កិច្ចប្រជុំក្លឹបសហគ្រិនស្រ្តីវ័យក្មេងអាស៊ានបើកកិច្ចប្រជុំដើម្បីជម្រុញនិងពង្រឹងសម្លេងសហគ្រិនស្រ្តីទាំងក្នុងប្រទេស និងក្នុងក្របខណ្ឌតំបន់
រាជធានីភ្នំពេញ ៖ ក្លឹបសហគ្រិនស្រ្តីវ័យក្មេងអាស៊ាន ASEAN Young Women Entrepreneurs Club (AYWEC) បានរៀបចំឲ្យមានកិច្ចប្រជុំសហគ្រិនស្រ្តីវ័យក្មេងអាស៊ានដើម្បីលើកកម្ពស់ស្រ្តីក្នុងភាពជាសហគ្រិន ដើម្បីស្រាយបញ្ហាប្រឈមធំៗជាមួយគ្នា និងអាចសម្របខ្លួនទៅនឹងបរិបទថ្មីរបស់សង្គម។ កម្មវិធីនេះ បានរៀបចំឡើងស្របពេលដែលសមាគមសហគ្រិនវ័យក្មេងកម្ពុជា (YEAC) បានធ្វើជាម្ចាស់ផ្ទះ រៀបចំព្រឹត្តិការណ៍មហោស្រពសហគ្រិនវ័យក្មេងអាស៊ានលើកទី៧ ក្រោមប្រធានបទ “រីកចម្រើនកាន់តែខ្លាំងទាំងអស់គ្នា (RISE STRONGER TOGETHER)” នៅថ្ងៃទី១២ រហូតដល់ថ្ងៃទី១៣ ខែវិច្ឆិកា ឆ្នាំ២០២២ នេះ។
កាលពីថ្ងៃទី១១ ខែ វិច្ចិកា ២០២២ សហគមសហគ្រិនវ័យក្មេងអាស៊ាន-ASEAN Young Entrepreneurs Club (AYEC) បានរៀបចំឲ្យមានកិច្ចប្រជុំសហគ្រិនស្រ្តីវ័យក្មេងអាស៊ាន-ASEAN Young Women Entrepreneurs Club (AYWEC) ក្នុងគោលបំណងឲ្យសមាជិកក្រុមប្រឹក្សាភិបាលក្លឹបសហគ្រិនស្ដ្រីវ័យក្មេងបានជួបសំណេះសំណាលជាមួយសហគ្រិនស្ត្រីវ័យក្មេងអាស៊ាន ដោយមានការចូលរួមពីប្រទេសដែលជាសមាជិកអាស៊ានមាន កម្ពុជា ប្រ៊ុយណេ ឥណ្ឌូនេស៊ី ឡាវ ម៉ាឡេស៊ី ថៃ សិង្ហបុរី។ នៅក្នុងកម្មវិធីនេះផងដែរក៏មានការលើកឡើងពីសកម្មភាពសំខាន់ៗប្រចាំឆ្នាំ របស់ក្លឹបសហគ្រិនស្ត្រីវ័យក្មេងអាស៊ានពីសំណាក់ប្រទេសនីមួយៗដែលបានចូលរួម រួមទាំងមានការចូលរួមផ្តល់មតិលើការខ្វះខាត ផលវិបាក និងចំណុចដែលត្រូវកែរសម្រួលបន្ថែមទៀតដែលសមាជិកក្លឹបតាមប្រទេសនីមួយៗជួបប្រទះ សម្រាប់បទពិសោធន៍ការងារកន្លងមក។
ជាមួយគ្នានេះ តាមរយៈប្រសាសន៍រាយការណ៍របស់ លោកស្រី យូ បូរី ដែលជាប្រធានប្រចាំខ្លឹបសហគ្រិនស្ត្រីវ័យក្មេងអាស៊ាន២០២២ បានលើកឡើងថាក្នុងឆ្នាំ២០២២នេះ ក្លឹបសហគ្រិនវ័យក្មេងកម្ពុជាមានសកម្មភាពសំខាន់ៗដូចជា កម្ពុជាបានរៀបចំឲ្យមានកិច្ចប្រជុំធំរវាងក្រុមប្រឹក្សាភិបាលក្លឹប បង្កើតឲ្យមានកម្មវិធីបង្កើនទំទាក់ទំនងរវាងសមាជិកក្លឹបជាមួយសហគ្រិនស្ត្រីពីបណ្តាលប្រទេសក្នុងតំបន់អាស៊ាន ដែលសកម្មភាពទាំងនេះធ្វើឡើងចំនួន ៣ ដងដូចៗគ្នាតាមរយៈអនឡាញ ក្នុងគោលបំណងដើម្បីអោយក្លឹប AYWEC កាន់តែមានភាពល្បីល្បាញ និងមានការទទួលស្គាល់ថែមទៀត។ ក្នុងនោះផងដែរ ក្លឹបសហគ្រិនស្ត្រីវ័យក្មេងក៏បានស្នើសុំកិច្ចសហការណ៍ជាមួយក្រសួងកិច្ចការនារី ដើម្បីរៀបចំកម្មវិធីប្រគល់ពានរង្វាន់ជូនដល់សហគ្រិនស្ត្រីក្នុងតំបន់អាស៊ានទាំងមូល។ អ្វីដែលគួរឲ្យកត់សម្គាល់ ក្លឹបសហគ្រិនស្ត្រីវ័យក្មេងអាស៊ាន (AYWEC) ទទួលបានពានរង្វាន់រហូតដល់ទៅ១៨រូបមកពីប្រទេស កម្ពុជា ប្រ៊ុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន ថៃ វៀតណាម។
ជាលទ្ធផលកិច្ចប្រជុំក្លឹបសហគ្រិនស្រ្តីវ័យក្មេងអាស៊ាន-ASEAN Young Women Entrepreneurs Club (AYWEC) បានបញ្ចប់ប្រកបដោយលទ្ធផលជាផ្លែផ្កាពីសំណាក់ប្រទេសទាំងអស់ និងមានការចូលរួមបញ្ចេញមតិលើគម្រង់និងយុទ្ធសាស្ត្រថ្មីៗ ដើម្បីអោយក្លឹបសហគ្រិនស្រ្តីវ័យក្មេងអាស៊ាន (AYWEC) កាន់តែមានភាពរឹងម៉ាំនិងល្បីល្បាញ ដើម្បីអោយកាន់តែមានភាពងាយស្រួលនៅក្នុងការធ្វើការសហការគ្នាទៅឆ្នាំបន្តបន្ទាប់ទៀត។
