រាជធានីភ្នំពេញ៖  ធនាគារ​ពាណិជ្ជកម្មក្រៅ​ប្រទេស​នៃ​កម្ពុជា (FTB)  បានរៀបចំពិធីអបអរខួបអនុស្សាវរីយ៍គម្រប់៣៩ឆ្នាំ ឈានចូល ៤០ឆ្នាំ របស់ខ្លួន នៅថ្ងៃទី ២៨ ខែ​ មករា ឆ្នាំ ២០១៩ នៅសណ្ឋាគារសូហ្វីតែលភ្នំពេញភូគីត្រា ក្នុងរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា និងដែលមានការអញ្ជើញចូលរួមដោយភាគទុនិក ក្រុមប្រឹក្សាភិបាល ថ្នាក់ដឹកនាំបុគ្គលិករ​បស់ធនាគារ ស្ថាប័នពាក់ព័ន្ធ ដៃគូធុរកិច្ច និង​ អតិថិជន ដែលជាភ្ញៀវកិត្តិយសជាតិ និង អន្តរជាតិ ។ ពិធីអបអរខួបអនុស្សាវរីយ៍ ៤០ឆ្នាំនេះ ត្រូវបានរៀបចំ និងប្រព្រឹត្តឡើង ក្នុង​អត្ថន័យ និងគោលបំណង ដើម្បីរំលឹក និងដឹងគុណ ដោយកតញ្ញុ តា​ធម៌ ដល់ស្ថាបនិក បុគ្គលិក មន្រ្តី ថ្នាក់ដឹកនាំធនាគារ ស្ថាប័នពាក់ព័ន្ធ ដៃគូធុរកិច្ច និងអតិថិជន ជាភ្ញៀវជាតិ និងអន្តរជាតិទាំងអស់ ដែលបាន​និងតែងតែគាំទ្រ និងជឿជាក់លើធនាគារពាណិជ្ជកម្មក្រៅប្រទេសនៃកម្ពុជា (FTB) កន្លងមក ។

ក្នុងនាមជាធនាគារពាណិជ្ជដំបូង និងនាំមុខគេ ក្នុងប្រទេសកម្ពុជាចាប់តាំងពីឆ្នាំ១៩៧៩ ធនាគារ​ពាណិជ្ជកម្មក្រៅ​ប្រទេស​នៃ​កម្ពុជា (FTB) បានដើរតួនាទី យ៉ាងសំខាន់ក្នុងការចូលរួមលើកកម្ពស់ និងអភិវឌ្ឍទីផ្សារ សេដ្ឋកិច្ច និងសង្គមជាតិ តាមរយៈការជម្រុញ គាំទ្រ និងជួយផ្តល់សេវាហិរញ្ញវត្ថុជាមូលដ្ឋានចាំបាច់ដល់អតិថិជន អាជីវករ និងពាណិជ្ជករក្នុងស្រុក ។​

ផ្អែកលើមូលដ្ឋានគ្រឹះអាជីវកម្មដ៏រឹងមាំ សមិទ្ធផលជាច្រើន បទពិសោធន៍ក្នុងដំណើរការចូលរួមជួយអភិវឌ្ឍទីផ្សារ និងសេដ្ឋកិច្ចជាតិរយៈពេល៣៩ឆ្នាំកន្លងមកនេះ និងជាមួយទំហំទ្រព្យសកម្មសរុបរបស់ធនាគារដែលបានកើនឡើងជាង ១,០០០​លានដុល្លារ ធនាគារ​ពាណិជ្ជកម្មក្រៅ​ប្រទេស​នៃ​កម្ពុជា (FTB) បានកំណត់ទិសដៅអាជីវកម្មរយៈពេលវែងមួយច្បាស់លាស់ក្រោមចក្ខុវិស័យដើម្បីជំរុញអោយធនាគារ​ពាណិជ្ជកម្មក្រៅប្រទេសនៃកម្ពុជា (FTB) ក្លាយជាធនាគារពាណិជ្ជដែលទទួលបានការពេញចិត្តជាងគេនៅក្នុងព្រះរាជាណាចក្រកម្ពុជា ។

ស្របតាមទិសដៅអភិវឌ្ឍន៍វិស័យធនាគារ និងហិរញ្ញវត្ថុរបស់ធនាគារជាតិ នៃកម្ពុជា និងដើម្បីឈានសម្រេចបាននូវទិសដៅរយៈពេលវែងដែលបានកំណត់ ធនាគារពាណិជ្ជកម្មក្រៅប្រទេស នៃកម្ពុជា (FTB)​ នឹងបន្តពង្រីកសកម្មភាពប្រតិបត្តិការបស់ខ្លួន និងលើកកម្ពស់កម្រិតស្តង់ដារផ្តល់សេវាកម្ម ផលិតផលថ្មីៗ ដែលជាដំណោះស្រាយហិរញ្ញវត្ថុដ៏សមស្របជូនដល់អតិថិជន និងទីផ្សារ ។ ទន្ទឹមគ្នានេះ ធនាគារពាណិជ្ជកម្មក្រៅប្រទេស នៃកម្ពុជា (FTB) ក៏នឹងបន្តចូលរួមយ៉ាងសកម្មក្នុងការជួយលើកស្ទួយការប្រើ​ប្រាស់ប្រាក់រៀល និងបន្តដើរតួនាទីសំខាន់របស់ខ្លួនក្នុងការចូលរួមជួយអភិវឌ្ឍ លើកកម្ពស់ទីផ្សារ សេដ្ឋកិច្ចជាតិ និងជួយគាំទ្រអតិថិជនដៃគូក្នុងស្រុកទាំងអស់ ឲ្យ​កាន់​​តែរីកចម្រើនថែមទៀត អោយស្របទៅតាមគន្លង និងទិសដៅអភិវឌ្ឍន៍សេដ្ឋកិច្ចជាតិ របស់រាជរដ្ឋាភិបាល ៕