បញ្ហាប្រឈមមុខធំៗ ដ៏គួរឲ្យភ័យខ្លាច ១០យ៉ាង ពិភពលោកនឹងជួបនៅក្នុងឆ្នាំ២០៥០ ខាងមុខ
ថ្វីត្បិតគេរំពឹងទុកថា ពិភពលោកនឹងមានការអភិវឌ្ឍជាងនេះ នៅក្នុងឆ្នាំ ២០៥០ ខាងមុខក៏ដោយ ក៏ការស្រាវជ្រាវនានាបានធ្វើការវាយតម្លៃផងដែរថា បញ្ហាប្រឈមនានាក៏នឹងកើតមានទន្ទឹមនឹងគ្នានេះ។ តើបញ្ហាទាំងនោះមានអ្វីខ្លះ? សូមតាមដានដូចតទៅ៖
១.ប្រជាជនរស់នៅទីក្រុងនឹងកើនឡើង ៣ដង នៅក្នុងឆ្នាំ ២០៥០ ខាងមុខ ប្រជាជនសាកលលោកដែលរស់នៅជនបទ ត្រូវបានគេវាយតម្លៃថា នឹងមានត្រឹមតែ ៧៥០ លាននាក់ប៉ុណ្ណោះ ខណៈដែលពេលបច្ចុប្បន្នចំនួននេះមានរហូតដល់ទៅជាង ៤ពាន់លាននាក់។ នោះមានន័យថា ប្រជាជន ៦,៣ លាននាក់ផ្សេងទៀត នឹងប្រមូលផ្តុំគ្នារស់នៅតាមទីក្រុងនានា។ កំណើនប្រជាជនច្រើនលើសលប់រស់នៅទីក្រុងនឹងនាំមកនូវជំងឺកាចសាហាវ វីរុសថ្មីៗ តម្រូវការថាមពលខ្ពស់ ប្រឈមបញ្ហាទឹកប្រើប្រាស់ និងការបំពុលបរិស្ថានកាន់តែធ្ងន់ធ្ងរឡើង។
២.ជាតិពុលក្នុងបរិយាកាសកើនឡើងកាន់តែខ្លាំង បង្កឲ្យមានជំងឺសួត និងជំងឺផ្លូវដង្ហើមធ្ងន់ធ្ងរ គេវាយតម្លៃថា មនុស្ស ៦ លាននាក់ជារៀងរាល់ឆ្នាំ នឹងស្លាប់ដោយសារតែជំងឺបង្កឡើងពីការបំពុលបរិយាកាស ដែលកើតចេញពីផ្សែងពុលពីរោងចក្រឧស្សាហកម្ម រថយន្ត និងពីលំនៅឋានប្រជាជន។ នេះធ្វើឲ្យប៉ះពាល់ដល់ផ្លូវដង្ហើម ប្រជាជនប្រឈមមុខជំងឺសួត និងផ្លូវដង្ហើមកាន់តែធ្ងន់ធ្ងរ ខណៈដែលកំដៅផែនដីនឹងកើនឡើងជាបន្តបន្ទាប់។
៣.ជាងពាក់កណ្តាលប្រជាជនសាកលលោកនឹងគ្មានទឹកប្រើប្រាស់គ្រប់គ្រាន់ នៅពេលបច្ចុប្បន្ន ប្រជាជនសាកលលោក ១,១ ពាន់លាននាក់មិនទាន់មានទឹកប្រើប្រាស់គ្រប់គ្រាន់នៅឡើយ ខណៈដែលប្រជាជន ២,៥ ពាន់លាននាក់ផ្សេងទៀតកំពុងរស់នៅក្នុងតំបន់គ្មានទឹក។ នៅឆ្នាំ ២០៥០ ខាងមុខ ចំនួនអ្នកគ្មានទឹកប្រើប្រាស់គ្រប់គ្រាន់នឹងកើនឡើង ២ ពាន់លាននាក់ ខណៈដែលមនុស្ស ៥ ពាន់លាននាក់ផ្សេងទៀត នឹងរស់នៅតំបន់តំបន់គ្មានទឹកប្រើប្រាស់។
៤.ប្រភេទត្រីដែលមនុស្សលោកបរិភោគសព្វថ្ងៃនឹងវិនាសផុតពូជ អង្គការសហប្រជាជាតិបានរកឃើញថា ត្រី ៨៧% ដែលយកមកទទួលទាននៅជុំវិញពិភពលោកសព្វថ្ងៃត្រូវបានធ្វើអាជីវកម្មនេសាទយ៉ាងធ្ងន់ធ្ងរ។ ប្រសិនបើបញ្ហានេះនៅតែបន្តកើតមានតទៅទៀត ត្រីដែលលោកអ្នកធ្លាប់ឃើញនៅក្នុងចានម្ហូបរបស់អ្នករៀងរាល់ថ្ងៃនោះ នឹងផុតពូជនៅក្នុងរយៈពេលជាង ៣០ ឆ្នាំក្រោយ។
៥.មនុស្សរាប់លាននាក់នឹងប្រឈមមុខការអត់អាហារ រៀងរាល់ទសវត្ស ការកើនឡើងកម្តៅផែនដីបានធ្វើឲ្យប៉ះពាល់ដល់ផលិតកម្មស្បៀងអាហារដែលកាត់បន្ថយផលិតផលស្បៀងប្រមាណ ២% នៅជុំវិញពិភពលោក។ នៅក្នុងឆ្នាំ ២០៥០ ខាងមុខ ការកើនឡើងកម្តៅផែនដីនឹងកាត់បន្ថយផលិតផលស្បៀងកើនឡើង ១០% ខណៈដែលចំនួនប្រជាជននឹងកើនឡើងបន្ថែមទៀតដែលជាហេតុធ្វើឲ្យប្រជាជនរាប់លានអ្នកនឹងប្រឈមមុខខ្វះស្បៀង។
