ទម្លាប់ទាំង ៣យ៉ាងដែលមានឥទ្ធិពល ដល់សុខភាពផ្លូវចិត្តរបស់អ្នក
ថ្មីៗនេះ មានមនុស្សជាច្រើនកំពុងមានវិបត្តិផ្លូវចិត្ត ដែលធ្វើឲ្យអ្នកខ្លះមានជំងឺបាក់ទឹកចិត្តនិងអាចឈានទៅដល់ការសម្លាប់ខ្លួនថែមទៀតផង។ ម៉្យាងវិញទៀត តាមការសិក្សាមួយបានរកឃើញថា សុខភាពផ្លូវចិត្តមានសារៈសំខាន់ដូចសុខភាពផ្លូវកាយដូចគ្នា។ ប៉ុន្តែ មិនសូវមានមនុស្សដឹងពីរបៀបក្នុងការព្យាបាលជំងឺផ្លូវចិត្តនោះទេ។ ខាងក្រោមនេះ ជាទម្លាប់ប្រចាំថ្ងៃដែលអ្នកអាចធ្វើបាន តែវាអាចជួយឲ្យសុខភាពផ្លូវចិត្តរបស់អ្នកល្អប្រសើរជាងមុន៖
១) ការតាំងសមាធិ៖ អ្នកប្រហែលជាធ្លាប់ដឹងពីសារប្រយោជន៍នៃការតាំងសមាធិហើយ។ ប៉ុន្តែ អ្នកប្រហែលជានៅមិនធ្លាប់សាកល្បងនៅឡើយទេ។ ការតាំងសមាធិ ជួយឲ្យអារម្មណ៍របស់អ្នកបានស្ងប់ ជួយអ្នកឲ្យមានកម្លាំងចិត្តឡើងវិញពេលអ្នកជួបការលំបាក ជួយឲ្យមិនគិតខ្លី។ បន្ថែមពីលើនេះ ការតាំងសមាធិឲ្យជួយកាត់បន្ថយស្ត្រេសនិងមានកម្លាំងទឹកចិត្តឡើងវិញ។ បានអានហើយឬនៅ? Sigmund Freud បុគ្គលដំបូងគេដែលត្រួសត្រាយផ្លូវឆ្ពោះទៅកាន់ការព្យាបាលអ្នកជំងឺផ្លូវចិត្ត
២) ការធ្វើលំហាត់ប្រាណ៖ ការហាត់ប្រាណ ត្រូវបានគេស្គាល់ថា ជាកត្តាមួយដែលជួយឲ្យមានសុខភាពល្អ មិនថាទាំងផ្លូវកាយនិងផ្លូវចិត្ត។ តាមការសិក្សាខ្លះ ក៏បានរកឃើញ លំហាត់ប្រាណអាចប្រយុទ្ធប្រឆាំងនឹងជំងឺធ្លាក់ទឹកចិត្តល្អជាងថ្នាំប្រឆាំងនឹងជំងឺធ្លាក់ទឹកចិត្ត (antidepressants)។
៣) ការប្រើប្រាស់ទូរស័ព្ទដៃ៖ ពិតណាស់ថា ទូរស័ព្ទដៃផ្តល់នូវផលប្រយោជន៍ជាច្រើនដល់ជីវិតអ្នក ដូចជាជួយឲ្យអ្នករក្សាទំនាក់ទំនងនឹងមិត្តបើទោះបីជានៅឆ្ងាយគ្នាក្តី ហើយអ្នកក៏អាចអានព័ត៌មានតាមទូរស័ព្ទដៃ។ល។ ប៉ុន្តែ តាមការសិក្សាដែលធ្វើដោយសាកលវិទ្យាល័យ(univeristy) Gothenburg បានរកឃើញថា ការប្រើប្រាស់ទូរស័ព្ទដៃក៏អាចប៉ះពាល់ដល់សុខភាពផ្លូវចិត្តផងដែរ។ វាអាចធ្វើឲ្យអ្នកស្ត្រេស មានជំងឺបាក់ទឹកចិត្តហើយគេងមិនលក់ស្រួលថែមទៀតផង៕
ដោយ៖ មុយយូ
