រោគសញ្ញាដែលអាចបញ្ជាក់ថា អ្នកប្រឈមមុខនឹងកំណើនជាតិស្ករក្នុងឈាម
ការកើនឡើងជាតិស្ករក្នុងឈាមរយៈពេលវែង អាចបំផ្លាញដល់សរសៃឈាម សរសៃប្រសាទ និងសរីរាង្គក្នុងរាងកាយ។ ម្យ៉ាងទៀតបើអ្នកមានទម្លាប់ទទួលទានអាហារដែលមានកម្រិតជាតិស្ករខ្ពស់ច្រើន នោះអ្នកមិនត្រឹមតែប្រឈមមុខនឹងហានិភ័យពីជំងឺធាត់តែប៉ុណ្ណោះទេ តែអាហារទាំងនោះក៏ជាកាតាលីករដ៏មានប្រសិទ្ធភាពបំផុតមួយសម្រាប់ជំរុញឲ្យមានជំងឺដទៃទៀតកើតឡើងដូចជា ជាតិកូឡេស្តេរ៉ុលឡើងខ្ពស់ ជំងឺបេះដូង ជំងឺដាច់សរសៃឈាមក្នុងខួរក្បាល ជំងឺហឺត និងរោគសញ្ញាផ្សេងៗដែលពាក់ព័ន្ធជាមួយនឹងបញ្ហាប្រព័ន្ធរំលាយអាហារផងដែរ។
ចំពោះរោគសញ្ញាវិញ អ្នកដែលអាចមានបញ្ហាកើនឡើងជាតិស្ករក្នុងឈាមស្ថិតក្នុងកម្រិតស្រាលឬមិនមែនអ្នកជំងឺទឹកនោមផ្អែម អាចនឹងជួបរោគសញ្ញាចម្បងៗចំនួន៥ដូចជាឆាប់អស់កម្លាំង បង្កើនចំណង់ក្នុងការទទួលទានអាហារ ឆាប់ស្រេកទឹក បត់ជើងតូចញឹកញាប់ និងស្រកទម្ងន់។
យ៉ាងណាមិញ បើសិនជាអាការជំងឺរបស់អ្នកឈានដល់ដំណាក់កាលមធ្យមនិងធ្ងន់ធ្ងរ រោគសញ្ញាចម្បងៗចំនួន ៥ដែលអ្នកអាចមានមានដូចជា សមត្ថភាពក្នុងការមើលរបស់អ្នកចុះខ្សោយឬស្រវាំងភ្នែក អស់កម្លាំងល្ហិតល្ហៃនិងពិបាកក្នុងការក្រោកពីគេង ស្រេកទឹកខ្លាំងញឹកញាប់ ស្បែកស្ងួត និងវិលមុខធេងធោងរកដួលសន្លប់។
លើសពីនេះទៀត បើសិនជាអ័រម៉ូនអាំងស៊ុយលីនរបស់អ្នកមិនត្រូវបានផលិតគ្រប់គ្រាន់ក្នុងរាងកាយ ដែលអាំងស៊ុយលីននេះមាននាទីសំខាន់ក្នុងការកម្រិតជាតិស្កររបស់អ្នកមិនឲ្យខ្ពស់ពេកនិងមិនឲ្យទាបពេក នោះអ្នកអាចនឹងមានរោគសញ្ញាបន្ថែមលើសពីរោគសញ្ញាចម្បងៗខាងលើទៀតដូចជា ឈឺចុកចាប់ពោះវៀន បាត់បង់ចំណង់ក្នុងការទទួលទាន ចង្វាក់បេះដូងដើរលឿនខុសប្រក្រតី ដកដង្ហើមញាប់ និងក្អួតផងដែរ។
បើអ្នកសង្កេតឃើញថាអ្នកមានរោគសញ្ញាដូចបានរៀបរាប់មកនេះ អ្នកគួរតែទៅពិគ្រោះជាមួយគ្រូពេទ្យដើម្បីបញ្ជាក់ពីស្ថានភាពសុខភាពរបស់អ្នកឲ្យបានជាក់លាក់៕
ប្រភព៖ powerofpositivity ប្រែសម្រួល៖ ស្រីពៅ
