វិធី៤យ៉ាងដើម្បីជំរុញកម្លាំងចិត្តរបស់ខ្លួនឯងឲ្យខិតខំធ្វើការ នៅពេលគ្មានអារម្មណ៍ចង់ធ្វើ
មានថ្ងៃខ្លះអ្នកស្រាប់តែមានកម្លាំងចិត្តខ្លាំងក្លា ដែលជំរុញអ្នកឲ្យធ្វើអ្វីៗបានយ៉ាងមានប្រសិទ្ធភាព និងអាចដោះស្រាយបញ្ហាអ្វីៗបាន។ តែមានថ្ងៃខ្លះវិញអ្នកក៏ស្រាប់តែមិនមានអារម្មណ៍ក្នុងខ្លួន មិនអាចផ្ចង់អារម្មណ៍បានមូលទៅលើការងារ ដែលជាហេតុនាំឲ្យលទ្ធផលការងាររបស់អ្នកក៏មិនបានល្អ។ តើមានវិធីអ្វីខ្លះដើម្បីជំរុញកម្លាំងចិត្តរបស់ខ្លួនឯងឲ្យខិតខំធ្វើការនៅក្នុងស្ថានភាពបែបនេះ ?
១) កុំមើលវាថាជាការងារលំបាក៖ ជាជាងសម្លឹងមើលការងាររបស់អ្នកថាជាការងារលំបាក អ្នកគួរតែចេះសម្លឹងមើលវាជាបញ្ហាដែលអាចអភិវឌ្ឍខ្លួនអ្នកឲ្យកាន់តែប្រសើរឡើង និងកាន់តែមានសមត្ថភាពនិងភាពច្នៃប្រឌិត។ ព្យាយាមសម្លឹងវាថាជាបញ្ហាដែលបំផុសឡើងមកដើម្បីធ្វើការពិសោធន៍ទៅលើការខិតខំប្រឹងប្រែងរបស់អ្នក និងសមត្ថភាពក្នុងការដោះស្រាយបញ្ហារបស់អ្នក។
២) បំបែកគោលដៅរបស់អ្នកជាដំណាក់កាលតូចៗ៖ របស់ដែលបានមកដោយលំបាក នៅពេលដែលទទួលបានមកហើយ នឹងធ្វើឲ្យអ្នកមានមោទនភាព និងចេះឲ្យតម្លៃទៅលើវា។ នៅពេលអ្នកមានគោលដៅធំមួយ ហើយបំបែកគោលដៅនេះជាដំណាក់កាលតូចៗ នោះនៅពេលអ្នកឆ្លងកាត់ដំណាក់កាលតូចៗនីមួយៗហើយ ភាពជោគជ័យទៅលើដំណាក់កាលតូចៗទាំងនេះនឹងបង្ហាញពីភាពរីកចម្រើនទៅមុខ ហើយជំរុញចិត្តអ្នកឲ្យខិតខំធ្វើការតទៅមុខទៀត។
៣) អានសៀវភៅ៖ បុគ្គលជោគជ័យជាច្រើនរូបនៅលើពិភពលោកសុទ្ធតែបានលើកឡើងពីភាពជោគជ័យរបស់ពួកគេដែលជាលទ្ធផលទទួលបានពីការអានសៀវភៅ។ ទម្លាប់ល្អនឹងផ្ដល់ផ្លែផ្កាឲ្យជីវិតរបស់អ្នកល្អដែរ តួយ៉ាងដូចជាការបណ្ដុះទម្លាប់អានសៀវភៅជាដើម ជាពិសេសគឺសៀវភៅល្អថែមទាំងអាចកែប្រែផ្លាស់ប្ដូរជីវិតអ្នកទៀតផង។ ការអានសៀវភៅក៏ជាឧបករណ៍ដ៏សំខាន់មួយ ដែលជួយដល់ផ្នែកកម្លាំងចិត្តរបស់អ្នកឲ្យមានភាពក្លៀវក្លាដែរ។
៤) ឈប់ខ្វាយខ្វល់ពីរឿងរ៉ាវដែលឥតបានការ៖ មនុស្សយើងគ្រប់គ្នាសុទ្ធតែជាអ្នកពូកែគិត រហូតទាល់តែមិនអាចចេះឈប់គិតសោះ។ រឿងនេះអ្នកនឹងពិសោធន៍ឃើញដោយខ្លួនឯងច្បាស់នៅពេលអ្នកអង្គុយសមាធិ។ រឿងរ៉ាវណាដែលគិតទៅនាំតែឲ្យចិត្តរបស់អ្នកសៅម៉ង មិនស្រណុកកាយចិត្ត អន្ទះអន្ទែង ខឹងក្ដៅក្រហាយជាដើម រឿងទាំងនោះមិនគួរអ្នកយកមកគិតនោះឡើយ គួរតែរៀនចេះគ្រប់គ្រងចិត្តរបស់ខ្លួននិងប្រលែងអ្វីៗទៅតាមធម្មជាតិរបស់វា៕
ដោយ៖ ស្រីពៅ សូមអាន៖ សកម្មភាពចំនួន៥ដែលអ្នកអាចអនុវត្ត ដើម្បីបង្កើនថាមពលរបស់អ្នក នៅពេលសម្រាកបាយថ្ងៃត្រង់
