ការស្រាវជ្រាវរកឃើញមូលហេតុធំៗ ៣ ដែលធ្វើឲ្យបុគ្គលិកមិនសប្បាយចិត្តនៅកន្លែងការងារ
មានរឿងមួយដែលតែងកើតមានជាទូទៅចំពោះបុគ្គលិកការងារមួយចំនួននៅតាមបណ្តាក្រុមហ៊ុននានា គឺការមិនសប្បាយចិត្តនឹងការងារ។ តើហេតុអ្វីបានជាបុគ្គលិកខ្លះមិនសប្បាយចិត្តនៅកន្លែងធ្វើការ និងមិនព្យាយាមធ្វើអ្វីដែលជាការងាររបស់ពួកគេ? ចម្ងល់នេះត្រូវបានបកស្រាយដោយការស្រាវជ្រាវមួយខាងក្រោមនេះ។
យោងតាមការស្ទង់មតិមួយរបស់ក្រុមហ៊ុន Mental Health America ដែលបានធ្វើឡើងរវាងខែមិថុនាឆ្នាំ ២០១៥ ដល់ខែមីនាឆ្នាំ ២០១៧ ទៅលើមនុស្ស ១៧ ១៤០ នាក់ លទ្ធផលបានបង្ហាញថា ៧៩% នៃអ្នកទាំងនេះមានអារម្មណ៍ថា ពួកគេមិនទទួលបានអ្វីតបស្នងសមនឹងការខិតខំប្រឹងប្រែងរបស់ពួកគេ។ ៥៦% និយាយថា សមត្ថភាពរបស់ពួកគេត្រូវបានមើលរំលង ខណៈដែល ៣៦ និង ៣៤% ផ្សេងទៀតមានអារម្មណ៍ថា ពួកគេមិនទទួលបានការគាំទ្រ ឬ មិនសូវមានទំនាក់ទំនងល្អពីអ្នកគ្រប់គ្រង និង ក្រុមការងាររបស់ខ្លួន។ យោងលើការសិក្សានេះ គេបានកំណត់លទ្ធផលចំនួន ៣ ដែលជាមូលហេតុធ្វើឲ្យបុគ្គលិកមិនសប្បាយចិត្តនៅកន្លែងការងារដែលមានដូចខាងក្រោម៖
១.ក្រុមហ៊ុនមិនផ្តល់តម្លៃដល់ការខិតខំប្រឹងប្រែងរបស់បុគ្គលិក បរិយាកាសការងារមិនល្អដូចជា ខ្វះសម្ភារៈជាមធ្យោបាយបំពេញការងារ កន្លែងការងារខ្វះសុវត្ថិភាព ខ្វះការគាំពារផ្នែកសុខភាព និងគ្មានប្រព័ន្ធលើកទឹកចិត្តផ្តល់ប្រាក់រង្វាន់ជូនបុគ្គលិកឆ្នើមជាដើម នឹងធ្វើឲ្យបុគ្គលិកមានអារម្មណ៍ថា គ្មានភាពកក់ក្តៅ ឬ យល់ថា ក្រុមហ៊ុនមិនឲ្យតម្លៃអ្វីសោះដល់ការរួមចំណែករបស់ពួកគេដែលជាមូលហេតុសំខាន់មួយធ្វើឲ្យពួកគេមិនសប្បាយចិត្ត។
២.អត្តចរិតរបស់ចៅហ្វាយនាយ ឬ បុគ្គលិករួមការងារ ក្នុងចំណុចនេះគេបានមើលឃើញពីចំណុចអវិជ្ជមានជាច្រើនទាក់ទងទៅនឹងបុគ្គលិកលក្ខណៈរបស់ចៅហ្វាយនាយ ឬ អ្នករួមការងារដែលធ្វើឲ្យបុគ្គលិកផ្សេងទៀតមិនសប្បាយចិត្ត។ ចៅហ្វាយខ្លះបានគ្រប់គ្រងបុគ្គលិកដោយគ្មានតម្លាភាព ខ្វះការទទួលខុសត្រូវ ទម្លាក់កំហុសឲ្យបុគ្គលិកក្រោមបង្គាប់ លើកសរសើរកាន់ជើងបុគ្គលិកមួយ បន្ទាបតម្លៃបុគ្គលិកមួយទៀតដោយមិនសំអាងលើការងារជាក់ស្តែង ឬ គាប់សង្កត់បុគ្គលិកក្រោមបង្គាប់ឲ្យខិតខំបំពេញការងារ ដើម្បីយកមុខមាត់តែម្នាក់ឯង។ យ៉ាងណាមិញ ភាពមិនសប្បាយចិត្តនៅកន្លែងការងាររបស់បុគ្គលិកមួយចំនួនក៏វាកើតចេញផងដែរពីបុគ្គលិករួមការងារដូចគ្នា។ បុគ្គលិកច្រណែនបុគ្គលិក បុគ្គលិកមិនឲ្យតម្លៃបុគ្គលិកដូចគ្នា ខ្វះការសហការគ្នាក្នុងការងារជាក្រុម ឬ ធ្វើការដើម្បីផ្គាប់ចិត្តមេរៀងៗខ្លួន ជាដើម ជាមូលហេតុសំខាន់មួយធ្វើឲ្យបរិភាសការងារអាប់អួរខ្លាំង។
៣.បុគ្គលិកហាក់មិនបានចូលរួមយ៉ាងសកម្មជាមួយនឹងបេសកកម្មរបស់ក្រុមហ៊ុន នៅពេលបុគ្គលិកមួយមានអារម្មណ៍ថា ការងារដែលពួកគេធ្វើរាល់ថ្ងៃ ហាក់ដូចជានៅឆ្ងាយសែនឆ្ងាយពីបេសកកម្មរបស់ក្រុមហ៊ុន វានឹងធ្វើឲ្យកើតមានភាពមន្ទិលសង្ស័យមួយប៉ះពាល់ផ្លូវអារម្មណ៍ដល់បុគ្គលិក។ ទាំងនេះអាចជា បុគ្គលិកយល់មិនច្បាស់ពីគោលដៅឬ គុណតម្លៃរបស់ក្រុមហ៊ុនដែលត្រូវដើរទៅមុខដោយសារតែថ្នាក់ដឹកនាំធ្វេសប្រហែស មិនលើកយកមកបង្ហាញ ឬ អាចមកពីថ្នាក់លើមិនឲ្យតម្លៃលើការរួមចំណែករបស់ពួកគេដើម្បីដើរលើផ្លូវជាមួយគ្នា។ នេះជាបញ្ហាដ៏ធំមួយធ្វើឲ្យបុគ្គលិក បាត់បង់ទំនុកចិត្ត អស់សង្ឃឹម គ្មានមហិច្ឆតា និងការប្ដេជ្ញាចិត្តជាមួយនឹងការងាររបស់ខ្លួន៕
ប្រភព៖ Inc
