ការប្រកួតការច្នៃប្រឌិតតិចណូកម្ពុជា(TICC) ផ្ដាច់ព្រ័ត្រ រកឃើញជើងខ្លាំង ៣ក្រុម និង ៦ក្រុមទៅវគ្គបន្ត
កាលពីថ្ងៃអាទិត្រ ថ្ងៃទី២៣ មិថុនាកន្លងទៅ ការប្រកួតការច្នៃប្រឌិតតិចណូកម្ពុជា (Techno Innovation Challenge Cambodia) បានធ្វើការរៀបចំកម្មវិធីប្រកួតផ្ដាច់ព្រ័ត្ររបស់ខ្លួននៅវិទ្យាស្ថានបច្ចេកវិទ្យាកម្ពុជា(ITC) ដើម្បីស្វែងរកក្រុមជើងឯកចំនួន ៣ក្រុមក្នុងរដូវកាលនេះ ក្រោមការអញ្ចើញចូលរួមជាអធិបតីពីលោក សុយ ធី នាយករងផ្នែកទូទៅនៃវិទ្យាស្ថានបច្ចេកវិទ្យាកម្ពុជា (ITC) និងការថ្លែងស្វាគមន៍ពីសម្នាក់លោក ហួង សុភក្ត្រដារា ប្រធានគ្រប់គ្រងផ្នែកទំនាក់ទំនងរបស់ក្រុមហ៊ុន EZECOM ដោយមានសិស្ស និស្សិត វិនិយោគិន សាធារណជនទូទៅពីវិស័យរដ្ឋនិងឯកជនប្រមាណ ២០០នាក់។
ការប្រកួតការច្នៃប្រឌិតតិចណូកម្ពុជា (TICC) មានការជួយគាំទ្រពីក្រុមហ៊ុនជាតិនិងអន្តរជាតិ មានដូចជា USAID COMET, EZECOM, Agence Universitaire de la Francophonie (AUF), TEXAS A&M University College of Engineering និងដៃគូសហការជាច្រើនទៀត។ ក្នុងកម្មវិធីប្រកួតប្រជែង TICC នេះ សិស្សទាំងអស់ត្រូវផ្ដោតសំខាន់ទៅលើការ រចនា ការបង្កើត និងស្វែងរកនូវដំណោះស្រាយបញ្ហាពិភពលោកពិតប្រាកដ។
បន្ទាប់ពីការហ្វឹកហាត់របស់រយៈពេល ៤សប្ដាហ៍ ក្រុមទាំង ៨ដែលត្រូវបានជ្រើសរើសចេញពីវគ្គផ្ដាច់ព្រ័ត្រទី១ ដើម្បីចូលរួមប្រកួតជាមួយគ្នាក្នុងថ្ងៃនេះ ដោយក្នុងការប្រកួតផ្ដាច់ព្រ័ត្រនេះក្រុមជើងខ្លាំងចំនួន ៣ត្រូវបានជ្រើសរើស ដោយលេខ១ បានទៅក្រុម Agri-Economiser សម្រាប់គម្រោងកសិដ្ឋានឆ្លាតវៃ (Smart Farm Project) លេខ ២ បានទៅលើក្រុម CamCuisine សម្រាប់គម្រោង Amok Canned Food និងទី ៣បានទៅលើក្រុម VBall ទៅលើគម្រោងប្រហិតបន្លែ (Vegetable meatball)។
ក្រុមជ័យលាភីលេខមួយទទួលបាន ១ ២៥០ដុល្លារអាមេរិក លេខ២ទទួលបាន ១ ០០០ដុល្លារអាមេរិក និងលេខ៣ទទួលបាន ៧៥០ដុល្លារអាមេរិក។ ចំណែកក្រុមចំនួនជាប់ថ្នាក់កំពូល៦ ផ្សេងទៀតទទួលបានកន្លែងធ្វើការជាក្រុម (co-working space) នៅវិទ្យាស្ថានបច្ចេកវិទ្យាកម្ពុជា (ITC) ហើយនឹងទទួលបានឱកាសចូលរួមកម្មវិធីបណ្ដុះបណ្ដាលរយៈពេល ១០សប្ដាហ៍ដែលចាប់ផ្ដើមពីខែកក្កដា ដើម្បីផ្ដល់ឱកាសឲ្យពួកគេយកគំនិតអាជីវកម្មរបស់ពួកគេទៅបង្កើតឲ្យចេញជារូបរាង។
ជាចុងក្រោយ យើងសូមធ្វើការអគុណទៅដល់អ្នកឧបត្ថម្ភកម្មវិធីធំគឺក្រុមហ៊ុន EZECOM និងសូមអគុណទៅដល់អ្នកចៅក្រមវាយតម្លៃទាំងអស់រូបដែលបានចំណាយពេលវេលាដ៏មានតម្លៃ ដែលមានដូចជាលោក សេង សំអាត នាយកផ្នែកប្រតិបត្តិការរបស់ក្រុមហ៊ុន Fair Manufacuring, លោក លី ចាន់ណា សហស្ថាបនិកនិងជានាយកផ្នែកបច្ចេកទេសរបស់ក្រុមហ៊ុន BookMeBus, លោក យ៉ន សុភារិត ស្ថាបនិកនិងជានាយកប្រតិបត្តិរបស់ BizKhmer និងលោក ហួង សុភក្ត្រដារា ប្រធានផ្នែកទំនាក់ទំនង របស់ក្រុមហ៊ុន EZECOM និងសាស្រ្តាចារ្យ Didier Lecomte អ្នកប្រឹក្សារបស់នាយកវិទ្យាស្ថានបច្ចេកវិទ្យាកម្ពុជា។
សូមបញ្ចាក់ផងដែរថា កម្មវិធី ការប្រកួតការច្នៃប្រឌិតតិចណូកម្ពុជា (TICC) បង្កើតឡើងដំបូងក្នុងប្រទេសកម្ពុជាក្នុងឆ្នាំ២០១៧ ហើយឆ្នាំ២០១៩ នេះគឺជាឆ្នាំទី៣ហើយដែលបានប្រារព្ធឡើង។ Techno Innovation Challenge Cambodia គឺជាការប្រកួតប្រជែងជាក្រុម ទៅលើ ការបង្កើតសមិទ្ធផលពីវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដែលមានភាពច្នៃប្រឌិតខ្ពស់បំផុត សម្រាប់ដោះស្រាយបព្ហាជាក់ស្តែងក្នុងប្រទេស ដែលកម្មវិធីនេះបានរៀបចំឡើងដោយ វិទ្យាស្ថានបច្ចេកវិទ្យាកម្ពុជា (សាលាតិចណូ) ដែលមានរយៈពេលប្រកួត ៤ សប្តាហ៍៕
ដោយ៖ លង់ វណ្ណៈ
