លោក កឹម អឿន៖ ជីវិតនឹងកាន់តែប្រសើរ ប្រសិនបើអ្នកចេះប្រើប្រាស់ខួរក្បាលស្វារបស់អ្នក
តើឆ្ងល់ទេហេតុអ្វីបានជាមនុស្សសាមញ្ញភាគច្រើនមានចរិតកោងកាច ឆេវឆាវ និងចូលចិត្តយកហិង្សាមកដោះស្រាយបញ្ហា? អ្នកនឹងភ្ញាក់ផ្អើលបើដឹងរឿងទាំងនេះ។ លោក កឹម អឿន នាយកវិទ្យាស្ថានសិក្សាដើម្បីជោគជ័យ (LSI) បានចែករំលែកថា សៀវភៅ The Chimp Paradox របស់លោក Steve Peters បានបង្ហាញពីលក្ខណៈនៃខួរក្បាលរបស់មនុស្សដែលបែងចែកជា ៣ផ្នែកផ្សេងៗគ្នា ដឹងហើយពិតជាធ្វើឲ្យលោកភ្ញាក់ផ្អើល និងសង្វេគខ្លាំងណាស់។
ចែករំលែកពីសៀវភៅ The Chimp Paradox លោកនាយក កឹម អឿន ប្រាប់ថា នៅក្នុងខួរក្បាលរបស់មនុស្សបែងចែកជាបីផ្នែកផ្សេងៗគ្នាគឺ ទី១ខួរក្បាលស្វា ទី២ខួរក្បាលមនុស្ស និងទី៣គឺខួរក្បាលកុំព្យូទ័រ។ ខួរក្បាលស្វាគឺជាផ្នែកដែលកើតដំបូងគេបង្អស់ វាមានភាពរហ័សជាងផ្នែកដទៃទៀត ដែលអាចជួយសង្គ្រោះឲ្យរួចផុតពីគ្រោះថ្នាក់ផ្សេងៗ ប៉ុន្តែដោយសារតែភាពរហ័សរហួនពេក ប្រសិនបើយើងគ្រប់គ្រងវាមិនជាប់ទេនោះ ផ្នែកនេះនឹងបង្កជាបញ្ហាធំដល់ខ្លួនយើងមិនខាន។
ខួរក្បាលស្វាវាធ្វើឲ្យមនុស្សឆាប់ខឹងឆាប់ឆេវឆាវ ឧទាហរណ៍ជាក់ស្ដែងប្រសិនបើមាននរណាម្នាក់ទះអ្នកមួយកំផ្លៀង ខួរក្បាលស្វានេះនឹងរំញោចឲ្យអ្នកខឹងភ្លាមៗ ហើយធ្វើយ៉ាងណាត្រូវតបតទៅវិញឲ្យបានភ្លាមៗផងដែរ។ បន្ទាប់ពីខឹងរួច ភាពស្ដាយក្រោយនឹងកើតឡើង ហើយនោះគឺជាខួរក្បាលរបស់មនុស្សដែលចេះគិតចេះពិចារណា ប៉ុន្តែនៅមានភាពយឺតយ៉ាវជាងខួរក្បាលស្វាបន្តិច។ ទាំងនេះសរបញ្ជាក់ឲ្យឃើញថា ភាគច្រើននៃមនុស្សគឺត្រូវបានដឹកនាំដោយខួរក្បាលស្វា ដូច្នេះហើយប្រសិនបើនៅតែបន្តឲ្យខួរក្បាលស្វានេះគ្រប់គ្រងបាន អ្នកនឹងមិនអាចរីកចម្រើនបានទេ។
ដើម្បីអាចជម្នះខួរក្បាលស្វានេះបាន នៅពេលដែលខឹងអ្នកត្រូវសួរខ្លួនឯង ថាតើអ្វីដែលយើងគិតថាចង់ធ្វើពេលនេះ(ពេលកំពុងខឹង) យើងពិតជាចង់ធ្វើប្រាកដមែនឬទេ! ចេះទប់អារម្មណ៍ ហើយធ្វើការពិចារណា ថាតើអារម្មណ៍របស់យើងពិតជាចង់អីចឹងឬអត់។ មួយវិញទៀត ខួរក្បាលស្វានេះធ្វើឲ្យអ្នកខឹងហើយ ដំណោះស្រាយល្អគឺរកកន្លែងស្ងប់ស្ងាត់ ឬកន្លែងមានបរិយាកាសល្អដើម្បីឲ្យអារម្មណ៍នោះបានធូរស្រាល ចៀសវាងបង្ហាញសកម្មភាពឆេវឆាវរបស់ខួរក្បាលស្វានៅមុខអ្នកដទៃ។ ប្រសិនបើកែប្រែចំណុចនេះបាន ជីវិតអ្នកប្រាកដជាកាន់តែល្អប្រសើរឡើង៕
ដោយ៖ ជួប ស្រីរ័ត្ន
