តើធ្វើដូចម្ដេចទើបអាចផ្ទេរការងារទៅឲ្យកូនចៅធ្វើដោយមានប្រសិទ្ធភាពបាន?
ការចេះផ្ទេរការងារទៅឲ្យនរណាម្នាក់ដែលអាចជាសមាជិកក្រុមការងារ ឬជាបុគ្គលិកកូនចៅរបស់អ្នក ដើម្បីឲ្យពួកគេធ្វើជំនួសអ្នក ពិតជាមានសារសំខាន់ណាស់។ បើអ្នកចេះផ្ទេរការងារបានត្រឹមត្រូវ នោះវាជួយអ្នកបានច្រើនដូចជាចំណេញពេលវេលា កសាងការជឿទុកចិត្តគ្នារវាងអ្នកជាមួយនឹងកូនចៅ ហ្វឹកហាត់និងអភិវឌ្ឍសមត្ថភាពរបស់កូនចៅ និងធ្វើឲ្យប្រយោជន៍ជារួមបានល្អប្រសើរ។ តើធ្វើដូចម្ដេចទើបអាចផ្ទេរការងារទៅឲ្យកូនចៅធ្វើដោយមានប្រសិទ្ធភាពបាន ?
១) ស្វែងរកបុគ្គលិកម្នាក់ណាដែលស័ក្ដិសមសម្រាប់ការទទួលខុសត្រូវក្នុងកិច្ចការនោះ៖ ចំណុចសំខាន់ៗមួយចំនួនដែលអ្នកត្រូវគិតគូរមុនពេលសម្រេចចិត្តផ្ទេរការទទួលខុសត្រូវចំពោះកិច្ចការអ្វីមួយទៅឲ្យបុគ្គលិកណាម្នាក់ នោះគឺជាសមត្ថភាពរបស់គេ ឆន្ទៈរបស់គេក្នុងការរៀនសូត្រអ្វីថ្មីៗ របៀបនៃការបំពេញកិច្ចការរបស់គេ និងចំណាប់អារម្មណ៍ជាពិសេសរបស់គេ។ គេគួរតែជាមនុស្សដែលអាចបង្រៀនហ្វឹកហាត់បាននិងពោរពេញដោយជំនក់ចិត្តក្នុងកិច្ចការនោះ។ ប៉ុន្តែអ្នកក៏ត្រូវគិតគូរពីចំណុចមួយទៀតថាតើមនុស្សម្នាក់នោះមានកិច្ចការរវល់កម្រិតណាដែរ ពុំនោះទេអ្នកអាចនឹងដាក់សម្ពាធទៅលើគេមិនខាន។
២) មានភាពប្រាកដប្រជាចំពោះគោលបំណងនៃកិច្ចការដែលអ្នកដាក់ឲ្យគេ៖ មនុស្សយើងនៅពេលដែលដឹងថាអ្វីដែលខ្លួនត្រូវតស៊ូនឹងការលំបាកទាំងឡាយគឺដើម្បីគោលបំណងសម្រេចឲ្យបាននូវអ្វីមួយដែលមានអត្ថន័យ នោះពួកគេប្រាកដជាខិតខំពុះពារជាមួយនឹងការលំបាកទាំងនោះដោយការតាំងចិត្តដ៏រឹងមាំជាក់ជាពុំខាន។ ហេតុនេះ អ្នកត្រូវតែបញ្ជាក់ប្រាប់ពួកគេពីគោលបំណងនៃកិច្ចការដែលអ្នកបានផ្ទេរឲ្យគេនោះផង។ ជាងនេះទៅទៀត អ្នកក៏ត្រូវតែប្រាប់ពួកគេផងដែរពីមូលហេតុដែលអ្នកបានរើសយកគេជាអ្នកទទួលខុសត្រូវនៅក្នុងកិច្ចការមួយនោះ ព្រោះវានឹងកសាងនូវទំនុកចិត្តនិងកម្លាំងចិត្តដល់ពួកគេនៅក្នុងការបំពេញកិច្ចការនោះឲ្យអ្នកដោយអស់ពីកម្លាំងកាយនិងចិត្ត។
៣) បង្ហាញនូវការគាំទ្ររបស់អ្នកចំពោះពួកគេ៖ ក្នុងនាមជាអ្នកដឹកនាំមួយរូប វាជារឿងសំខាន់ណាស់ដែលអ្នកត្រូវចំណាយពេលវេលារបស់អ្នកដើម្បីបង្ហាញនូវការគាំទ្ររបស់អ្នកចំពោះបុគ្គលិក ជាពិសេសគឺជាជំនួយដែលពួកគេអាចនឹងត្រូវការពីអ្នកនៅអំឡុងពេលបំពេញកិច្ចការនេះឲ្យអ្នក។ ប៉ុន្តែអ្នកក៏ត្រូវចៀសវាងនូវការគ្រប់គ្រងបែបតូចចង្អៀតពេក ដូចជាអ្នកដឹកនាំមួយចំនួនដែលចូលចិត្តត្រួតត្រាដំណើរការនិងលទ្ធផលការងាររបស់កូនចៅនៅគ្រប់ដំណាក់កាលដូច្នោះឯង។ អ្នកគួរតែទុកចន្លោះឲ្យបានច្រើនសម្រាប់ពួកគេនៅក្នុងការបំពេញកិច្ចការនោះ ហើយស្នើឲ្យពួកគេផ្ដល់ជាមតិយោបល់របស់ពួកគេឬជាជំនួយដែលពួកគេត្រូវការពីអ្នកវិញ នោះទើបពួកគេអាចធ្វើការអស់ពីសមត្ថភាពនិងភាពច្នៃប្រឌិតរបស់ពួកគេបាន៕
ប្រភព៖ lifehack.com ប្រែសម្រួល៖ ស្រីពៅ
