដ៏សមគួរដែលអ្នកត្រូវជ្រើសរើសអ្នកណាម្នាក់ ឬត្រូវការក្រុមការងារមួយឲ្យមកទទួលខុសត្រូវចំពោះអ្នក។ អ្នកត្រូវដឹងថា ភាពជោគជ័យក្នុងអាជីវកម្មដោយក្ដោបក្ដាប់ការងារក្នុងក្រុមហ៊ុនមួយតែម្នាក់ឯង មិនមែនជាជម្រើសល្អនោះទេ ហើយជារឿងមួយមិនអាចទៅរួច។ ដូច្នេះហើយអ្នកត្រូវចេះចាត់ចែងការងារប្រគល់ទៅមនុស្សក្រោមបង្គាប់ផ្សេងទៀត និងត្រូវអនុវត្តតាមក្បួនចំនួន ៧ នេះ៖
១. បង្ខំខ្លួនឯងឲ្យចេះចែករំលែកការងារ
សហគ្រិនភាគច្រើនតែងមានអាកប្បកិរិយាជាធម្មជាតិមួយនៅក្នុងការងាររបស់ខ្លួននោះគឺ ពួកគេចង់ធ្វើអ្វីៗគ្រប់យ៉ាង តាមអ្វីដែលខ្លួនអាចធ្វើបាន និងឲ្យបានច្រើនបំផុត។ នេះគឺជាលក្ខណៈសម្បត្តិគួរឲ្យកោតសរសើរមួយ និងជាផ្នែកមួយដ៏សំខាន់សម្រាប់ដឹកនាំអាជីវកម្ម។ ទោះជាយ៉ាងណាក៏ដោយនៅទីបំផុតអ្នកត្រូវបង្ខំខ្លួនឯងឲ្យធ្វើការងារមួយចំនួនទោះបីជាអ្នកមិនចង់ធ្វើវាក៏ដោយដែលនោះ គឺត្រូវចេះប្រគល់ភារកិច្ចការងារ (Delegation) ទៅឲ្យបុគ្គលិកក្រោមបង្គាប់ធ្វើជំនួសអ្នក។
២. ត្រូវមានភាពសកម្ម
ក្បួនទីពីរគឺអ្នកត្រូវមានភាពសកម្មជានិច្ចទៅលើកិច្ចការដែលអ្នកបានប្រគល់ទៅឲ្យបុគ្គលិករបស់អ្នក។ ប្រសិនបើអ្នករង់ចាំរហូតដល់អ្នកក្រឡាប់ចាក់ និងភ្លើងជិតរលត់ហើយនោះ ការចាត់ចែងភារកិច្ចការងារមួយចំនួនអាចបញ្ចប់ទៅដោយភាពតានតឹង ហើយយឺតពេលទៀតផង។ ផ្ទុយទៅវិញអ្នកត្រូវរៀបចំចាត់ចែងការងារនៅពេលដែលការងាររបស់អ្នកកំពុងរុលទៅមុខខ្លាំងឲ្យបានឆាប់បំផុត។ នេះអាចរួមបញ្ចូលដូចជា ការជួលមនុស្សថ្មី រៀបចំកត់ត្រាទុកភារកិច្ចរបស់អ្នកចូលទៅក្នុងបញ្ជី ឬជួយនរណាម្នាក់ឲ្យមកអភិវឌ្ឍជំនាញថ្មីដើម្បីរៀនធ្វើការងារណាមួយជំនួសអ្នក។
៣. ស្គាល់ពីចំណុចខ្លាំង និងចំណុចខ្សោយក្រុមការងារ
នៅមុនពេលអ្នកដាក់ការងារឲ្យក្រុមការងាររបស់អ្នកធ្វើ អ្នកត្រូវដឹងថា តើក្រុមការងាររបស់អ្នកមានចំណុចខ្លាំង និងចំណុចខ្សោយអ្វីខ្លះ? ជាទូទៅ សមាជិកម្នាក់ៗនៅក្នុងក្រុមតែងមានគំនិត មធ្យោបាយ សកម្មភាព ឬការអនុវត្តមិនដូចគ្នាទេ។ ហេតុដូច្នេះហើយប្រសិនបើអ្នកចង់ឲ្យពួកគេទទួលខុសត្រូវការងារជំនួសអ្នក អ្នកត្រូវតែស្វែងរកឲ្យឃើញពីចំណុចខ្លាំង និងចំណុចខ្វះខាតរបស់ពួកគេ។ ឧទាហរណ៍ថា បុគ្គលិក A ត្រូវកែតម្រូវចំណុចអ្វី? បុគ្គលិក B ត្រូវរៀនចំណុចណាខ្លះ? បុគ្គលិក Cត្រូវទទួលការងារក្នុងកម្រិតណា? ជាដើម។
៤. វិនិយោគពេលវេលាដើម្បីបង្រៀនពួកគេ
