រោគសញ្ញាដែលអ្នកអាចជួបប្រទះ នៅពេលអ្នកទទួលទានជាតិកាល់ស្យូមមិនគ្រប់គ្រាន់
រាងកាយរបស់អ្នកត្រូវការកាល់ស្យូមជាចម្បងគឺដើម្បីរក្សាឆ្អឹងនិងធ្មេញរបស់អ្នកឲ្យរឹងមាំ ហើយវាក៏ចាំបាច់ដល់ដំណើរការណ៍សាច់ដុំ ការបញ្ជូនសញ្ញារបស់ប្រព័ន្ធប្រសាទ និងការបញ្ចេញអ័រម៉ូនផងដែរ។ អ្នកចាំបាច់ត្រូវទទួលទានជាតិកាល់ស្យូមឲ្យបានគ្រប់គ្រាន់ជាប្រចាំ ហេតុនេះបើសិនជាអ្នកខ្វះជាតិកាល់ស្យូម នោះអ្នកអាចនឹងជួបរោគសញ្ញាដូច៣ចំណុចខាងក្រោមនេះ៖
១) អ្នកបាក់ឆ្អឹងក្រោយពីជួបហេតុការណ៍គ្រោះថ្នាក់បន្តិចបន្តួចសោះ៖ បើគ្រាន់តែជាហេតុការណ៍គ្រោះថ្នាក់បន្តិចបន្តួចដូចជាបន្ទាប់ពីដួលជាដើម ឆ្អឹងត្រង់តំបន់ណាមួយរបស់រាងកាយអ្នកក៏ស្រាប់តែបាក់ នោះវាអាចជាសញ្ញាមួយបញ្ជាក់ថាអ្នកខ្វះជាតិកាល់ស្យូម ហើយឆ្អឹងរបស់អ្នកនឹងបាត់បង់ជាតិកាល់ស្យូមបន្តិចម្ដងៗនៅពេលមនុស្សឈានចូលដល់វ័យ៣០ឆ្នាំឡើងទៅ។ ហេតុនេះហើយបើសិនជាអ្នកមិនបានទទួលទានជាតិកាល់ស្យូមឲ្យបានគ្រប់គ្រាន់ទេ នោះរាងកាយរបស់អ្នកនឹងចាប់ផ្ដើមរំញោចឆ្អឹងរបស់អ្នកឲ្យបញ្ចេញជាតិកាល់ស្យូមដែលវាបានស្តុកទុកឲ្យចេញមក ហើយធ្វើឲ្យឆ្អឹងរបស់អ្នកប្រែជាទន់ខ្សោយបន្តិចម្ដងៗ។
២) សម្ពាធឈាមរបស់អ្នកឡើងខ្ពស់៖ មានការសិក្សាមួយចំនួនបានរកឃើញពីទំនាក់ទំនងគ្នានៅពេលជាតិកាល់ស្យូមត្រូវបានទទួលទានគ្រប់គ្រាន់ជាមួយនឹងការថយចុះហានិភ័យពីការកើនឡើងសម្ពាធឈាម នេះបើយោងតាមស្ថាប័នសុខភាពជាតិឬ National Institutes of Health របស់អាមេរិក។
៣) ជួបប្រទះអាការរមួលសាច់ដុំជាញឹកញាប់៖ បើអ្នកឧស្សាហ៍មានបញ្ហារមួលសាច់ដុំជាញឹកញាប់ នោះវាក៏អាចជាសញ្ញាបញ្ជាក់ពីកង្វះជាតិកាល់ស្យូមនៅក្នុងរាងកាយរបស់អ្នកដែរ។ ដោយសារតែកាល់ស្យូមសំខាន់សម្រាប់ចលនាសាច់ដុំរបស់អ្នក ហេតុនេះបើអ្នកខ្វះជាតិកាល់ស្យូមខ្លាំង វាអាចធ្វើឲ្យអ្នកមានបញ្ហាកន្ត្រាក់សាច់ដុំបាន៕
ប្រភព៖ rd.com ប្រែសម្រួល៖ ស្រីពៅ
