បទសម្ភាសន៍ពិសេសជាមួយ Audi Cambodia៖ យើងកំពុងប្រជែងគ្នានៅក្នុងទីផ្សាររថយន្តថ្មីទំហំត្រឹមតែ ១០%
ចាប់តាំងពីបើកដំណើរការជាផ្លូវការនៅទីផ្សារនៃព្រះរាជាណាចក្រកម្ពុជាតាំង ពីខែកញ្ញា ឆ្នាំ២០១៤ មក ក្រុមហ៊ុន រថយន្តរបស់អាល្លឺម៉ង់ដែលប្រតិបត្តិការនៅកម្ពុជាក្រោមម៉ាកយីហោ Automotive Asia (Cambodia) Co., Ltd បានបង្ហាញពីការរីកចម្រើនគួរឱ្យកត់សម្គាល់ ស្របពេលដែលក្ដីបារម្ភធំ គឺអំពីទំហំទីផ្សារសម្រាប់រថយន្តទំនើប ឬហៅថា Premium Car Market នៅតូចចង្អៀតនៅឡើយ ពោលគឺប្រហែល ១០%ប៉ុណ្ណោះបើធៀបទៅនឹងទៅទីផ្សារសរុប ស្របពេលដែលរថយន្តជជុះ ឬរថយន្តមួយទឹកមានរហូតដល់ជាង ៩០%។ នេះបើតាមការបញ្ជាក់ពីលោក Antoine Jeanson នាយកប្រតិបត្តិការនៃ Audi Cambodia ក្នុងបទសម្ភាសន៍ពិសេសមួយជាមួយ BizKhmer កាលពីពេលថ្មីៗនេះ។
ដំណាក់កាលប្រតិបត្តិការដំបូង លោក Antoine Jeason បានលើកឡើងថា ក្រុមហ៊ុនបានជួយបញ្ហាលំបាកជាច្រើនក្នុងការប្រតិបត្តិការនៅឆ្នាំដំបូង ដោយសារតែក្រុមហ៊ុនត្រូវការពង្រីក និងផ្សព្វផ្សាយម៉ាកយីហោរបស់ខ្លួន និងដើម្បីបញ្ជ្រាបពីសេវាកម្មដែលមិនធ្លាប់ពីមុនដល់អតិថិជនគោលដៅរបស់ខ្លួន។ ចាប់ពីឆ្នាំ២០១៥ មកក្រុមហ៊ុនចាប់ផ្ដើមមានសន្ទុះនៃការលក់ចេញ ស្របពេលដែលសេវាកម្មជួសជុល និងផ្លាស់ប្ដូរគ្រឿងបំឡាស់ចាប់ផ្ដើមទទួលបានគាំទ្រគួរឱ្យកត់សម្គាល់។ «នៅពេលដែលយើងបើកដំណើរការសេវាកម្មជួសជុល និងផ្លាស់ប្ដូរគ្រឿងបំឡាស់របស់យើង យើងបានគិតពីតម្លៃ និងគុណភាព ដោយកែច្នៃយ៉ាងណាឱ្យអតិថិជនទទួលបានក្នុងកម្រិតមួយប្រកបដោយស្តង់ដារច្បាស់លាស់ ជាក់ស្ដែង យើងបានសហការជាមួយក្រុមហ៊ុន Audi ថ្នាក់តំបន់ដើម្បីធានាបាននូវចំណុចនេះ!»។ នេះជាការលើកឡើងបន្ថែមពីលោក នាយកប្រតិបត្តិការខាងលើ។
ម៉ាកយីហោផ្សារភ្ជាប់នឹង Lifestyle ជាគោលដៅ និងជាទិសដៅនៃយុទ្ធសាស្ត្រធ្វើទីផ្សាររបស់ក្រុមហ៊ុន Audi លោក Antoine បានបង្ហើបប្រាប់ថា យីហោ Audi ផ្ដោតលើការបង្កើត Lifestyle មួយបែបសម្រាប់អ្នកដែលនិយមគាំទ្រលើរថយន្តរបស់ខ្លួន។ លោកបានបញ្ជាក់ដូច្នេះថា ៖«រាល់កម្មវិធី ដែលយើងបានបង្កើតឡើង និងសហការជាមួយដៃគូមួយចំនួន នាពីរបីឆ្នាំចុងក្រោយនេះ គឺយើងផ្ដោតទៅលើការការបង្កើតនូវ របៀបនៃការរស់នៅមួយដោយផ្សារភ្ជាប់នឹង Style ខុសប្លែកមួយដែលស៊ីគ្នាទៅនឹងទិសដៅនៃយីហោរបស់យើង»។ ក្នុងរយៈពេលពីរបីឆ្នាំចុងក្រោយ យើងសង្កេតឃើញថា Audi Cambodia បានរៀបចំ និងចូលរួមគាំទ្រកម្មវិធីជាច្រើនមានដូចជា កម្មវិធីតន្ត្រី Jazz លក្ខណៈអន្តរជាតិ (Audi International Jazz Festival Phnom Penh) គាំទ្រសៀវភៅកម្រងរូបភាពទីក្រុងដែលបង្ហាញពីការផ្លាស់ប្ដូរស្ថាបត្យកម្មរាជធានីភ្នំពេញ Phnom Penh Capital City កម្មវិធីសប្ដាហ៍អ្នកឌីហ្សាញ Fashion Week និងកម្មវិធីជាច្រើនទៀត។
