ភ្នំពេញ៖ ហាងកាហ្វេដ៏ល្បីឈ្មោះ ដែលមានដើមកំណើតនៅក្នុងប្រទេសសិង្ហបុរី តាំងពីឆ្នាំ១៩១៩ ឈ្មោះ “Killiney Kopitiam” បានបើកសាខាទី១របស់ខ្លួន នៅក្នុងប្រទេសកម្ពុជាហើយ​ កាលពីព្រឹកថ្ងៃទី១៧ ខែមករា ឆ្នាំ២០១៩នេះ​ ដែលមានទីតាំងនៅជាន់ផ្ទាល់ដីនៃសណ្ឋាគារ Lumiere ។

ហាងកាហ្វេ “Killiney Kopitiam” បានចាប់ផ្ដើមដំបូងបំផុត មានទីតាំងស្ថិតនៅលើផ្លូវដ៏មមាញឹកឈ្មោះ “Killiney” នៃប្រទេសសិង្ហបុរី នៅក្នុងឆ្នាំ១៩១៩។​ ហាងកាហ្វេបែបប្រពៃណី ហៃណាន  ល្បីឈ្មោះ ១០០ឆ្នាំ គឺដោយសារតែ រសជាតិនៃកាហ្វេ និងតែ ឆុងឡើងតាមបែបបុរាណ ដ៏ឈ្ងុយឆ្ងាញ់។​ ពិសេសជាងនេះទៅទៀតគឺ នំប៉័ងអាំង​។

ផលិតផលដែលហាងកាហ្វេ “Killiney Kopitiam” ផ្ដល់ជូន បានធ្វើឲ្យអតិថិជនជាប់ចិត្ត មិនអាចបំភ្លេចបាន និងហាក់បីដូចបានរំលឹក នូវអនុស្សាវរីយ៍ចាស់ៗឡើងវិញ។

លោក Woon Tek Seng នាយកក្រុមហ៊ុន Killiney International និងជាស្ថាបនិកស្លាកសញ្ញាពាណិជ្ជកម្ម “Killiney Kopitiam” បានលើកឡើងថា៖ “ខ្ញុំមានកិត្តិយស និងសេចក្តីរីករាយជាខ្លាំង នៅពេលហាងសាខាក្រោមស្លាកសញ្ញាពាណិជ្ជកម្ម ដែលខ្ញុំបង្កើតឡើង បើកដំណើការជាបន្តបន្ទាប់ ដែលរហូតមកដល់ពេលបច្ចុប្បន្ននេះ មានជាង ១០០សាខា នៅក្នុងស្រុក និងនៅក្នុងប្រទេសចំនួន ៦ ហើយនឹងមានច្រើនឡើងបន្ថែមទៀត នាពេលខាងមុខ។”

បច្ចុប្បន្ននេះ “Killiney Kopitiam” បានបង្កើតផលិតផល និងមុខម្ហូបរបស់ខ្លួនជាច្រើនបន្ថែមទៀត សម្រាប់ផ្ដល់ជូនអតិថិជនរបស់ខ្លួន គ្រប់ស្រទាប់ និងគ្រប់វ័យទាំងអស់៕