របាយការណ៍ Oxfarm៖ មនុស្សប្រហែល ៥០០លាននាក់នឹងធ្លាក់ខ្លួនក្រីក្រ
មានមនុស្សប្រហែល ៦ ទៅ ៨% នៃប្រជាជនទូទាំងពិភពលោក ដែលស្មើនឹងប្រមាណ ៥០០លាននាក់នឹងធ្លាក់ខ្លួនក្រីក្រ ដោយសារការបិទខ្ទប់សេដ្ឋកិច្ចរបស់ប្រទេសនីមួយៗដើម្បីប្រយុទ្ធប្រឆាំងនឹងការវាយលុកពីវីរុសកូវីដ១៩។ នេះបើយោងតាមរបាយការណ៍របស់អង្គការ Oxfarm។
ទោះជាបែបនេះក្ដីរបាយការណ៍ដដែលក៏បានអះអាងផងដែរថា ប្រសិនបើប្រទេសអ្នកមានអាចចាត់វិធានការណ៍បានរហ័សដើម្បីជួយដល់ប្រទេសកំពុងអភិវឌ្ឍន៍ នោះស្ថានភាពនេះនឹងមានលក្ខណៈធូរស្រាលជាងនេះខ្លះ។
អង្គការដដែលបានព្រមានដូច្នេះថា ប្រសិនបើប្រទេសអ្នកមានមិនអាចជួយប្រទេសក្រីក្រ និងប្រទេសកំពុងអភិវឌ្ឍន៍ បានទេនោះ ពិភពលោកនឹងចំណាយពេល មួយទសវត្សរ៍ ឬរហូតដល់ ៣០ឆ្នាំដើម្បីប្រឆាំងនឹងភាពក្រីក្រម្ដងទៀតនៅតំបន់មួយចំនួនជាពិសេសនៅទ្វីបអាហ្វ្រិក និងអាស៊ីខាងលិច។
ការចេញរបាយការណ៍របស់អង្គការ Oxfarm នាពេលនេះ គឺដើម្បីអំពាវនាវដល់ថ្នាក់ដឹកនាំពិភពលោកសម្រេចលើកញ្ចប់សង្គ្រោះផ្នែកសេដ្ឋកិច្ច ដើម្បីជួយដល់ប្រទេសក្រីក្រ។ រដ្ឋមន្ត្រីក្រសួងហិរញ្ញវត្ថុ មកពីក្រុមបណ្ដាប្រទេស G20 នឹងជួបប្រុជំគ្នានាសប្ដាហ៍ក្រោយដោយមានការចូលរួមពី IMF និងធនាគារពិភពលោកផងដែរ។
Oxfarm បានផ្ដល់អនុសាសន៍មួយចំនួន ក្នុងនោះ មានចំណុចមួយពាក់ព័ន្ធនឹងការសម្រេចបន្ទាន់លើការលុបចោលបំណុលដែលត្រូវសងរបស់ប្រទេសកំពុងអភិវឌ្ឍន៍ដែលត្រូវដល់កាលកំណត់ត្រូវសងនៅឆ្នាំ២០២០នេះ មានទំហំរហូតដល់ ១ពាន់ពាន់ (១ទ្រីលាន) ដុល្លារ។ ប្រភពដដែលបានលើកឧទាហរណ៍យកប្រទេស Ghana ថា ប្រសិនបើមានការលុបចោលលើបំណុលរបស់រដ្ឋាភិបាលនាឆ្នាំនេះ នោះរដ្ឋាភិបាលនេះនឹងអាចផ្ដល់ជំនួយជាសាច់ប្រាក់ ២០លានដុល្លារ/ខែដើម្បីជួយទៅដល់ប្រជាជនប្រមាណ ១៦លាននាក់ជាកុមារ មនុស្សពិការ និងជាមនុស្សចាស់ បានរយៈពេល ៦ខែ។
ដំណោះស្រាយមួយទៀតនោះគឺ ការបង្កើននូវជំនួយក្រៅប្រទេសប្រមាណ ៥០០លានដុល្លារ និងការបង្កើតនូវទុនបម្រុងអន្តរជាតិក្រោមទម្រង់ជា Special Drawing Rights (SDRs) ទំហំ ១ទ្រីលានដុល្លារសម្រាប់មូលនិធិរូបិយប័ណ្ណអន្តរជាតិ (IMF) ដែលជាជម្រើសដ៏មានប្រសិទ្ធភាពដើម្បីជំរុញឱ្យមានសន្ទនីយភាព (liquidity) សម្រាប់ប្រទេសកំពុងអភិវឌ្ឍន៍នៅរយៈពេលប៉ុន្មានខែទៅមុខទៀត៕
ដោយ៖ រតនៈវិភូ
