អ្នកជំនាញចិត្តសាស្រ្តការងារលោក រ៉េត ធារុម៖កុំជ្រើសរើសបុគ្គលិកតាមរយៈការលម្អៀងផ្នែកចិត្តរំភើប
បុគ្គលិកប្រៀបដូចជាសរសៃឈាមរបស់ក្រុមហ៊ុន ដូច្នេះការជ្រើសរើសបុគ្គលិក គឺជារឿងសំខាន់ណាស់ប្រសិនបើយើងជ្រើសរើសបុគ្គលិកខុសនោះ នៅក្នុងក្រុមហ៊ុន និងជួបប្រទះនូវបញ្ហានិងការរាំងស្ទះមិនខាន។ លោក រ៉េត ធារុម (RET Thearom) សាស្រ្តាចារ្យផ្នែកចិត្តវិទ្យា បានលើកឡើងនៅក្នុងកម្មវិធី វេទិកាអ្នកគ្រប់គ្រងធនធានមនុស្សកម្ពុជានៅឯសណ្ឋាគារ The Great Duke Phnom Penh កាលពីពេលថ្មីៗនេះថា អ្នកគ្រប់គ្រងធនធានមនុស្សមិនគួរជ្រើសរើសបុគ្គលិកទៅតាមការលម្អៀងផ្នែកចិត្តរំភើបរបស់ខ្លួននោះទេ។
សាស្រ្តាចារ្យរូបនេះបានលើកឡើងថា អំឡុងពេលសម្ភាសន៍ការងារគឺជាពេលដ៏សំខាន់ ដែលអ្នកគ្រប់គ្រងធនធានមនុស្សគួរមានជំនាញនៅក្នុងការសង្កេត ដោយត្រូវចេះមើលទៅលើ អាកប្បកិរិយា ការសម្ដែង និងការនិយាយ ត្រូវព្យាយាមកុំឲ្យមានការលម្អៀងផ្នែកចិត្តរំភើបដែលគេហៅថា Subjectivity គឺត្រូវព្យាយាមស្ដាប់ហើយកុំធ្វើការវាយតម្លៃឬសន្និដ្ឋានភ្លាមៗពេក។ ជួនកាលអ្នកខ្លះជ្រើសរើសយកបុគ្គលិកម្នាក់ ដោយសារតែការពេញចិត្ត អត្តចរិតរបស់គេ ឬមួយបុគ្គលម្នាក់ហ្នឹងមានមុខមាត់ដូចគ្រួសារឬសាច់ញាត្តិរបស់ខ្លួនជាដើមដោយមិនបានគិតអំពីភាពសក្ដិសមនៅក្នុងតួនាទីការងារនោះឡើយ។
ការនេះ ធ្វើឲ្យគាត់ជ្រើសរើសយកបុគ្គលនោះ មកធ្វើជាបុគ្គលិក ដោយមានការលម្អៀងផ្នែកចិត្ តរំភើប ដោយយើងមិនបានវិភាគនិងវាយតម្លៃដោយផ្អែកទៅលើហេតុផលរួម ទ្រឹស្ដីឬវិជ្ជាជីវៈនោះឡើយ។ អ្នកជំនាញរូបនេះ បានបន្តទៀតថា មូលហេតុដែលនាំឲ្យមានការលម្អៀងផ្នែកចិត្តរំភើបច្រើនជាងគេគឺដោយសារតែពេលខ្លះអ្នកគ្រប់គ្រងធនធានមនុស្សឬអ្នកសម្ភាន៍ការងារអាចមានសម្ពាធការងារដែលធ្វើឲ្យពួកគាត់ មានទំនោរសួរតែសំណួរបិទរូមជាមួយការលម្អៀងផ្នែកចិត្តរំភើបផង រួចធ្វើការវិនិច្ឆ័យទៅលើបុគ្គលិក ដែលជាមូលហេតុដែលធ្វើឲ្យមានកំហុសឆ្គងកើតឡើង ឧទាហរណ៍ គាត់ជាមនុស្សមិនពូកែនិយាយស្ដីប៉ុន្តែតួនាទីការងាររបស់គាត់ គឺមិនទាក់ទងនឹងមនុស្សដែលពូកែនិយាយស្ដីនោះទេ។
លោកបានបន្ថែមទៀតថា មនុស្សម្នាក់ៗមានការយល់ឃើញខុសៗគ្នាអាស្រ័យទៅតាមបទពិសោធន៍នៃការរស់នៅ ដូច្នេះមនុស្សមួយចំនួន មានទំនោរនិយាយច្រើនជាងស្ដាប់ ហើយនិយាយលើកខ្លួនឯងនិយាយការពារខ្លួនឯងជាងអ្នកដទៃ តាមពិតមនុស្សមិនមានល្អឬអាក្រក់នោះទេប៉ុន្តែទង្វើរបស់គាត់គឺឆ្លុះបញ្ចាំងពីយន្តការការពារខ្លួនរបស់ពួកគាត់ដែលធ្វើឲ្យគាត់ត្រូវបានគេទទួលយកឬមិនត្រូវបានគេទទួលយកនៅក្នុងស្ថានភាពណាមួយជាក់លាក់ជាដើម។ ដូច្នេះយើងត្រូវព្យាយាមស្ដាប់និងសង្កេតឲ្យបានហ្មត់ចត់នោះយើងនិងអាចមើលឃើញពីធម្មជាតិនៃបាតុភូតផ្លូវចិត្តរបស់គាត់។
ដើម្បីកុំឲ្យមានភាពលម្អៀងផ្នែកចិត្តរំភើបយើងត្រូវផ្ដោតទៅលើការវាយដោយផ្អែកលើ Objectivity ដែលជាការវាយតម្លៃដោយផ្ដោតទៅលើគោលការណ៍ជារួមទូទៅ ដោយយើងវាយតម្លៃថាអាចជ្រើសរើសយកឬមិនជ្រើសយកបុគ្គលណាម្នាក់ មកធ្វើការគឺដោយផ្នែកលើហេតុផលនិងការសម្អាងត្រឹមត្រូវ សួរនូវសំណួរដែលមានទម្រង់បើក និងព្យាយាមស្ដាប់គាត់ឲ្យបានច្រើន ពិសេសគឺប្រើក្រសែភ្នែកនិងចលនាភ្នែកដើម្បីសង្កេត។
សាស្រ្តាចារ្យផ្នែកចិត្តវិទ្យា លោក រ៉េត ធារុម៖ «នៅក្នុងមជ្ឈដ្ឋានការងារ អ្នកត្រូវជឿថា មនុស្សនៅតែជាមនុស្ស កុំមើលមនុស្សតែសំបកក្រៅ»៕
អត្ថបទ៖ ជួប ស្រីរ័ត្ន
