តើធ្វើយ៉ាងណា ដើម្បីអាចរកមូលហេតុដែលនាំឲ្យអ្នកសម្រេចចិត្តខុស(នាំឲ្យមានវិប្បដិសារី)?
ការសម្រេចចិត្តមិនបានត្រឹមត្រូវ គឺជាកំហុស ប៉ុន្តែតើមាននរណាម្នាក់នៅលើលោកនេះមិនដែលធ្លាប់មានកំហុស? មនុស្សដែលមិនធ្លាប់មានកំហុសលុះត្រាតែពួកគេមិនធ្លាប់ធ្វើអ្វីថ្មីសោះ គឺដូចកង្កែបក្នុងអណ្ដូងអ៊ីចឹងហើយ ពោលគឺគ្មានថ្ងៃអាចរីកចម្រើនបានឡើយ។ ចំណុចដ៏សំខាន់បំផុតនៃលទ្ធផលដែលអ្នកទទួលបានពីការសម្រេចចិត្តមិនបានត្រឹមត្រូវ នោះគឺជាការសិក្សាឈ្វេងយល់ឡើងវិញពីឫសគល់នៃកំហុសឆ្គងនេះឯង។
ការធ្វើខុសហើយមិនបានយកចិត្តទុកដាក់ត្រួតពិនិត្យឡើងវិញនូវអ្វីដែលបង្កជាហេតុនៃកំហុសនោះឡើង ទើបជារឿងដ៏គ្រោះថ្នាក់បំផុត ហើយអ្នកក៏មិនអាចធ្វើរឿងដដែលៗដោយរំពឹងទុកនូវលទ្ធផលផ្សេងគ្នាបានដែរ។ ហេតុនេះ ការត្រួតពិនិត្យលើកំហុសឆ្គងក្នុងការសម្រេចចិត្តរបស់អ្នកគឺជារឿងដ៏សំខាន់ ប៉ុន្តែថាតើអ្នកគួរត្រួតពិនិត្យវាដោយរបៀបណា ? អ្នកគួរត្រឡប់ទៅត្រួតពិនិត្យឡើងវិញទៅលើដំណាក់កាលនៃការសម្រេចចិត្តដែលនាំទៅរកកំហុសឆ្គងនោះទៅមើលថាតើភាពលម្អៀងមានចូលលាយឡំក្នុងការសម្រេចចិត្តរបស់អ្នកទេ ?
ពិតប្រាកដដែរទេដែលថាអ្នកបានធ្វើការសម្រេចចិត្តប្រកបដោយការថ្លឹងថ្លែងបានសព្វគ្រប់ជ្រុងជ្រោយហើយនោះ ? មួយវិញទៀត អ្នកក៏ត្រូវកត់សម្គាល់ពីខ្លួនឯងផងដែរថាតើពេលវេលាណាមួយដែលអ្នកធ្វើការសម្រេចចិត្តប្រកបដោយប្រសិទ្ធភាពនិងស្មារតីនឹងធឹងល្អបំផុត ? ព្រោះថាពេលខ្លះដោយសារតែស្មុគស្មាញពីសម្ពាធការងារនេះហើយដែលនាំអ្នកទៅរកការពិចារណាមិនបានល្អិតល្អន់ ចុងក្រោយក៏នាំទៅរកការសម្រេចចិត្តខុសមិនគួរឲ្យសង្ស័យនេះឯង៕
ប្រែសម្រួល៖ ស្រីពៅ ប្រភព៖ bizjournals
