វិធី ៩ យ៉ាងដើម្បីអង្កេតមើលថា អ្នកជាមនុស្សជឿជាក់ ឬមនុស្សមានអំនួត
មនុស្សជឿជាក់ នឹងនាំទៅរកការសម្រេចបានសមិទ្ធផលនៅទីបំផុត។ រីឯមនុស្សដែលមានអំនួត នឹងនាំទៅរកភាពអាម៉ាស់ និងការបរាជ័យនៅទីបញ្ចប់។ នេះជាលក្ខណសម្បត្តិខុសគ្នា ហើយអាចអ្នកគួររៀនអង្កេតមកលើខ្លួនឯង ឬរៀនពិនិត្យមើលអត្តចរិតអ្នកណាម្នាក់ផ្សេងទៀត។ ជាទូទៅមនុស្ស ដែលជឿជាក់ និងមនុស្សដែលមានអំនួតមានភាពខុសប្លែកគ្នាដូចខាងក្រោមនេះ៖
១.មិនប្រើក្រសែភ្នែកចំៗពេលសន្ទនា
ជាធម្មតាមនុស្សមានអំនួតមិនសូវយកចិត្តទុកដាក់អ្នកដទៃនោះឡើយ។ មនុស្សប្រភេទនេះ ចាប់អារម្មណ៍តែខ្លួនឯងប៉ុណ្ណោះ។ ចំណុចមួយដែលអ្នករៀនសំគាល់បានគឺថា មនុស្សប្រភេទនេះជារឿយៗមើលរំលងអ្នក ហើយងាកទៅនិយាយជាមួយអ្នកផ្សេងទៀតភ្លាមៗដែលខ្លួនយល់ថាសំខាន់ជាងអ្នក បើទោះបីខ្លួនកំពុងនិយាយជាមួយអ្នកក៏ដោយ។ ផ្ទុយទៅវិញ មនុស្សដែលជឿជាក់ នឹងប្រើក្រសែភ្នែករបស់ពួកគេសម្លឹងមើលមកអ្នកចំៗ ហើយធ្វើឲ្យអ្នកមានអារម្មណ៍កក់ក្តៅថា អ្នកសំខាន់ជាងអ្នកផ្សេងទៀតដែលនៅក្បែរអ្នក។
២.មកប្រជុំយឺត ហើយមិនចូលចិត្តសុំទោស
មនុស្សអំនួតយល់ថា ពេលវេលារបស់ខ្លួនសំខាន់ជាងពេលវេលារបស់អ្នកផ្សេងទៅទៀត។ ដូច្នេះការមកចូលរួមកិច្ចប្រជុំយឺតយ៉ាវចាត់ទុកថា ជារឿងធម្មតា ហើយមិនសុំទោសអ្នកដែលអ្នកមកមុនទៀតផង។ រីឯមនុស្សដែលជឿជាក់វិញ គោរពពេលវេលាខ្លាំងណាស់។ ការមកយឺតជារឿងកម្រសម្រាប់មនុស្សជឿជាក់ ហើយប្រសិនបើមកយឺតលុះត្រាតែមានករណីចាំបាច់បំផុត និងធ្វើការសុំទោសចំពោះកំហុសរបស់ខ្លួននៅមុខមនុស្សគ្រប់គ្នា។
៣.ប្រើសម្ដីសម្លាប់ទឹកចិត្តអ្នកដទៃ
ថ្នាក់ដឹកនាំ ឬអ្នកគ្រប់គ្រងខ្លះបានប្រើភាសាធ្ងន់ៗ ដូចជា "អ្នកឯងល្ងង់ណាស់” ឬ "អ្នកឯងភ្លឺណាស់”។ តាមពិតទៅ ពាក្យទាំងនេះគឺជាភាសាបំបាក់ទឹកចិត្តដល់បុគ្គលិកក្រោមបង្គាប់ ហើយទោះបីជាអ្នកជាអ្នកគ្រប់គ្រងដ៏មានសមត្ថភាពមួយរូបក៏ដោយ ភាសានេះបានធ្វើឲ្យអ្នកធ្លាក់ចូលទៅក្នុងជំពូកមនុស្សមានអំនួតច្រើនជ្រុល មើលងាយអ្នកដទៃ។ ងាកមកមើលមនុស្សដែលមានភាពជឿជាក់វិញ បានប្រើភាសាមួយគឺការរិះគន់ក្នុងន័យស្ថាបនា និងលើកទឹកចិត្តឲ្យបុគ្គលិកព្យាយាមធ្វើឡើងវិញ ព្រមទាំងចេះកែប្រែកំហុសផងដែរ។
៤.ប្រើកាយវិការមិនទំនង និងបន្លឺសំឡេងខ្លាំងៗ
វិធីមួយទៀតដែលគេអាចអង្កេតមនុស្សដែលមានអំនួតអួតអាង គឺកាយវិការឆ្គាំឆ្គង ដើរខ្លាំងៗ និងបញ្ចេញសម្លេងឭៗ។ មនុស្សប្រភេទនេះបញ្ចេញចរិតមកក្រៅបែបអ្នកត្រួតត្រាដូចជា ចូលចិត្តយកដៃចង្អុលទ្រូងអ្នកណាម្នាក់ៗចំ ស្រែកគំហក ឬបក់ដៃពេលចង់ហៅអ្នកណាម្នាក់។ ចំណែកមនុស្សដែលជឿជាក់វិញ បើកចិត្តទូលាយ និងមិនធ្វើឲ្យមនុស្សជុំវិញខ្លួនមានអារម្មណ៍ភ័យខ្លាចទៅនឹងកាយវិការ ឬតាមរយៈពាក្យពេចន៍របស់ខ្លួនឡើយ។
