ជំនឿខុសឆ្គងដ៏ពេញនិយមចំនួន ៣ដែលអ្នកអាចធ្លាប់មានចំពោះបញ្ហាសុខភាព
ព័ត៌មានខុសឬមិនមានលក្ខណៈពេញលេញផ្សព្វផ្សាយបានឆាប់រហ័សណាស់ ហើយវាកាន់តែឆាប់រហ័សទៅទៀតនៅពេលចូលទៅដល់អ្នកទាំងឡាយណាដែលទទួលយកវាដោយមិនបានគិតពិចារណាជាមុន និងធ្វើការស្រាវជ្រាវបន្ថែមដោយខ្លួនឯងទៀត។ ខាងក្រោមនេះគឺជាជំនឿខុសឆ្គងចំនួន៣ពាក់ព័ន្ធនឹងបញ្ហាសុខភាព ដែលថ្វីត្បិតតែវាអាចជាបញ្ហាតូចតាចធម្មតា ប៉ុន្តែវាក៏ជាការល្អដែរដែលអ្នកបានដឹងអំពីវានោះ៖
១) ទទួលទានទឹកឲ្យបាន៨កែវជារៀងរាល់ថ្ងៃ៖ តាមពិតទៅវាមិនសំខាន់អ្វីនៅត្រង់បរិមាណទឹក៨កែវក្នុង១ថ្ងៃដែលអ្នកត្រូវទទួលទានដើម្បីឲ្យមានសុខភាពល្អនោះឡើយ។ ផ្ទុយទៅវិញតើទឹក៨កែវនេះចង់សំដៅទៅលើកែវទំហំប៉ុណ្ណា មានរង្វាស់ប៉ុន្មាន ព្រោះថា៨កែវអាចនឹងស្មើនឹង២លីត្រ ៣លីត្រឬដល់៥លីត្រក៏មានដែរ។ នៅពេលអ្នកពិសាទឹកច្រើនពេក វានឹងធ្វើឲ្យដំណើរការណ៍កោសិការបស់អ្នកបាត់បង់តុល្យភាពរបស់វាទៅវិញទេ។ ជាលទ្ធផលកម្រិតសូដ្យូមរបស់អ្នកអាចនឹងធ្លាក់ចុះ ហើយបើកាលណាវាធ្លាក់ចុះ អ្នកនឹងមានអារម្មណ៍ឆាប់អស់កម្លាំង វង្វេងវង្វាន់ និងកាន់តែធ្ងន់ធ្ងរគឺត្រូវដឹកទៅមន្ទីរពេទ្យជាបន្ទាន់។ ដំបូន្មានដ៏ល្អគឺ ពិសាទឹកតែពេលណាដែលរាងកាយរបស់អ្នកឲ្យសញ្ញាថាស្រេកគឺជាការប្រសើរបំផុតហើយ។
២) អ្នកអាចនឹងឆ្លងមេរោគវីរុសតាមរយៈអាកាសធាតុត្រជាក់បាន៖ ជាការពិតណាស់ដែលឃ្លាដែលអ្នកតែងតែឮថា ត្រូវពាក់សំលៀកបំពាក់ឲ្យក្រាស់ៗដើម្បីការពារកុំឲ្យផ្ដាសាយ។ នេះក៏ព្រោះតែពពួកវីរុសតែងតែលូតលាស់ធំធាត់និងបង្កបង្កើតបានរហ័សនិងមានអំណោយផលបំផុតនៅពេលសីតុណ្ហភាពត្រជាក់។ យ៉ាងណាមិញបើអ្នកមិនទៅប៉ះផ្ទាល់ជាមួយមនុស្សទាំងឡាយណា ដែលបានកណ្ដាស់ឬឆ្លងមេរោគវីរុសនេះហើយទេ នោះគ្រាន់តែអាកាសធាតុត្រជាក់ក៏មិនមែនចេះតែអាចធ្វើឲ្យមេរោគវីរុសចូលមករាតត្បាតបង្កជំងឺផ្ដាសាយក្នុងរាងកាយអ្នកដែរ។
៣) ឆ្លុះពិនិត្យមើលឆ្អឹងជង្គង់ដោយម៉ាស៊ីនMRI៖ ការទៅពេទ្យដើម្បីឲ្យគេថតឆ្លុះពិនិត្យមើលឆ្អឹងដោយម៉ាស៊ីនMRI គឺជាការចំណាយដ៏ច្រើនមួយ ហើយក៏អាចជាការខ្ជះខ្ជាយដ៏មិនចាំបាច់នោះដែរ។ ការឈឺជង្គង់អាចមានមូលហេតុមកពីរឿងធម្មតានោះទេ សូម្បីតែមានពេលខ្លះអ្នកធ្វើអ្វីឲ្យប៉ះទង្គិចឬរបួសត្រូវជង្គង់អ្នកតែបន្តិចក៏ដោយ ក៏គ្រោងឆ្អឹងជង្គង់របស់អ្នកអាចខូចទម្រង់ដើមរបស់វាបានដែរ ហើយបញ្ហានេះកាន់តែកើតឡើងជាញឹកញាប់ទៅទៀតនៅពេលអាយុអ្នកកាន់តែច្រើនទៅ។ ហេតុនេះបើគ្រាន់តែជាការឈឺចុករោយធម្មតាទេ អ្នកគួរតែព្យាបាលដោយវិធីសាស្ត្រសាមញ្ញៗបែបធម្មជាតិ លុះត្រាតែអ្នកពិតជាត្រូវការព័ត៌មានអំពីជង្គង់របស់អ្នកខ្លាំង ដូចជាមុនពេលធ្វើការវះកាត់ជង្គង់ជើងជាដើម សឹមអ្នកថតឆ្លុះដោយម៉ាស៊ីនMRIនេះ៕
ប្រភព៖ quickanddirtytips.com
ប្រែសម្រួល៖ ស្រីពៅ
