វិធីសាស្ត្រច្នៃខ្លួនឯងឲ្យក្លាយជាមនុស្សមានតម្លៃ
បើអ្នកចង់ផ្លាស់ប្ដូរនរណាម្នាក់រួមទាំងខ្លួនឯងផងនោះ អ្នកត្រូវផ្លាស់ប្ដូរវិធីនៃការគិតរបស់ពួកគេចំពោះខ្លួនឯងជាមុនសិន។ បើអ្នកបណ្ដុះគ្រាប់ពូជបែបណា វានឹងលូតលាស់ចេញនូវគ្រាប់ពូជដូចគ្នាទៅនឹងអ្វីដែលអ្នកបានបណ្ដុះមកនោះហើយ។ ការគិតរបស់មនុស្សម្នាក់ក៏មិនខុសគ្នាដែរ។ ពួកគេនឹងស្រូបទាញរបស់ល្អៗចូលក្នុងជីវិត បើពួកគេតែងមានទម្លាប់បណ្ដុះគ្រាប់ពូជនៃការគិតរបស់ខ្លួននូវគំនិតវិជ្ជមាន បើមិនដូច្នោះទេរឿងអាក្រក់ក្ដៅក្រហាយទាំងឡាយក៏នឹងចូលមកក្នុងជីវិតពួកគេដូចគ្នា បើគ្រាប់ពូជដែលបានបណ្ដុះជាគ្រាប់ពូជនៃគំនិតអវិជ្ជមាននោះ។
ការមិនឲ្យតម្លៃលើខ្លួនឯង វាមិនខុសគ្នាអ្វីពីការខ្វះជំនឿចិត្តលើខ្លួនឯងនោះទេ។ បើកាលណាអ្នកមិនជឿជាក់លើខ្លួនឯងហើយ តើអ្នកនឹងមានកម្លាំងជំរុញចិត្តមកពីណា ដើម្បីទប់ទល់នឹងស្ថានការណ៍លំបាកៗដែលតែងតែកើតឡើងមិនអាចចៀសបាននៅក្នុងជីវិតនោះ ? ខាងក្រោមនេះគឺជាអ្វីដែលអ្នកអាចធ្វើបានដើម្បីបង្កើនការឲ្យតម្លៃលើខ្លួនឯង៖
១) ត្រួតពិនិត្យលើការគិតដែលអ្នកតែងមានមកលើខ្លួនឯង
សម្បជញ្ញៈរបស់មនុស្ស ឬជាចិត្តក្រៅខ្លួនដែលអាចបែងចែកខុសត្រូវបាន គ្រប់គ្រងទៅលើចិត្តមួយដំណាក់កាលទៀតដែលនៅក្រោមការបញ្ជាពីវា នោះគឺអនុសម្បជញ្ញៈ។ សម្បជញ្ញៈអាចទទួលដឹងបានតាមរយៈញាណទាំង៥របស់មនុស្ស ហើយនៅពេលវាទទួលយកគំនិតណាមួយហើយ អនុសម្បជញ្ញៈក៏នឹងស្ដាប់តាមហើយព្រមទទួលយកនូវគំនិតនោះដែរ។ អនុសម្បជញ្ញៈគឺជាចិត្តដែលបង្គាប់បញ្ជាទៅលើរាល់ទង្វើនិងសកម្មភាពរបស់មនុស្ស។ ហេតុនេះ នៅពេលវាទទួលយកគំនិតបែបអន់ថយហើយ វាក៏នឹងបញ្ជាឲ្យអ្នកប្រព្រឹត្តនូវអ្វីដែលផ្ដល់ផលអវិជ្ជមានមកលើខ្លួនអ្នកវិញដែរ។ នេះគឺជាច្បាប់ធម្មជាតិ។ ជាប្រការសំខាន់បំផុតដែលអ្នកត្រូវប្រុងប្រយ័ត្នជានិច្ចនូវរាល់ការគិតដែលអ្នកកំពុងមាន។
២) តើអ្វីដែលអ្នកធ្វើបានល្អបំផុត?
វាជាសំណួរដែលសួររកពីចំណុចខ្លាំងរបស់អ្នកនេះហើយ។ នរណាម្នាក់ក៏មានចំណុចពិសេសដែលជាភាពខ្លាំងរបស់ខ្លួនដែរ។ ការទទួលខុសត្រូវរបស់អ្នកទៅលើជីវិតខ្លួនឯង គឺជាការស្វែងរកឲ្យឃើញនូវចំណុចខ្លាំងនោះ។ នៅពេលអ្នកដឹងពីអ្វីដែលខ្លួនធ្វើបានល្អបំផុតហើយ និងបានប្រើប្រាស់ចំណុចខ្លាំងនោះដើម្បីបំពេញប្រយោជន៍ដល់អ្នកដទៃទៀតនោះ អ្នកនឹងរកឃើញនូវតម្លៃរបស់ខ្លួនជាមិនខាន។
៣) ការអភ័យទោស
អ្វីក៏ដោយក៏មិនអាចមករំខានសេចក្ដីស្ងប់អ្នកបានដែរ ដរាបណាវាមិនទទួលបានការអនុញ្ញាតពីអ្នកនោះ។ អ្នកក៏ត្រូវចងចាំគ្រប់ពេលដែលចិត្តអ្នកពោរពេញដោយភាពចង្អៀតចង្អល់មិនព្រមអភ័យទោសដល់ខ្លួនឯង ឬអ្នកដទៃ គឺអ្នកខ្លួនឯងនោះទេដែលប្រគល់អំណាចឲ្យរឿងទាំងនោះមករំខានដល់អ្នក ប៉ះពាល់ដល់សេចក្ដីសុខស្ងប់នៃចិត្ត និងផ្នែកផ្សេងៗនៃជីវិត។ នៅពេលចិត្តអ្នកចង្អៀតចង្អល់ក្ដៅក្រហាយ អ្នកកំពុងតែមិនផ្ដល់តម្លៃលើខ្លួនឯងហើយ ហើយមានតែចិត្តស្ងប់ប៉ុណ្ណោះ ទើបអាចនាំសេចក្ដីសុខមកអ្នកបាន។
៤) ចងចាំថាអ្នកមិនមែនជាអ្វីដែលជាស្ថានការណ៍របស់អ្នកនោះទេ
គ្មានជោគជ័យណាដែលអាចសម្រេចបានដោយអវត្តមាននូវការបរាជ័យនោះឡើយ។ មានបរាជ័យទើបមានជោគជ័យ ឲ្យតែបុគ្គលនោះចេះរៀនសូត្រពីមេរៀនដែលបរាជ័យបានបង្រៀនពួកគេ ដើម្បីកែប្រែអភិវឌ្ឍឲ្យល្អជាងខ្លួនឯងកាលពីម្សិលមិញ។ ផ្ទុយទៅវិញ អ្នកគឺជាមនុស្សបរាជ័យពិតប្រាកដណាស់ បើអ្នកយកការបរាជ័យនោះមកកំណត់ជោគវាសនាជីវិតអ្នកបញ្ចប់ត្រឹមនេះ ដោយមិនតស៊ូរើបម្រះសម្រេចក្ដីសុបិនរបស់ខ្លួន៕
ប្រែសម្រួល៖ ស្រីពៅ
ប្រភព៖ psychologytoday
