រោគសញ្ញាទាំង ៨យ៉ាងដែលជាការដាស់តឿនថានរណាម្នាក់មានជំងឺវង្វេងភ្លេចភ្លាំង
ជំងឺវង្វេងភ្លេចភ្លាំងច្រើនតែកើតឡើងចំពោះមនុស្សចាស់។ អ្នកជំងឺដែលមានជំងឺនេះតែងមានការចងចាំចុះខ្សោយ ដែលមានផលប៉ះពាល់ដល់ជីវិតរស់នៅប្រចាំថ្ងៃរបស់ពួកគាត់។ បើយោងតាមគេហទំព័រ www.alz.org ខាងក្រោមនេះគឺជារោគសញ្ញាទាំង៨យ៉ាងដែលជាការដាស់តឿនថានរណាម្នាក់មានជំងឺវង្វេងភ្លេចភ្លាំង៖
១) បាត់បង់ការចងចាំដែលប៉ះពាល់ដល់ការរស់នៅរបស់គាត់ ដូចជាភ្លេចពីព័ត៌មានទាំងឡាយដែលទើបនឹងទទួលដឹងថ្មីៗ ភ្លេចពីថ្ងៃខែឬព្រឹត្តិការណ៍សំខាន់ៗ និងសាកសួរព័ត៌មានដដែលៗម្ដងហើយម្ដងទៀត
២) មានការលំបាកនៅក្នុងការបង្កើនផែនការនិងដោះស្រាយបញ្ហា ពិបាកនៅក្នុងការផ្ចង់ស្មារតីធ្វើកិច្ចការផ្សេងៗ និងចំណាយពេលធ្វើកិច្ចការអ្វីៗយូរជាងមុន
៣) វង្វេងមិនដឹងថាខ្លួនឯងកំពុងនៅទីណា និងភ្លេចថាមកដល់ទីនោះដោយរបៀបណា
៤) ពិបាកនៅក្នុងការអាន ស្មានពីចម្ងាយ និងកំណត់ដឹងពីពណ៌ផ្សេងៗ ដែលអាចផ្ដល់ជាបញ្ហាដល់ពួកគេក្នុងការបើកបរបាន
៥) ជួនកាលពួកគេបញ្ឈប់ការនិយាយនៅពាក់កណ្ដាលនៃការសន្ទនា ហើយមិនដឹងថាត្រូវនិយាយបន្តទៀតដោយរបៀបណា ឬក៏អាចនិយាយសារដើមឡើងវិញ។ ពួកគេក៏អាចហៅឈ្មោះវត្ថុផ្សេងៗខុសដែរ។
៦) មិនចំណាំកន្លែងដែលខ្លួនឯងបានទុកដាក់វត្ថុ
៧) ចៀសវាងពីសកម្មភាពនៅក្នុងសង្គម ដកខ្លួនចេញពីសកម្មភាពដែលពួកគេធ្លាប់ចូលចិត្តធ្វើនៅពេលទំនេរ
៨) ផ្លាស់ប្ដូរបុគ្គលិកលក្ខណៈ ពួកគេអាចក្លាយជាវង្វេង សង្ស័យ ធ្លាក់ទឹកចិត្ត ភ័យខ្លាច អន្ទះអន្ទែង និងឆាប់ខឹង៕
ដោយ៖ ស្រីពៅ
