ហេតុអ្វីអ្នកគួរឈប់ទទួលទានទឹកសូដា?
ទឹកសូដាឬទឹកក្រូចកំប៉ុង បានក្លាយជាភេសជ្ជៈដ៏ពេញនិយមមួយប្រភេទដែលជាទីចំណង់ចំណូលចិត្តរបស់មនុស្សជាច្រើននៅជុំវិញពិភពលោក។ ប៉ុន្តែ ការសិក្សាជាច្រើនសុទ្ធតែបានអះអាងពីផលវិបត្តិដ៏ច្រើនរបស់វាចំពោះសុខភាពរបស់អ្នកទទួលទាន និងបានណែនាំឲ្យបញ្ឈប់ការទទួលទានភេសជ្ជៈនេះទៀតផង។ តើទឹកសូដាឬទឹកក្រូចកំប៉ុងនេះមានគុណវិបត្តិអ្វីខ្លះ ដែលអ្នកគួរឈប់ទទួលទាន ?
១) ធ្វើឲ្យអ្នកបាត់បង់ជីវជាតិបំប៉នសំខាន់ៗ៖ អ្នកដែលទទួលទានទឹកសូដាច្រើនជាជាងភេសជ្ជៈដែលនាំឲ្យសុខភាពល្អដូចជាទឹកដោះគោនិងទឹកផ្លែឈើស្រស់ជាដើម ច្រើនតែខ្វះវីតាមីនA កាល់ស្យូម និងម៉ាញេស្យូម។ ម្យ៉ាងទៀត ទឹកសូដាទាំងនោះសុទ្ធតែមានអាស៊ីដផូស្វ័រិចជាសារធាតុផ្សំ ដែលអាស៊ីដនេះមានឥទ្ធិពលទៅបំផ្លាញជាតិកាល់ស្យូមនិងម៉ាញេស្យូមនៅក្នុងរាងកាយរបស់អ្នកឲ្យបាត់បង់បាន ដែលជីវជាតិបំប៉នទាំងពីរនេះឯងដែលបានគាំទ្រដល់ប្រព័ន្ធភាពស៊ាំរបស់អ្នកឲ្យដំណើរការល្អ។ កាលដែលទទួលទានទឹកសូដាក៏មិនបានផ្ដល់នូវជីវជាតិបំប៉នអ្វីសោះឡើយក្រៅតែពីរសជាតិឆ្ងាញ់របស់វាសម្រាប់មនុស្សមួយចំនួនធំ។
២) ងាយនឹងកើតជំងឺទឹកនោមផ្អែម៖ សូដាផ្ទុកនូវសារធាតុផ្អែមមួយប្រភេទដែលមានឈ្មោះថា high-fructose corn syrupដែលត្រូវបានគេរកឃើញទំនាក់ទំនងវាជាមួយនឹងជំងឺជាច្រើន ជាពិសេសគឺជំងឺធាត់លើសទម្ងន់និងជំងឺទឹកនោមផ្អែម។ សារធាតុនេះអាចនាំទៅឲ្យមានការផលិតឡើងរបស់ពពួករ៉ាឌីកាល់សេរី ដែលនាំឲ្យមានទំនាក់ទំនងជាមួយនឹងការខូចខាតជាលិកា និងការវិវត្តនៃជំងឺទឹកនោមផ្អែម។
៣) វាមានអាស៊ីដផូស្វ័រិចជាធាតុផ្សំ៖ ដូចបានរៀបរាប់ក្នុងចំណុចទី១ បើកាលណាអាស៊ីដផូស្វ័រិចធ្វើឲ្យកាល់ស្យូមរិចរិល នោះលទ្ធផលពីការខ្វះជាតិកាល់ស្យូមនៅក្នុងរាងកាយនឹងនាំឲ្យឆ្អឹងរបស់អ្នកពុកផុយជាងមុន ឬកើតជំងឺពុកឆ្អឹង និងពុកធ្មេញ។ លើសពីនេះ អាស៊ីដនេះក៏ទៅរំខានជាមួយនឹងអាស៊ីដនៅក្នុងក្រពះរបស់អ្នក ដែលអាចបណ្ដាលឲ្យមានការរាំងស្ទះដល់ការស្រូបយកសារធាតុបំប៉ន និងពន្យឺតដំណើរការរំលាយអាហារផងដែរ។
៤) ជាតិស្ករនៅក្នុងសូដាមានកម្រិតច្រើនខ្លាំង៖ សូដា១កំប៉ុងមានបរិមាណស្ករ១០ស្លាបព្រាកាហ្វេឯណោះ។ នៅពេលអ្នកទទួលយកជាតិស្ករក្នុងបរិមាណនេះចូលក្នុងរាងកាយរបស់អ្នកក្នុងទម្រង់ជាទឹករាវបែបនេះ វានឹងធ្វើឲ្យកម្រិតជាតិស្ករក្នុងឈាមរបស់អ្នកកើនឡើងខ្លាំង និងបណ្ដាលឲ្យមានប្រតិកម្មអាំងស៊ុយលីននៅក្នុងរាងកាយ ដែលជាស្ថានភាពមួយដែលធ្វើឲ្យអ្នកជំងឺទឹកនោមផ្អែមសន្លប់ឬវង្វេងស្មារតីនៅពេលលើសឈាម៕
ដោយ៖ ស្រីពៅ សូមអាន៖ រោគសញ្ញាដែលអាចបញ្ជាក់ថា អ្នកប្រឈមមុខនឹងកំណើនជាតិស្ករក្នុងឈាម
