ឆ្លើយត្រូវសង្ឃឹមជាប់៩០%៖ ចំណុចសំខាន់ត្រូវគិត មុននឹងឆ្លើយសំណួរ «ហេតុអ្វីខ្ញុំត្រូវជ្រើសរើសអ្នកឲ្យធ្វើការ»
នៅពេលអ្នកសម្ភាសការងារសួរមកកាន់អ្នកថា ហេតុអ្វីពួកយើងគួរជ្រើសរើសអ្នក ? សំណួរនេះចង់ឆ្លុះបញ្ចាំងពីគំនិតបង្កប់ខាងក្នុងរបស់ពួកគេថា តើអ្នកមានលក្ខណៈពិសេសអ្វីដែលធ្វើឲ្យអ្នកស័ក្ដិសមសម្រាប់មុខតំណែងមួយនេះ ? ត្រូវចាំថា សំណួរនេះភាគច្រើនត្រូវបានគេសួរនៅចុងបញ្ចប់នៃដំណាក់កាលសម្ភាសន៍ ជាពិសេសនៅពេលគេចាប់អារម្មណ៍លើសមត្ថភាពអ្នក។ អ៊ីចឹងហើយ សំណួរមួយនេះ អាចជាចំណុចសំខាន់មួយដែលអ្នកត្រូវធ្វើឲ្យបាន ព្រោះអាចនិយាយបានថា ជាប់ ឬ មិនជាប់ គឺស្ថិតលើការឆ្លើយសំណួរមួយនេះហើយ។
ងាកមកសួរខ្លួនឯងវិញ តើអ្នកត្រូវឆ្លើយបែបណា ដើម្បីបង្ហាញឲ្យពួកគេឃើញពីជំនាញ ក៏ដូចជាសមត្ថភាពពិសេសរបស់អ្នក ដែលអ្នកអាចប្រើប្រាស់វាពោរពេញដោយឆន្ទៈក្នុងការរួមចំណែកជួយដល់ការសម្រេចភាពជោគជ័យនូវទស្សនវិស័យរបស់ពួកគេ ? បើទោះជាមានសិល្បៈ ឬវិធីសាស្ត្រនៅក្នុងការផ្ដល់ចម្លើយដ៏ល្អទៅកាន់អ្នកសម្ភាសការងារបែបណាក៏ដោយ អ្នកត្រូវមានភាពស្មោះត្រង់នឹងខ្លួនឯង ក៏ដូចជាអ្នកសម្ភាសការងារផងដែរ។ ក្នុងន័យនេះចង់បង្ហាញថា អ្នកមិនត្រូវភូតភរកុហកពួកគេនូវភាពអស្ចារ្យអ្វីដែលខ្លួនមិនមានតាមជាក់ស្ដែង ដោយគ្រាន់តែចង់បានការងារនោះឡើយ ព្រោះអសមត្ថភាពរបស់អ្នកនឹងលេចមុខឡើងបង្កជាបញ្ហាក្នុងរយៈពេលវែងសម្រាប់ខ្លួនអ្នកនោះទេ។ ដើម្បីបង្ហាញឲ្យពួកគេឃើញពីភាពស័ក្ដិសមរបស់អ្នកសម្រាប់មុខតំណែងណាមួយ អ្នកត្រូវយល់ឲ្យច្បាស់ថាតើអ្វីដែលពួកគេចង់បានពិតប្រាកដពីបុគ្គលដែលមានការទទួលខុសត្រូវលើតួនាទីនោះ។
មិនថាជាជំនាញ បុគ្គលិកលក្ខណៈ ឬឥរិយាបថអ្វីនោះទេ អ្នកត្រូវសួរខ្លួនឯងថាតើអ្នកមានអ្វីខ្លះដែលជាសេចក្ដីត្រូវការរបស់ពួកគេ។ នៅពេលអ្នកស្វែងរកឃើញពីគុណតម្លៃដែលអ្នកមាន និងផ្គូផ្គងជាមួយសេចក្ដីត្រូវការរបស់ពួកគេហើយ អ្នកត្រូវប្រាប់ពួកគេពីចំណុចពិសេសទាំងនោះ ដោយបង្ហាញជាភស្តុតាងបញ្ជាក់តាមរយៈសមិទ្ធផល ឬភាពជោគជ័យដែលជាលទ្ធផលទទួលបានពីការប្រើប្រាស់នូវចំណុចខ្លាំងទាំងនោះរបស់អ្នកនៅក្នុងមុខតំណែងចាស់។ មិនតែប៉ុណ្ណោះ អ្នកក៏ត្រូវបង្ហាញពួកគេផងដែរថា តើតាមរយៈចំណុចខ្លាំងដែលអ្នកមាន អ្នកអាចប្រើប្រាស់វាដើម្បីជួយសម្រេចទស្សនវិស័យពួកគេបានដោយរបៀបណា នៅពេលអ្នកទទួលបានការងារក្នុងមុខតំណែងនោះ។ ម្យ៉ាងវិញទៀត អ្នកមិនត្រូវមើលរំលងពីសមត្ថភាពពិសេសរបស់អ្នក ដែលធ្វើឲ្យអ្នកមានភាពពិសេសខុសពីអ្នកដទៃនោះឡើយ ព្រោះថាអ្វីដែលអ្នកសម្ភាសការងារចង់បានគឺមិនត្រឹមតែជាគុណតម្លៃដែលអ្នកមានផ្គូផ្គងទៅនឹងសេចក្ដីត្រូវការរបស់ពួកគេតែប៉ុណ្ណោះទេ តែថែមទាំងជាសមត្ថភាពពិសេសរបស់អ្នក ដែលធ្វើឲ្យអ្នកលេចធ្លោលើសពីអ្នកមកសម្ភាសការងារដទៃទៀត និងទាក់ទាញចំណាប់អារម្មណ៍ពួកគេឲ្យចង់ជ្រើសរើសអ្នកមករួមជាសមាជិកក្រុម៕
ប្រែសម្រួល៖ ស្រីពៅ ប្រភព៖ thebalance
