សំណួរ៣យ៉ាងដែលអ្នកត្រូវរៀនស្វែងយល់ពីខ្លួនឯង
ការស្គាល់ខ្លួនឯង គឺជាភាពខ្លាំងរបស់អ្នក។ ការសួរសំណួរល្អនឹងធ្វើឲ្យអ្នកអាចត្រួតពិនិត្យមើលខ្លួនឯងនិងស្វែងយល់ពីខ្លួនឯងបានកាន់តែច្បាស់លាស់ និងស៊ីជម្រៅ។ ការសួរសំណួរល្អប្រៀបដូចជាការណ៍ដែលអ្នកបានស្គាល់អំពីបញ្ហាណាមួយបានជាក់ច្បាស់ដូច្នោះ។ ការស្គាល់បញ្ហាណាមួយដែលអ្នកកំពុងតែប្រឈមមុខបានច្បាស់លាស់ សំខាន់ខ្លាំងជាងការដឹងពីដំណោះស្រាយដែលត្រូវប្រើប្រាស់ទៅទៀត។ តើសំណួរបែបណាខ្លះដែលអាចជួយឲ្យអ្នកស្វែងយល់ពីខ្លួនអ្នកបាន និងអាចនាំអ្នកទៅកាន់ជីវិតមួយដែលអ្នកតែងប្រាថ្នាសម្រេចឲ្យបាន ?
១) តើអ្នកកំពុងតែដើរនៅលើផ្លូវត្រូវដែរទេ ? ៖ ផ្លូវដែលមានមនុស្សដើរច្រើន មិនមែនសុទ្ធតែមានន័យថាជាផ្លូវត្រឹមត្រូវ ឯផ្លូវដែលមិនសូវមានមនុស្សដើរ ក៏មិនមែនសុទ្ធតែមានន័យថាជាផ្លូវខុសនោះដែរ។ ចំនួនមិនអាចបញ្ជាក់ពីភាពខុសនិងត្រូវបាននោះទេ។ អ្នកត្រូវចេះរិះគិតវិភាគដោយខ្លួនឯង ថាតើផ្លូវណាមួយដែលគិតថាត្រឹមត្រូវ និងជាផ្លូវដែលអ្នកចង់ដើរពិតប្រាកដ ? តើអ្វីទៅទើបសំខាន់និងមានតម្លៃពិតប្រាកដសម្រាប់ជីវិតរបស់អ្នក ? តើអ្វីទៅទើបជានិយមន័យនៃភាពជោគជ័យនិងសេចក្ដីសុខសម្រាប់អ្នកពិតប្រាកដ ?
២) តើអ្នកគិតយ៉ាងដូចម្ដេចចំពោះកំហុសខុសឆ្គងដែលអ្នកធ្លាប់បានសាង ? ៖ ការយល់ឃើញដែលអ្នកមានចំពោះភាពបរាជ័យនិងការសាងកំហុសឆ្គង ពិតជាមានភាពសំខាន់ជាខ្លាំង ព្រោះវាគឺជាកត្តាដ៏សំខាន់មួយដែលចូលរួមចំណែកនៅក្នុងភាពជោគជ័យនិងសេចក្ដីសុខក្នុងជីវិតរបស់អ្នក។ អ្នកមិនអាចមានជីវិតវិជ្ជមានបានចេញពីផ្នត់គំនិតអវិជ្ជមានដែលអ្នកតែងរស់នៅជាមួយនោះទេ។ ការសាងកំហុសឆ្គងប្រសើរលើសពីការណ៍ដែលមិនបានសាកល្បងធ្វើវាទាល់តែសោះ ព្រោះថាបើទោះជាអ្នកមិនបានសម្រេចជោគជ័យក៏ដោយ យ៉ាងហោចណាស់ក៏អ្នកអាចរៀនសូត្របានអ្វីម្យ៉ាងពីបទពិសោធន៍មួយនោះដែរ។
៣) តើអ្នកបានប្រឹងប្រែងអស់ពីលទ្ធភាពដែរទេ ? ៖ ដែនកំណត់គ្រាន់តែស្ថិតនៅក្នុងការគិតរបស់អ្នកតែប៉ុណ្ណោះ។ បើសិនជាមនុស្សម្នាក់ចង់បានអ្វីមួយពិតប្រាកដ នោះគេប្រាកដពុះរំលងភ្នំជ្រោះដើម្បីសម្រេចវាឲ្យទាល់តែបានជាក់ជាពុំខានឡើយ។ អ្វីដែលសំខាន់គឺស្ថិតនៅត្រង់ចរិតរបស់គេ ដែលជាភាពអត់ធ្មត់ ការខិតខំប្រឹងប្រែង និងពេលវេលាយូរឬឆាប់នោះឯង។ ម្យ៉ាងទៀត អ្នកក៏ត្រូវចាំថា បញ្ហាមួយមិនមែនមានវិធីដោះស្រាយតែមួយផ្លូវនោះទេ។ ដូច្នេះបើវិធីសាស្ត្រដែលអ្នកប្រើប្រាស់មិនអាចប្រើការបាន អ្នកត្រូវប្ដូរវិធីសាស្ត្រនោះចេញ តែមិនគួរបោះបង់ចោលនូវគោលដៅចម្បងរបស់អ្នកនោះឡើយ៕