៦.ព្រៃឈើនឹងប្រឈមការវិនាសបាត់បង់កាន់តែធ្ងន់ធ្ងរឡើង យោងតាមរបាយការណ៍របស់សារព័ត៌មាន International Journal of Climatology បានវាយតម្លៃថា ព្រៃឈើជិតពាក់កណ្តាលនៃព្រៃឈើសរុបដែលមានសព្វថ្ងៃនឹងបាត់បង់ពីផែនដីយើងនេះ។ នេះដោយសារតែសកម្មភាពកាប់បំផ្លាញព្រៃឈើ ការធ្វើអាជីវកម្មឈើខុសច្បាប់ និងការទន្ទ្រានដីធ្វើកសិកម្ម ដែលឈានទៅរកការវិនាសហាន់ហោចនៃសត្វព្រៃផងដែរ។
៧.មនុស្ស ១០លាននាក់នឹងស្លាប់ជារៀងរាល់ឆ្នាំដោយសារតែបាក់តេរីថ្មីៗ បច្ចុប្បន្នមនុស្ស ៧ សែននាក់បានស្លាប់ជារៀងរាល់ឆ្នាំដោយសារតែមេរោគបាក់តេរីនៅលើចំណីអាហារ និងផលិតផលកសិកម្មដូចជា សត្វ បន្លែផ្លែឈើជាដើម។ នេះដោយសារតែពួកគេបានប្រើប្រាស់សារធាតុគីមីដើម្បីបង្កើនផលិតកម្ម ហើយនៅក្នុងឆ្នាំ ២០៥០ មនុស្ស ១០ លាននាក់នឹងបាត់បង់ជីវិតជារៀងរាល់ឆ្នាំ។
៨.ព្យុះសង្ឃរា Hurricane នឹងកើតឡើងជាញឹកញាប់ និងបង្កគ្រោះមហន្តរាយកាន់តែធ្ងន់ធ្ងរជាងមុន ព្យុះសង្ឃរា Hurricane ដែលភាគច្រើនគេឃើញកើតមានឡើងនៅលើទឹកដីអាមេរិក ត្រូវគេរំពឹងថា វានឹងកើតឡើងកាន់តែច្រើនទៅៗ និងកាន់តែសាហាវជាងមុន។ គេរំពឹងថា នៅក្នុងឆ្នាំ ២០៥០ខាងមុខ ក្មេងៗជំនាន់ក្រោយនឹងភ្លក់រសជាតិព្យុះសង្ឃរានេះ យ៉ាងហោចណាស់ក៏ ២០ ដងដែរក្នុងមួយជីវិតរបស់ពួកគេ ខណៈដែលព្យុះនេះនឹងមានកម្លាំងកាន់តែខ្លាំងលើសព្យុះ Hurricane បច្ចុប្បន្ន ដល់ទៅ ៣០០% ក្នុងឆ្នាំ ២០៥០ និង ២១០០% នៅក្នុងឆ្នាំ ២១០០។
៩.ទីក្រុងធំៗមួយចំនួននឹងត្រូវលិចទឹក ផែនដីឡើងកម្តៅ គឺបានផ្តល់ផលប្រយោជន៍ដ៏អស្ចារ្យធ្វើឲ្យតំបន់ប៉ូលទាំងពីរដែលគ្រប់ដណ្តប់ដោយទឹកកក នឹងត្រូវរលាយបន្តិចម្តងៗ។ នេះនឹងធ្វើឲ្យនីវ៉ូទឹកសមុទ្រកើនឡើង ហើយទីបំផុតវានឹងលេបត្របាក់ទីក្រុងធំៗមួយចំនួនដែលនៅជាប់មាត់សមុទ្រដូចជា ទីក្រុងញីវយ៉ក Calcutta និងទីក្រុងផ្សេងៗទៀតនៅអឺរ៉ុបឲ្យគ្របដណ្តប់ទៅដោយផ្ទៃទឹក។
១០.ពិភពលោករស់នៅក្នុងភាពខ្មៅងងឹតជាមួយជំងឺថ្មីៗគ្មានថ្នាំព្យាបាល ជំងឺប្លែកៗគ្មានថ្នាំព្យាបាលជាច្រើនទៀតដូចជាជំងឺ Ebola ឬ ផ្ដាសាយបក្សីដែលយើងធ្លាប់ជួបកន្លងមកមានលក្ខណៈកាចសាហាវបង្កឡើងពីបរិយាកាសផែនដីឡើងកម្តៅ ការបំពុលបរិស្ថាន ព្រមទាំងវត្តមានប្រភេទគីមីសព្វបែបយ៉ាងនៅក្នុងចំណីអាហារ នឹងធ្វើឲ្យពិភពលោកជួបរឿងឈឺក្បាលនៅក្នុងឆ្នាំ ២០៥០ ខាងមុខ។ គេរំពឹងថា ក្នុងករណីមានជំងឺថ្មីដ៏កាចសាហាវកើតមានឡើងដោយមិនបានថ្នាំបង្ការជាមុននោះ ជីវិតមនុស្សរាប់លានអ្នកនឹងអាចស្លាប់បាត់បង់ក្នុងមួយប៉ប្រិចភ្នែក៕
ប្រភព៖ businessinsider
