អង្គការមូលនិធិកុមារពិការ សហការណ៍ជាមួយអង្គការជនពិការប្រចាំខេត្ត ក្រុមហ៊ុនឯកជន និងសប្បុរសជនមួយនានារៀបចំកម្មវិធីសប្បុរសធម៌ជួយដល់កុមារ និងជនមានពិការភាព ដែលនឹងរៀបចំឡើងនៅខេត្តក្រចេះ ថ្ងៃ​ទី ១៦ ខែសីហា ឆ្នាំ២០២០ និង​នៅ​ខេត្ត​កំពត​នឹង​រៀប​ចំឡើង​នៅ​ថ្ងៃទី ២៥ ខែ​សីហា ឆ្នាំ២០២០ ខាងមុខនេះ។

លោក គង់ វិចិត្រា ស្ថាបនិកអង្គការមូលនិធិកុមារពិការ (KPF) បានមានប្រសាសន៍ថា៖ «ការរៀបចំកម្មវិធីសប្បុរសធម៌របស់អង្គការមូលនិធិកុមារពិការ ផ្តោតសំខាន់ទៅលើការចែករំលែកក្តីស្រឡាញ់ជូនទៅដល់ជនមានពិការភាព ការផ្ដល់ជូនអាហារ រួមទាំងកាដូមួយចំនួនដើម្បីកាត់បន្ថយការលំបាកជូនពួកគាត់។

សកម្មភាពសប្បុរសធម៌ទាំងនេះបានរៀបចំឡើងតាំងពីមុនពេលមានវិបត្តិជំងឺកូវីដ១៩ ទៅទៀត ប៉ុន្តែស្ថិតក្នុងកាលៈទេសៈដ៏លំបាកមួយនេះ មនុស្សគ្រប់គ្នាស្ទើរទូទាំងពិភពលោកបាននិងកំពុងរងគ្រោះផ្នែកសេដ្ឋកិច្ច អង្គការមូលនិធិកុមារពិការ កាន់តែសម្លឹងឃើញពីផលលំបាករបស់ជនមានពិការភាពនិងជនងាយរងគ្រោះ ដោយសារពួកគាត់មួយចំនួនត្រូវរងផលប៉ះពាល់លើប្រាក់ចំណូល។ 

ស្ថាបនិកអង្គការមូលនិធិកុមារពិការរូបនេះ ក៏បានធ្វើការអំពាវនាវដល់ជនរួមជាតិទាំងអស់ដើម្បីចូលរួមចំណែកក្នុងការចែករំលែកក្តីស្រឡាញ់ជូននូវជនមានពិការភាព តាមរយៈការរៃអង្គាសប្រាក់ ចំណីអាហារ និងសម្ភារៈមួយចំនួន។ បន្ថែមពីនេះលោកក៏បានមានប្រសាសន៍បន្ថែមថា វិបត្តិកូវីដ១៩ បានធ្វើឲ្យគ្រប់គ្នាជួបប្រទះនូវការលំបាកជាច្រើន ប៉ុន្តែជនដែលមានពិការភាពពួកគាត់កាន់តែទទួលរងនូវការប៉ះពាល់ខ្លាំងទៀត។

នៅក្នុងកាលៈទេសៈបែបនេះ ការចូលរួមចំណែកជួយគ្នាក្នុងសហគមន៍ ឬក្នុងសង្គមជាតិយើងទាំងមូលគឺជាការបង្ហាញនូវសន្តានចិត្តនៃការជួយគ្នារួបរួមគ្នាក្នុងនាមជាមនុស្សជាតិក៏ដូចជាក្នុងនាមខ្មែរដូចគ្នា។ សកម្មភាពសប្បុរសធម៌នេះដែរ គឺកើតចេញពីទឹកចិត្តនៃការជួយយកអាសារគ្នា យល់ពីទុក្ខលំបាកក្នុងសង្គម ដូចជាបង្កើតវប្បធម៌នៃការចែករំលែកឲ្យបានកាន់តែប្រសើរបន្ថែមទៀត។

ម្ចាស់ជំនួយឬអ្នកដែលបានចូលរួមក្នុងសកម្មភាពនៃការរៃអង្គាសសម្រាប់កម្មវិធីសប្បុរសធម៌នេះ ក៏អាចចូលរួមដោយផ្ទាល់ជាមួយនឹងអង្គការមូលនិធិកុមារពិការ ដើម្បីបានបានជួបដោយផ្ទាល់និងស្វែងយល់ពីជីវភាព ការរស់នៅ ក៏ដូចជាផលលំបាកមួយចំនួនដែលជនមានពិការភាពកំពុងជួបប្រទះ។ ហើយវាក៏ជាការបង្កើតនូវភាពស្និទ្ធស្នាលក្នុងនាមជាអ្នកផ្ដល់ជំនួយទៅនឹងអ្នកដែលទទួលជំនួយ ក៏ដូចជាការស្វែងយល់ពីសកម្មភាពនានារបស់អង្គការមូលនិធិកុមារពិការផងដែរ លោកអ្នក​អាច​ចូល​រួម​ធ្វើ​កា​រ​បរិច្ចាគ​តាមរយៈលេខទូរស័ព្ទ និង​គណនី​ធនាគារ​ខាង​ក្រោម​៖

017777532 (លោក គង់ វិចិត្រា)

កុងធនាគាររបស់អង្គការ

Komar Pikar Foundation 

ABA account 000 237 851

យើងខ្ញុំនឹងធ្វើបញ្ជីសប្បុរសជនទាំងអស់ហើយផ្ញើជូនសាធារណះជន