នេះជាមូលហេតុធ្វើឱ្យឥណ្ឌាមានប្រជាជនដ៏ច្រើនលើសលប់ និងភាពក្រីក្ររបស់ពួកគេ!
ប្រទេសដែលមានអរិយធម៌ដ៏ចំណាស់មួយនៅក្នុងពិភពលោក និងជាប្រទេសដែលប្រជាជនមានផ្នត់គំនិតដែលចាក់ឫសគល់យ៉ាងជ្រៅនឹងការប្រតិបត្តិតាមទំនៀមទម្លាប់សាសនា គឺជាប្រទេសដែលមានចំនួនប្រជាជនសរុបក្នុងពេលបច្ចុប្បន្នរហូតដល់១.៣ពាន់លាននាក់ ជាតួលេខដែលខ្ពស់បំផុតបន្ទាប់ពីមហាអំណាចចិន ដែលត្រូវបានពិភពលោកស្គាល់ថាជា ប្រទេសឥណ្ឌា។
ស្ថានភាពរបស់ប្រទេសនេះខុសស្រឡះដូចមេឃនិងដីជាមួយស្ថានភាពប្រទេសចិន ដែលទោះជាចិនមានចំនួនប្រជាជនច្រើនជាងគេបំផុតក្នុងពិភពលោកក្ដី តែសេដ្ឋកិច្ចពួកគេមានភាពល្អប្រសើរយ៉ាងឆ្ងាយដាច់សង្វែងពីឥណ្ឌា។ ផ្ទុយទៅវិញ ចំនួនប្រជាជនដ៏ច្រើនលើសលប់របស់ឥណ្ឌាបានក្លាយជាមូលហេតុចម្បងមួយនៃភាពក្រីក្ររបស់ប្រទេសនេះទៅវិញ។ តើអ្វីខ្លះជាមូលហេតុបង្កឲ្យឥណ្ឌាមានចំនួនប្រជាជនដ៏ច្រើនលើសលប់បែបនេះ ?
តាមពិតបញ្ហានៃការកើនឡើងចំនួនប្រជាជនមិនឈប់ឈរបែបនេះ គឺជាកង្វល់ដ៏ធំមួយសម្រាប់រាជរដ្ឋាភិបាលរបស់ប្រទេសនេះជាយូរមកហើយ។ ហេតុនេះ ក្រោយពីប្រទេសក្រីក្រមួយនេះ ទទួលបានឯករាជ្យរបស់ខ្លួនក្នុងឆ្នាំ១៩៤៧ សមាគមផែនការគ្រួសាររបស់ឥណ្ឌាក៏បានបង្កើតឡើងនាពេលបន្ទាប់ក្នុងឆ្នាំ១៩៤៩ និងចាប់អនុវត្តជាផ្លូវការក្នុងឆ្នាំ១៩៥២។ គោលបំណងជាស្នូលរបស់គោលនយោបាយនេះ ផ្ដោតសំខាន់ទៅលើការគ្រប់គ្រងកំណើតដែលផ្ដោតជាពិសេសទៅលើប្រជាជនតាមជនបទ ការលើកទឹកចិត្តឲ្យប្រើកងដាក់ក្នុងស្បូន និងថ្នាំពន្យារកំណើត ការជំរុញឲ្យមានការកំណត់យកកូន ២នាក់ និងទុកនូវចន្លោះរយៈពេលវែងរវាងការផ្ដល់កំណើតដល់កូនទាំងពីរ ការផ្ដល់សេវាកម្មថែទាំសុខភាព និងថវិកា ព្រមទាំងការកំណត់អាយុរៀបការនៅអាយុ ១៨ឆ្នាំ ឡើងសម្រាប់ក្មេងស្រី និងក្មេងប្រុសចាប់ពីអាយុ ២១ឆ្នាំ ឡើងផងដែរ។
យ៉ាងណាមិញ ចាប់តាំងពីគោលនយោបាយនេះត្រូវបានអនុវត្តមក គេឃើញមានការផ្លាស់ប្ដូរតម្រង់រកលទ្ធផលវិជ្ជមានតិចតួចនៅឡើយ។ នោះក៏ដោយសារតែផ្នត់គំនិតរបស់ប្រជាជនឥណ្ឌានៅមានក្រាស់ក្រែលនៅឡើយចំពោះការយល់ឃើញដែលផ្ដល់ភាពសំខាន់ទៅលើកូនប្រុសថាពួកគេជាបុគ្គលតែម្នាក់ក្នុងគ្រួសារដែលមានកាតព្វកិច្ចរកលុយ និងមើលថែទាំឪពុកម្ដាយពេលចាស់ជរា ជាហេតុជំរុញឲ្យគ្រួសារទាំងនេះបន្តយកកូនរហូតដល់ពួកគេទទួលបានកូនប្រុស។ នៅពេលបង្កើតកូនមកហើយ វប្បធម៌ដ៏ចំណាស់របស់ប្រជាជននេះ កំណត់ថាការរៀបការគឺជាកាតព្វកិច្ចរបស់បុគ្គលគ្រប់រូបទាំងប្រុសទាំងស្រីពីព្រះជាម្ចាស់ ហើយការរៀបការក៏ធ្វើឡើងពេលពួកគេនៅមានអាយុតិចម្ល៉េះ ដែលតម្រូវឲ្យពួកគេបញ្ឈប់ការសិក្សា ដូច្នេះភាពមិនចេះអក្សររបស់ប្រជាជនឥណ្ឌាក៏មានកម្រិតខ្ពស់ ធ្វើឲ្យភាពអត់ការងារធ្វើក៏មានច្រើន ឯបញ្ហាសេដ្ឋកិច្ចគ្រួសារក៏ស្ថិតក្នុងសភាពធ្ងន់ធ្ងរដែរ ស្របពេលដែលសមាជិកក្នុងគ្រួសារក៏មានចំនួនច្រើនទៀតនោះ។
បើចូលទៅពិនិត្យមើលឲ្យកាន់តែជ្រៅទៅទៀតអំពីផលប៉ះពាល់ពីចំនួនប្រជាជនច្រើនលើសលប់នេះ នៅមានទៅលើការកើនឡើងអតិផរណាដែលបណ្ដាលមកពីផលិតផលមិនមានគ្រប់គ្រាន់សម្រាប់បំពេញតម្រូវការរបស់ប្រជាជនដ៏ច្រើន ធ្វើឲ្យចំនួនផលិតផលមានតិច ឯតម្លៃផលិតផលវិញមានតម្លៃថ្លៃខ្លាំង។ មិនតែប៉ុណ្ណោះ ផលប៉ះពាល់ក៏មានទៅលើកង្វះហេដ្ឋារចនាសម្ព័ន្ធដូចជាអគារផ្ដល់សេវាកម្មថែទាំសុខភាព មធ្យោបាយធ្វើដំណើរ ផ្ទះសម្បែង សាលារៀនផងដែរ។ ភាពជាក់ស្ដែងទាំងនេះបានសបញ្ជាក់ថា វាមិនគួរឲ្យចម្លែកចិត្តនោះឡើយ ដែលប្រទេសឥណ្ឌាស្ថិតក្នុងចំណោមប្រទេសដ៏ក្រីក្របំផុតនោះ៕
ប្រែសម្រួល៖ ស្រីពៅ
ប្រភព៖ www.mapsofindia.com & www.worldometers.info
