គន្លឹះ ៣យ៉ាងសម្រាប់ការរស់នៅដែលអាចយកមកប្រើប្រាស់នៅក្នុងជីវិតការងារ
ជីវិតផ្ទាល់ខ្លួននិងការងារត្រូវតែមានតុល្យភាពនឹងគ្នា នោះទើបអ្នកអាចមានភាពរីករាយនៅក្នុងជីវិតបាន។ ខាងក្រោមនេះគឺជាគន្លឹះ៣យ៉ាងសម្រាប់ការរស់នៅដែលអាចយកមកប្រើប្រាស់នៅក្នុងជីវិតការងារបាន៖
១) បង្ហាញពីចំណាប់អារម្មណ៍របស់អ្នកចំពោះអ្នកដទៃ៖ ការបង្ហាញពីចំណាប់អារម្មណ៍របស់អ្នកចំពោះអ្នកដទៃ វាបង្ហាញថាអ្នកបានឲ្យតម្លៃទៅលើពួកគេ ហើយវានឹងនាំអ្នកឲ្យទទួលបានការស្រឡាញ់រាប់អានពីមនុស្សជុំវិញខ្លួន ងាយនឹងទទួលបានការស្ដាប់ពីមនុស្សដែលអ្នកដឹកនាំ និងទទួលបានមិត្តភាពជាច្រើនផងដែរ។ មុននឹងចែករំលែកពីព័ត៌មានផ្ទាល់ខ្លួនឬក៏បទពិសោធន៍របស់អ្នក អ្នកគួរតែសាកសួរពួកគេពីរឿងរ៉ាវផ្ទាល់ខ្លួនរបស់គេជាមុនសិន ដែលនេះគឺជាវិធីដ៏ល្អមួយក្នុងការបង្ហាញពីចំណាប់អារម្មណ៍របស់អ្នកចំពោះពួកគេ។
២) អនុញ្ញាតឲ្យខ្លួនឯងបរាជ័យ៖ ជាជាងសម្លឹងមើលចំណុចអវិជ្ជមាននៅក្នុងការបរាជ័យដែលអ្នកមិនអាចសម្រេចអ្វីៗទៅតាមបំណងបាន អ្នកគួរតែសម្លឹងមើលចំណុចវិជ្ជមានដែលការបរាជ័យទាំងនោះបានផ្ដល់ជាបទពិសោធន៍មេរៀនសម្រាប់អ្នកនៅក្នុងជីវិត។ ហេតុនេះ បើអ្នកបានជួបការបរាជ័យ អ្នកគួរតែរៀនបើកចិត្តឲ្យទូលាយដើម្បីទទួលយកមេរៀនដែលកំពុងតែមកបង្រៀនអ្នក ហើយពង្រឹងកម្លាំងចិត្តរបស់ខ្លួនឯងឲ្យរឹងមាំដើម្បីចាប់ផ្ដើមម្ដងទៀត។
៣) ដឹងថាពេលណាត្រូវនិយាយថា«ទេ»៖ នៅពេលដែលអ្នកទទួលយកនូវការទទួលខុសត្រូវដែលលើសពីលទ្ធភាពដែលខ្លួនអាចធ្វើទៅរួច នោះអ្នកមិនត្រឹមតែធ្វើឲ្យប៉ះពាល់ដល់ប្រសិទ្ធភាពការងាររបស់អ្នកប៉ុណ្ណោះទេ តែវាអាចក្លាយជាសម្ពាធដ៏ធ្ងន់មួយដែលអាចប៉ះពាល់ដល់បញ្ហាផ្លូវចិត្តផងដែរ បន្ទាប់មកក៏នឹងប៉ះពាល់ដល់ទំនាក់ទំនងរវាងអ្នកជាមួយមិត្តរួមការងារទៀត។ ដូច្នេះបើសិនជាអ្នកប្រមើលមើលឃើញថាការទទួលខុសត្រូវនោះលើសពីលទ្ធភាពរបស់អ្នក អ្នកគួរតែស្នើសុំថ្នាក់លើរបស់អ្នកឲ្យទុកពេលច្រើនជាងនេះទៅតាមកាលកំណត់ណាមួយ៕
ដោយ៖ ស្រីពៅ អត្ថបទទាក់ទង៖ ៣យ៉ាងអំពីភាពជាអ្នកដឹកនាំរបស់អ្នកនិពន្ធដ៏ល្បី លោក Simon Sinek