៥.ចូលចិត្តនិយាយកាត់
ដោយសារតែមនុស្សមានអំនួតចូលចិត្តផ្ដោតតែលើខ្លួនឯងជាងអ្នកដទៃ ពួកគេមិនបានស្តាប់អ្នកដោយយកចិត្តទុកដាក់នោះទេ។ ទន្ទឹមនឹងនេះ មនុស្សប្រភេទនេះឲ្យតែបានឃើញអ្នកណាម្នាក់ដែលខ្លួនចង់និយាយរក ខ្លួននឹងនិយាយកាត់ទៅកាន់អ្នកនោះភ្លាមៗ បើទោះបីជាអ្នកនោះកំពុងនិយាយជាមួយអ្នកផ្សេងក៏ដោយ។ ខុសពីមនុស្សមានអំនួត បុគ្គលដែលជឿជាក់ មិនចូលចិត្តនិយាយកាត់គេកាត់ឯងផ្តេសផ្តាសឡើយ ពោលគឺទុកឱកាសឲ្យអ្នកនិយាយចប់ចុងចប់ដើម ហើយប្រសិនបើខ្លួនចង់និយាយកាត់ នឹងលើកយកពាក្យសុំទោសមកនិយាយជាមុន។
៦.សួរអ្វីក៏ដឹង
អ្នកចិត្តវិទ្យានិយាយថា អំនួតដំណាងឲ្យភាពអសកម្ម និងភាពទន់ខ្សោយរបស់មនុស្សដែលចិត្តអួតអាង។ មនុស្សដែលពូកែអួតកម្រនឹងនិយាយថា "ខ្ញុំមិនដឹងទេ! ខ្ញុំមិនចេះ! ប៉ុន្តែចាំមើលខ្ញុំរកចម្លើយឲ្យ" ។ យ៉ាងណាក៏ដោយ សម្រាប់មនុស្សដែលជឿជាក់វិញ មិនលាក់បាំងកំហុសឆ្គង ឬ ចំណុចខ្សោយរបស់ខ្លួនឡើយ។ មនុស្សប្រភេទនេះសារភាពពីចំណុចខ្សោយរបស់ខ្លួន ហើយរៀនសូត្រកែប្រែចំណុចខ្វះខាតនោះ។
៧.គិតតែចង់ឈ្នះអ្នកដទៃ និងយកផលប្រយោជន៍តែម្នាក់ឯង
នេះជាចំណុចខ្សោយមួយទៀតរបស់មនុស្សមានអំនួត។ មិនថា ខ្លួនមានកំហុសឬអត់ទេ បើមិនបានយកឈ្នះអ្នកផ្សេងទៀត គឺខ្លួននៅមិនសុខឡើយ។ ជាមួយនឹងអត្តចរិតមិនចូលចិត្តស្តាប់ហេតុផល មនុស្សអួតអាងយល់ថា អ្វីៗដែលខ្លួនធ្វើសុទ្ធតែល្អជាង មានតម្លៃជាងអ្នកផ្សេងទៀត និងប្រមូលយកផលប្រយោជន៍តែម្នាក់ឯង។ ងាកមកមើលមនុស្សជឿជាក់វិញ នេះមិនមែនជារឿងសំខាន់ឡើយ។ អ្វីដែលសំខាន់សម្រាប់មនុស្សប្រភេទនេះ គឺលទ្ធផល និងប្រយោជន៍រួមសម្រាប់មនុស្សគ្រប់គ្នា។
៨.ច្រណែន និងចង់ឲ្យអ្នកដទៃបរាជ័យ
សម្រាប់មនុស្សដែលពូកែអួតអាង មើលមិនឃើញពីចំណុចខ្លាំងរបស់អ្នកផ្សេងឡើយ។ ពួកគេចូលចិត្តប៉ែងជើង ឬបន្ទាបបន្ថោកតម្លៃ ចូលចិត្តជាន់ពន្លិច និងសប្បាយចិត្តពេលឃើញអ្នកដែលល្អជាងខ្លួនបរាជ័យ។ បុគ្គលិកលក្ខណៈបែបនេះវាផ្ទុយទាំងស្រុងពីមនុស្សជឿជាក់ ដែលចូលចិត្តលើកតម្កើង និងអបអរពេលឃើញអ្នកផ្សេងជោគជ័យជាងខ្លួន។
៩.ចូលចិត្តស្តីបន្ទោសអ្នកដទៃ
ចំណុចមួយដែលគេសង្កេតឃើញមានជាទូទៅរបស់មនុស្សមានអំនួត គឺការមិនដែលទទួលស្គាល់កំហុសរបស់ខ្លួនម្តងណាឡើយ។ ជាជាងទទួលស្គាល់ ឬកែប្រែកំហុសរបស់ខ្លួន មនុស្សប្រភេទនេះគឺជាកំពូលមនុស្សដែលចូលចិត្តរិះគន់ និងចាំតែចាប់កំហុសអ្នកដទៃតែម្តង។ ដោយឡែកសម្រាប់មនុស្សជឿជាក់វិញ ការទទួលខុសត្រូវកំហុសរបស់ខ្លួនគឺជារឿងអាទិភាព។ មនុស្សប្រភេទនេះ ចេះកែប្រែកំហុស រៀនពីកំហុស ហើយកែប្រែកំហុសនោះទៅជាឱកាសមួយសម្រាប់កសាងសមត្ថភាពរបស់ខ្លួន៕
ប្រភព៖ theladders