នៅពេលអ្នកចង់ផ្ទេរភារកិច្ចការងារណាមួយ វាជារឿងងាយស្រួលសម្រាប់អ្នក ព្រោះអ្នកមានមធ្យោបាយ ឬយុទ្ធសាស្ត្រខ្លួនឯង។ ប៉ុន្តែនេះមិនមែនមានន័យថា អ្នកទទួលភារកិច្ចបន្ទាប់ដែលជាបុគ្គលិករបស់អ្នកអាចយល់ ធ្វើបាន ឬដឹងពីរបៀបធ្វើវាទាំងស្រុងតាមអ្វីដែលអ្នកចង់បាននោះទេ។ នេះទាមទារឲ្យអ្នកត្រូវចំណាយពេលវេលាច្រើនដើម្បីបង្ហាញផ្លូវ និងបង្ហាត់បង្រៀនបណ្តុះបណ្តាលពួកគេ ព្រោះមានតែមធ្យោបាយនេះតែប៉ុណ្ណោះដែលអាចផ្តល់លទ្ធផលល្អមកអ្នកវិញ។
៥. ដាក់ការរំពឹងទុករបស់អ្នកឲ្យបានច្បាស់លាស់
នៅពេលប្រគល់ភារកិច្ចការងារ អ្នកត្រូវមានភាពជាក់លាក់អំពីការរំពឹងទុករបស់អ្នកថា តើអ្នកចង់បានអ្វី? អ្នកត្រូវឲ្យក្រុមការងាររបស់អ្នកដឹងឲ្យច្បាស់ថា តើភារកិច្ចរបស់អ្នកត្រូវបញ្ចប់ដោយរបៀបណា? ត្រូវបញ្ចប់នៅពេលណា? ប្រសិនបើមានសមាជិកក្រុមការងារជាច្រើននឹងទទួលគម្រោងរបស់អ្នក អ្នកត្រូវបែងចែកការទទួលខុសត្រូវរបស់ពួកគេម្នាក់ៗឲ្យបានច្បាស់ ឬយ៉ាងហោចណាស់ចាត់តាំងអ្នកណាម្នាក់ដែលមានសមត្ថភាពលេចធ្លោជាងគេឲ្យទទួលខុសត្រូវ។ នៅពេលអ្នកបានបែងចែកការងារត្រឹមត្រូវ ពួកគេនឹងអាចជៀសវាងកំហុសឆ្គងនៅពេលទទួលភារកិច្ចការងារពីអ្នក។
៦. ផ្តល់ទំនុកចិត្ត ប៉ុន្តែត្រូវតាមដានការងាររបស់ពួកគេជាប្រចាំ
ដរាបណាអ្នកមិនមានភាពជឿជាក់លើក្រុមការងាររបស់អ្នកទេនោះ អ្នកក៏គ្មានឱកាសអាចជ្រើសរើសបានមនុស្សល្អមកធ្វើការងារឲ្យអ្នកនោះដែរ។ នៅពេលអ្នកបានប្រគល់ភារកិច្ចមួយ និងបានកំណត់ថ្ងៃបរិច្ឆេទច្បាស់លាស់ពីការងារដែលត្រូវបញ្ចប់ វាជាពេលវេលាដែលអ្នកត្រូវផ្តល់ទំនុកចិត្តដល់ពួកគេថា ពួកគេពិតជាអាចធ្វើបាន។ យ៉ាងណាក៏ដោយ អ្នកមិនអាចទុកពួកគេចោលនោះទេ។ អ្នកចាំបាច់ត្រូវបង្កើតប្រព័ន្ធ ទំនាក់ទំនងមួយ ជាប្រចាំដើម្បីតាមដានសកម្មភាពការងាររបស់ពួកគេថា តើពួកគេធ្វើដល់ណាហើយ? បានលទ្ធផលអ្វី ខ្លះហើយ? មានបញ្ហាអ្វីខ្លះ? នៅពេលអ្នកបានតាមដានសកម្មភាពទាំងនេះបានល្អិតល្អន់ អ្នកនឹងមានពេលច្រើនសម្រាប់កែតម្រូវ ឬបំពេញនូវចំណុចខ្វះខាតមុនពេលថ្ងៃបរិច្ឆេទចូលមកដល់។
៧. ផ្តល់អនុសាសន៍ ឬទទួលយកមតិកែលំអ
ចំណុចសំខាន់ចុងក្រោយមួយទៀត គឺអ្នកត្រូវទទួលយកនូវអនុសាសន៍ ឬមតិរិះគន់កែលំអនានាពីបុគ្គលិករបស់អ្នកនៅពេលការងារនោះត្រូវបានបញ្ចប់។ ជាទូទៅអ្នកពិតជាចង់បានលទ្ធផលដូចចិត្តនៅពេលប្រគល់ភារកិច្ចដល់ក្រុមការងារ ក៏ប៉ុន្តែការអនុវត្តការងារនោះ អាចនឹងជួបបញ្ហានានា ហើយមិនងាយស្រួលដូចអ្នកនិយាយ។ ម្ល៉ោះហើយអ្នកត្រូវបើកឱកាសឲ្យបុគ្គលិកម្នាក់ៗលើកសំណើ ផ្តល់មតិយោបល់ និងបង្ហាញពីគំនិតនានាដែលនឹងអាចជួយជំរុញឲ្យគម្រោងការងាររបស់អ្នកកាន់តែទទួលបានលទ្ធផលល្អនៅលើកក្រោយទៀត៕
ប្រភព៖ Entrepreneur