លោក Antoine Jeasonការលក់ និងម៉ូដែលពេញនិយម ទោះបីជាចំនួននៃការលក់រថយន្តប្រចាំខែនីមួយៗ លោ Antoine Jeason មិនអាចបញ្ចេញបានពិតមែនតែលោកបង្ហាញបង្ហើបថា ការលក់នៅពីរឆ្នាំចុងក្រោយនេះ មានសន្ទុះកើនឡើង ទោះជាមានលក្ខណៈយឺតបន្តិចក៏ដោយ។ ម៉ូដែលពេញនិយមមួយចំនួនដូចជា Q5 និង Q7 ស្របពេលដែលម៉ូដែលថ្មីមួយទៀតគឺ A8ជំនាន់ទី៤ ដែលត្រៀមនឹងមកដល់ទីផ្សារកម្ពុជានាពេលឆាប់ៗខាងមុខនេះ។ Audi A8 ជំនាន់ទី៤ នេះ ជារថយន្តម៉ូដែលថ្មី បង្ហាញពីរបត់ថ្មីមួយនៃបច្ចេកវិទ្យា Vorsprung durch Technik ដែលជានិមិត្តសញ្ញាបច្ចេកវិទ្យារថយន្តដ៏ល្បីរបស់ប្រទេសអាល្លឺម៉ង់។ ម៉ូដែលថ្មីនេះ បង្ហាញពីភាសានៃការរចនាថ្មី ផ្សារភ្ជាប់ជាមួយនឹងមុខងារបំពាក់ពីខាងក្នុងសុទ្ធតែ touchscreen។ Audi A8 អាចនិយាយបានថា ជាម៉ូដែលដំបូងក្នុងលោកដែលត្រូវបានអភិវឌ្ឍន៍ឡើងសម្រាប់មុខងារនៃការបើកបរដោយស្វ័យប្រវត្តិ (automated driving) និងបច្ចេកវិទ្យា AI ច្រើន។
ក្ដីបារម្ភចំពោះទីផ្សាររថយន្តជជុះ ព្រោះចំណែកទីផ្សាររថយន្តទំនើប (Luxury Car) មានប្រហែល ១០%ប៉ុណ្ណោះ ការសម្ដែងការព្រួយបារម្ភរបស់នាយកប្រតិបត្តិក្រុមហ៊ុន Audi Cambodia ក៏មិនខុសពីក្រុមហ៊ុនរថយន្តទំនើបផ្សេងទៀតដែរជាពិសេសគឺក្រុមហ៊ុនអាល្លឺម៉ង់តែម្ដងមានដូចជា BMW, Mercedes ជាដើម ហើយក្នុងនោះម៉ូដែល Toyota ត្រូវបានគេមើលឃើញថា មានការនាំចូលចំនួនច្រើនបំផុត។ បើយោងតាមរបាយការណ៍ចេញផ្សាយដោយក្រុមហ៊ុន West Coast SHIPPING ដែលប្រមូលផ្ដុំទិន្នន័យនៃការនាំចេញរថយន្តពីសហរដ្ឋអាមេរិកបានឱ្យដឹងថា ប្រទេសកម្ពុជាជាប់លេខ ១ក្នុងចំណោមប្រទេស ១០នៅទ្វីបអាស៊ីដែលនាំចូលរថយន្តច្រើនជាងគេពីសហរដ្ឋអាមេរិក ពោលគឺមានរហូតដល់ ២៩ ៥៨១គ្រឿងក្នុងឆ្នាំ២០១៧។ តាមរបាយការណ៍ដដែលបានឱ្យដឹងផងដែរថា រថយន្តជជុះបីម៉ូដែលរបស់ក្រុមហ៊ុនតូយូតាមាន Highlander, Camry និង Lexus RX ជាម៉ូដែលដែលពេញនិយមបំផុត។ ដោយឡែក បើយោងតាមរបាយការណ៍ពីការិយាល័យស្ថិតិនៃក្រសួងពាណិជ្ជកម្មរបស់សហរដ្ឋអាមេរិកបានដឹងថា ទំហំនាំចូលរថយន្តប្រភេទគ្រួសារសរុបពីសហរដ្ឋអាមេរិកនៅឆ្នាំ២០១៧ គិតជាទឹកប្រាក់ គឺ ១៧៨ ៧៩៤ ៤៥៤ លានដុល្លារដែលទំហំនេះជិតស្មើនឹងពាក់កណ្ដាលនៃទំហំពាណិជ្ជកម្មដែលសហរដ្ឋអាមេរិកនាំចូលមកកម្ពុជាសរុបនៅឆ្នាំ២០១៧ គឺប្រមាណ ៤០០លានដុល្លារ។ នេះគិតតែទីផ្សារពីសហរដ្ឋអាមេរិកមួយប៉ុណ្ណោះ នៅមិនទាន់គិតពីចំនួននាំចូលពីប្រទេសជប៉ុន ឬមជ្ឈិមបូព៌ានៅឡើយទេ។ ដោយឡែក បើផ្អែកទៅលើរបាយការណ៍ពី នាយកដ្ឋានគយ និងរដ្ឋាករកម្ពុជា អះអាងថា ចំណូលពន្ធគយនៅឆ្នាំ២០១៧ មានទំហំ ១,៩០១ លានដុល្លារអាមេរិក ដែលក្នុងនោះចំណូលមួយភាគធំបានពីការនាំចូលយានយន្តនេះឯង។ ជាមួយគ្នានេះដែរ កម្ពុជានាំចូលរថយន្តសរុបមួយឆ្នាំ ចន្លោះពី ៦-៧ម៉ឺនគ្រឿង ហើយប្រហែល ៥ម៉ឺនគ្រឿង ជាប្រភេទរថយន្តជជុះ។ សម្រាប់លោក Antoine Jeason ចំនួននៃរថយន្ត ជជុះនេះ ជាការគំរាមកំហែងមួយ ដល់ក្រុមហ៊ុនចែកចាយរថយន្តស៊េរីទំនើបស្របច្បាប់នៅកម្ពុជា ក៏ដូចជាការវិនិយោគថ្មីៗបន្ថែមទៀតនៅក្នុងវិស័យនេះ។ សម្រាប់ លោក Antoine Jeason យល់ឃើញថា ចំនួនដ៏ច្រើនលើសលស់នៃរថយន្តជជុះដ៏ច្រើនលើសលប់នៅទីផ្សារកម្ពុជា គឺមិនមែនតែគំរាមកំហែងដល់ទីផ្សារក្រុមហ៊ុនចែកចាយស្របច្បាប់នៅកម្ពុជាប៉ុណ្ណោះទេ ប៉ុន្តែក៏ផ្ដល់ផលអវិជ្ជមានដល់អ្នកប្រើប្រាស់ផងដែរបើទោះជាតម្លៃទាបក៏ដោយ។ ជាស្ដែងដូចជា ប្រព័ន្ធការពារសុវត្ថិភាព គុណភាពម៉ាស៊ីន ធ្លាប់ប៉ះទង្គិច ឬបុកធ្ងន់ធ្ងរដែលធ្វើឱ្យប៉ះពាល់ដល់គ្រោងនិងគុណភាពដែកខាងក្នុងរថយន្ត និងការដំឡើងកម្រិតគីឡូម៉ែត្រជាដើម។ ទាំងនេះជាបញ្ហា។
ការកំណត់ពន្ធថ្មីៗនេះ ប៉ះពាល់យ៉ាងណាដែរ? ការអនុវត្តនីតិវិធីនៃការបង់ពន្ធរថយន្តថ្មី បានធ្វើឲ្យពន្ធរថយន្តគ្រួសារកើនឡើង ៥ភាគរយថែមទៀតនៅឆ្នាំ២០១៨ ពោលគឺពី បានសម្រេចកែសម្រួលអត្រាពន្ធអាករថ្មី ក្នុងនោះបានដំឡើងពន្ធពី ៦៥% ទៅ ៧០% លើការនាំចូលរថយន្តដែលមានទំហំស៊ីឡាំងចាប់ពី ៣ ០០០ សេសេឡើងទៅ។ ទោះជាយ៉ាងណា សម្រាប់លោក Antoine មើលឃើញថា ការដំឡើងពន្ធនេះមិនទាន់មានឥទ្ធិពលយ៉ាងណាមកលើ ទីផ្សាររថយន្តជជុះនោះទេ។ ទោះជាបែបនេះក្ដី បើយោងតាមបណ្ដាញសារព័ត៌មានក្នុងស្រុកមួយបានឱ្យដឹងថា ប្រតិភូរាជរដ្ឋាភិបាល ទទួលបន្ទុក អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា មានគម្រោងដាក់បន្ទុកបន្ថែមលើរថយន្តចាស់ជ្រុលពោលគឺផលិត ក្រោមឆ្នាំ២០០០ ដើម្បីកុំឲ្យប៉ះពាល់ដល់បរិស្ថាន និងប្រឈមចំពោះបញ្ហាសុវត្ថិភាព។ ទោះជាយ៉ាងណា មិនទាន់ដឹងច្បាស់ថា នឹងមានការប្រែប្រួលយ៉ាងណានោះទេ ពោលគឺមានតែរង់ចាំមើលទាំងអស់គ្នា៕
