រឿងសម្ងាត់អ្វីខ្លះដែលអ្នកមិនគួរនិយាយទៅកាន់មិត្តរួមការងារ?
នៅកន្លែងការងារ មានរឿងរ៉ាវជាច្រើនដែល អ្នកមិនត្រូវរ៉ាយរ៉ាប់ប្រាប់អ្នករួមការងាររបស់អ្នកនោះឡើយ។ អ្នកតែងតែភ្លេចថា ដោយសារតែអ្នកទុកចិត្តអ្នករួមការងារណាម្នាក់ វាបានធ្វើឲ្យអ្នកបង្ហើបរឿងរ៉ាវសំខាន់ៗស្ទើរតែទាំងអស់។ អ្នកអាចគិតថា នៅ ពេលអ្នកនិយាយរឿងទាំងនោះចេញមក វាអាចធ្វើឲ្យអ្នកមានអារម្មណ៍ធូរស្បើយ ក៏ប៉ុន្តែអ្នកប្រហែលជាមិនបានគិតពីហានិភ័យដែលត្រឡប់មកវិញនោះឡើយ។
សូមគិតឡើងវិញ ហើយចូរក្រឡេកមើលបញ្ហាសំខាន់ៗជាច្រើនខាងក្រោមនេះដែលអ្នកមិនចាំបាច់និយាយប្រាប់ទៅក្រុមការងាររបស់អ្នកពីថ្ងៃនេះតទៅ៖
១. ហាមដាច់ខាតសួររឿងប្រាក់ខែ
មូលហេតុបង្ហាញថា អ្នកមិនមានលក្ខណៈវិជ្ជាជីវៈជាអ្នករួមការងារ ហើយម្យ៉ាងទៀតអាចធ្វើឲ្យមានការថ្នាំងថ្នាក់នៅក្នុងកន្លែងការងារប្រសិនបើអ្នកមានតំណែងដូចគ្នា ប៉ុន្តែទទួលបានប្រាក់ខែខុសគ្នា។
២. ពឹងពាក់ខ្ចីលុយមិនលោះខែ
ប្រសិនបើអ្នកភ្លេចកាបូបលុយមកកន្លែងការងារ ឬពឹងពាក់ខ្ចីលុយម្តងម្កាលពេលចាំបាច់ដូចជាទិញអាហារហូបចុកជាដើម វាមិនមែនជាបញ្ហានោះឡើយ។ ប៉ុន្តែបើអ្នកឧស្សាហ៍ខ្ចី លុយអ្នករួមការងារសឹងតែមិនលោះពេល សាកគិតទៅមើលប្រសិនបើជាអ្នក តើអ្នកមានអារម្មណ៍បែបណា?
៣. និយាយដើមអ្នករួមការងារ ឬចៅហ្វាយនាយ
ការនិយាយមិនល្អនៅពីក្រោយខ្នងអ្នករួមការងារ ឬ ចៅហ្វាយនាយទៅឲ្យអ្នកផ្សេងទៀតស្តាប់ មិនបង្ហាញថា អ្នកជាបុគ្គលិកមានក្រមសីលធម៌ និងគួរឲ្យគោរពនោះឡើយ។ ផ្ទុយទៅវិញ វាបង្ហាញថា អ្នកជាបុគ្គលិកមិនល្អជាងអ្នករួមការងារ ឬចៅហ្វាយនាដែលអ្នកនិយាយដើមទៅទៀត ហើយថ្ងៃណាមួយ អ្នកដែលអ្នកបាននិយាយប្រាប់ នឹងនិយាយដើមអ្នកឲ្យអ្នកផ្សេង ទៀតស្តាប់មិនខាន។
៤. និយាយរឿងចង់រកការងារនៅកន្លែងថ្មី
