ទម្លាប់ ៤យ៉ាង ដែលអាចជួយអ្នកឲ្យបង្កើនប្រសិទ្ធភាពការងាររបស់អ្នកបាន
កិច្ចការច្រើនអាចធ្វើឲ្យអ្នករងសម្ពាធ និងមានភាពតានតឹង ដែលជាមូលហេតុបណ្ដាលឲ្យប្រសិទ្ធភាពការងាររបស់អ្នកចុះខ្សោយបាន។ បើអ្នកកំពុងតែស្វែងរកវិធីបែបណាដើម្បីបង្កើនប្រសិទ្ធភាពការងាររបស់អ្នកខណៈពេលអ្នកមានការងារត្រូវបំពេញច្រើន នោះទម្លាប់ទាំង៤យ៉ាងខាងក្រោមនេះអាចផ្ដល់ជាគន្លឹះខ្លះៗសម្រាប់អ្នកបាន៖
១) រៀបចំទុកដាក់តុធ្វើការរបស់អ្នកឲ្យមានរបៀបរៀបរយ៖ ប្រយោជន៍នៃភាពមានរបៀបរៀបរយនៅលើតុធ្វើការរបស់អ្នក ជួយឲ្យអារម្មណ៍របស់អ្នកមានរបៀបរៀបរយទៅតាមនោះដែរ និងធ្វើឲ្យអ្នកផ្ចង់ស្មារតីបានល្អ និងស្រឡះមុខមាត់។ បើនៅលើតុធ្វើការរបស់អ្នកពោរពេញដោយឯកសារជាច្រើន នោះវានឹងធ្វើឲ្យអ្នកនឹកឃើញដល់កិច្ចការជាច្រើនទៀតដែលមិនទាន់សម្រេចរួច ហើយអ្នកក៏មិនអាចផ្ចង់ស្មារតីបានល្អចំពោះកិច្ចការកំពុងនៅនឹងមុខ។ ហេតុនេះ អ្នកគួររៀបចំតុធ្វើការរបស់អ្នកយ៉ាងណាឲ្យមានចន្លោះទូលាយច្រើន និងមានសណ្ដាប់ធ្នាប់រៀបរយល្អ។
២) លៃលកចំណាយពេល៩០នាទីសម្រាប់កិច្ចការណាដែលជាអាទិភាពសម្រាប់អ្នក៖ មិនថាពេញមួយថ្ងៃរបស់អ្នកពោរពេញដោយកិច្ចការរវល់មមាញឹកប៉ុណ្ណាក៏ដោយ អ្នកគួរចេះលៃលកពេលវេលា២០%នៃពេលវេលាពេញមួយថ្ងៃរបស់អ្នក ដែលអាចស្មើនឹង៩០នាទី ទៅលើកិច្ចការណាដែលជាអាទិភាពសម្រាប់អ្នកបំផុត។ កិច្ចការនោះអាចជាការទទួលទានអាហារពេលព្រឹកជាមួយក្រុមគ្រួសារ ឬជាពេលវេលាសម្រាប់ការហាត់ប្រាណជាដើម។
៣) ឆ្លៀតពេលសម្រាកគេងពេលថ្ងៃត្រង់៖ ការសម្រាកគេងពេលថ្ងៃត្រង់ អាចជួយជម្រះខួរក្បាលរបស់អ្នកពីភាពស្មុគស្មាញទាំងឡាយដែលអ្នកជួបប្រទះពេញមួយព្រឹកពីកន្លែងធ្វើការ។ ហេតុនេះនៅពេលអ្នកក្រោកពីគេងវិញ នោះអ្នកនឹងមានភាពស្រស់ស្រាយជាងមុនដើម្បីចាប់ផ្ដើមការងាររបស់អ្នកបន្តទៀតប្រកបដោយប្រសិទ្ធភាពខ្ពស់។
៤) ចេញក្រៅដើម្បីស្រូបខ្យល់អាកាស៖ អ្នកមិនគួរអង្គុយនៅកន្លែងធ្វើការរហូតនោះទេ ព្រោះវាអាចធ្វើឲ្យអារម្មណ៍របស់អ្នកកាន់តែតានតឹងនិងអាប់អួ។ ផ្ទុយទៅវិញ អ្នកគួរតែឆ្លៀតពេញចេញទៅស្រូបខ្យល់អាកាសនិងទទួលកម្ដៅថ្ងៃខ្លះនៅខាងក្រៅ ដើម្បីបន្ធូរអារម្មណ៍អ្នកឲ្យល្អឡើងវិញ៕
ដោយ៖ ស្រីពៅ អត្ថបទទាក់ទង៖ តើមូលហេតុអ្វីខ្លះ ដែលអាចប៉ះពាល់ដល់ការគេងរបស់អ្នក មិនឲ្យលង់លក់ស្កប់ស្កល់បាន?
