៣ចំណុច សម្រាប់ជួយអ្នកពន្យល់បុគ្គលិកឲ្យទទួលបានផ្លែផ្កាដែលអ្នកចង់បាន
ការពន្យល់ឲ្យបុគ្គលិកឬសមាជិករួមការងារយល់ពីគោលបំណងដែលអ្នកចង់បាន គឺជាកិច្ចការដ៏សំខាន់មួយដែលអាចធ្វើឲ្យអ្នកត្រូវជួបប្រទះនឹងបញ្ហាច្រើនក្នុងការប្រជុំ។ ហេតុនេះ ៣ចំណុចខាងក្រោម អាចនឹងក្លែយ ជាគន្លឹះសម្រាប់ជួយអ្នកក្នុងការសម្រេចកិច្ចការនេះឲ្យទទួលបានផ្លែផ្កាបាន៖
១) កុំចេះតែស្មានថាពួកគេនឹងយល់អ្វីៗអស់ហើយ៖ ពេលវេលាសម្រាប់អ្នកអាចនឹងមានតិចតួចសម្រាប់ការប្រជុំជាមួយពួកគេ ប៉ុន្តែបើអ្នកដាក់ចិត្តថាធ្វើយ៉ាងណាដើម្បីឲ្យពួកគេយល់ពីអ្វីដែលអ្នកចង់បាន និងសហការគ្នាយ៉ាងណាដើម្បីសម្រេចទៅដល់គោលដៅនោះ នោះអ្នកនឹងដឹងថាត្រូវប្រើពេលវេលារបស់អ្នកយ៉ាងដូចម្ដេចជាមួយពួកគេ។ លក្ខណៈប្រាកដប្រជាច្បាស់លាស់នៅក្នុងការពន្យល់ត្រូវតែជាគោលដៅអាទិភាពមួយដែលអ្នកត្រូវសម្រេចឲ្យបាននៅក្នុងការប្រជុំទាំងឡាយជាមួយបុគ្គលិករបស់អ្នក។ អ្នកគួរតែព្យាយាមពន្យល់ឲ្យបានច្បាស់លាស់ សួរបញ្ជាក់ក្នុងករណីដែលពួកគេអាចមានចម្ងល់សង្ស័យ ដើម្បីចៀសវាងការយល់ច្រឡំដែលអាចអូសបន្លាយដំណើររបស់អ្នកបាន។
២) លើកឧទាហរណ៍បញ្ជាក់៖ ការលើកឧទាហរណ៍បញ្ជាក់បន្ថែមនឹងធ្វើឲ្យអ្វីដែលអ្នកកំពុងតែពន្យល់ កាន់តែមានភាពក្បោះក្បាយច្បាស់លាស់បន្ថែមមួយកម្រិតទៀត។ ម្យ៉ាងទៀត ឧទាហរណ៍ជាក់ស្ដែងក៏ធ្វើឲ្យមនុស្សងាយស្រួលយល់និងឆាប់ចាប់បានពីអត្ថន័យនៃគោលបំណងដែលអ្នកចង់បានដែរ។ ហេតុនេះ អ្នកគួរតែព្យាយាមបញ្ចូលនូវឧទាហរណ៍ជាក់ស្ដែងតាមតែអាចធ្វើទៅបានក្នុងការប្រជុំជាមួយបុគ្គលិក។
៣) ផ្ដល់នូវជម្រើសសម្រាប់ពួកគេ៖ ឧទាហរណ៍ថាអ្នកចង់ដាក់កំណត់កាលបរិច្ឆេទសម្រាប់ពួកគេក្នុងការបំពេញការងារណាមួយនោះឲ្យរួចរាល់នៅថ្ងៃទី១០ ប៉ុន្តែបើអ្នកឈ្វេងយល់ថាបុគ្គលិកមួយចំនួនអាចនឹងមិនបញ្ចប់ការងារនោះទៅតាមកាលកំណត់របស់អ្នកទេ ហើយកិច្ចការនោះក៏អាចពន្យារពេលទៅ៣ថ្ងៃក្រោយទៀត នោះអ្នកគួរតែផ្ដល់នូវជម្រើសនេះសម្រាប់ពួកគេក្នុងការសម្រេចកិច្ចការនោះទៅ។ ឬក៏ជាវិធីសាស្ត្រក្នុងការបំពេញកិច្ចការ បើសិនជាមានបុគ្គលិកណាមួយមានវិធីសាស្ត្រផ្សេងខុសពីអ្វីដែលអ្នកបានលើកឡើង ហើយវិធីសាស្ត្រនោះក៏ជាវិធីសាស្ត្រល្អមួយ នោះអ្នកក៏គួរតែផ្ដល់ឱកាសដល់ពួកគេឲ្យធ្វើបែបនោះទៅ៕
ដោយ៖ ស្រីពៅ