ការចែករំលែកព័ត៌មាននេះជាមួយអ្នករួមការងាររបស់អ្នក អាចធ្វើឲ្យពួកគេមានអារម្មណ៍ឃ្លាតឆ្ងាយពីអ្នក ហើយគិតថាអ្នកនឹងលែងជាផ្នែកមួយនៃក្រុមការងារតទៅទៀតដែលធ្វើឲ្យផលិតភាពការងារអាចនឹងធ្លាក់ចុះ។
៥. កុំនិយាយរឿងទំនាក់ទំនងស្នេហាផ្ទាល់ខ្លួនច្រើនពេក
រឿងទំនាក់ទំនងស្នេហាផ្ទាល់ខ្លួន វាមិនមែនជាប្រធានបទសំខាន់ដែលអ្នកយកទៅនិយាយប្រាប់អ្នករួមការងារនោះទេពីព្រោះថា វាប្រៀបដូចជាអ្នកនាំភ្លើងក្នុងរបស់អ្នកចេញទៅក្រៅដូច្នេះដែរ។ ម្យ៉ាងទៀត វាប៉ះពាល់ដល់អារម្មណ៍អ្នករួមការងារដែលកំពុងផ្តោតលើការងាររៀងៗខ្លួនទៀតផង។
៦. កុំប្រាប់ពីគម្រោងរបស់អ្នកចង់ប្តឹងក្រុមហ៊ុន
បើទោះបីជាពាក្យបណ្តឹងរបស់អ្នកត្រឹមត្រូវ ឬមិនត្រឹមត្រូវក៏ដោយ ការលេចធ្លាយព័ត៌មាននេះទៅកាន់មិត្តរួមការងារ មិនមែនជារឿងដ៏ល្អនោះឡើយ។ ពួកគេអាចនិយាយបន្តទៅកាន់អ្នកផ្សេងទៀតដែលធ្វើឲ្យបរិយាកាសក្រុមហ៊ុនកាន់តែអាប់អួ។ ជម្រើសដ៏ល្អ ប្រសិនបើអ្នកមិនសុខចិត្តនឹងចំណាត់ការអ្វីមួយរបស់ក្រុមហ៊ុន អ្នកគួរពិភាក្សាជាមួយមេធាវីរបស់អ្នក។
៧. កុំប្រាប់រឿងរ៉ាវដែលអ្នកលួចសម្ភារៈមួយចំនួនរបស់ក្រុមហ៊ុន
ដោយសារតែអ្នកបានលួចសម្ភារៈរបស់ក្រុមហ៊ុន ដូច្នេះអំពើនេះអ្នកច្បាស់ណាស់នឹងត្រូវបណ្តេញចេញពីក្រុមហ៊ុន ឬត្រូវបានចាត់ទុកថាជាបទល្មើសដែលនាំឲ្យមានបញ្ហាធំគ្រោះថ្នាក់ដល់ខ្លួនអ្នក។ ដូច្នេះ វាគ្មានបានប្រយោជន៍អ្វីដែលអ្នកត្រូវនិយាយប្រាប់រឿងនេះទៅកាន់អ្នករួមការងារនោះឡើយ។
៨. កុំនិយាយអ្នករួមការងារថា ជាមនុស្សនាំបញ្ហា
ប្រធានបទជាច្រើនដូចជា បញ្ហានយោបាយ ឬបញ្ហាផ្ទាល់ខ្លួនអាចត្រូវបាននិយាយនៅកន្លែងការងារ។ ដូច្នេះពេលខ្លះការលើកយកប្រធានបទទាំងនេះមកកន្លែងការងារពីអ្នករួមការងារ អាចធ្វើឲ្យបរិយាកាសការងារមានភាពអាប់អួ។ ក៏ប៉ុន្តែ អ្នកត្រូវនិយាយចំៗទៅអ្នករួមការងារជាមនុស្សនាំ បញ្ហានោះឡើយ។ វាបង្ហាញថា អ្នកជាមនុស្សគ្មានវិជ្ជាជីវៈ មិនចេះប្រើភាសាទំនាក់ទំនងដោយឆ្លាតវៃ។
ប្រភព៖ businessinsider
