គួរប្រើវិធីសាស្ត្រយ៉ាងណា ដើម្បីបញ្ចៀសការខ្វែងគំនិតគ្នា និង ជម្លោះតានតឹងក្នុងគ្រួសារ?
តើអ្នកធ្លាប់មានអារម្មណ៍ថា មនុស្សដែលកាន់តែនៅក្បែរអ្នកបំផុត គឺជាមនុស្សដែលកាន់តែពិបាកនិយាយឲ្យយល់ពីចិត្តគ្នាបំផុតទេ ? ជាពិសេសនៅពេលអ្នកមានរឿងត្រូវចរចាជាមួយគ្រួសាររបស់អ្នក ? តាមពិតទៅមនុស្សរស់នៅក្រោមដំបូលផ្ទះតែមួយ និងកើតចេញពីពូជពង្សវង្សត្រកូលឈាមតែមួយ មិនប្រាកដថាការគិតរបស់ពួកគេគឺដូចៗគ្នាទាំងអស់នោះទេ។
ភាពខុសគ្នាស្ថិតនៅត្រង់ថាមនុស្សម្នាក់ៗមើលឃើញរូបភាពផ្សេងគ្នាទៅលើបញ្ហាតែមួយ ប៉ុន្តែអ្វីដែលដូចគ្នានោះគឺនរណាម្នាក់ក៏ត្រូវការឲ្យអ្នកដទៃយល់ពីខ្លួនដែរ។ នៅពេលអ្នកយល់ពីចំណុចនេះ ភាពខុសគ្នារបស់អ្នកនិងគ្រួសារនឹងអាចឈានទៅរកចំណុចមួយប្រសព្វរួមគ្នាបាន។
អ្នកនិពន្ធសៀវភៅដ៏ល្បីមួយ ដែលមានចំណងជើងថា "The 7 Habits of Highly Successful People" និងមានប្រែសម្រួលជាភាសាខ្មែរផងដែរក្រោមចំណងជើងថា "ឧបនិស្ស័យទាំង៧ប្រការរបស់បុគ្គលឆ្នើម" របស់លោក Stephen Covey គាត់ធ្លាប់បានពោលថា៖ "បើចង់ឲ្យគេយល់ពីខ្លួនឯងមុន អ្នកត្រូវយល់ពីគេជាមុនសិន"។ តើអ្នកអាចយល់ពីពួកគាត់យ៉ាងដូចម្ដេចបាន បើអ្នកមិនទាន់អត់ធ្មត់ស្ដាប់ឲ្យយល់ពីជម្រៅចិត្តខាងក្នុងរបស់ពួកគាត់ជាមុនសិនផង ? ការស្ដាប់ពិតប្រាកដគឺជាការស្ដាប់ដើម្បីយល់ ពុំមែនស្ដាប់ដើម្បីចាំតបតទៅវិញនោះទេ។
ស្ដាប់ដើម្បីឲ្យភាគីម្ខាងទៀតទទួលអារម្មណ៍ថាអ្នកយល់អំពីពួកគេ។ នៅពេលអ្នកមានរឿងត្រូវចរចាជាមួយសមាជិកក្នុងគ្រួសារ អ្នកត្រូវចងចាំផងថាអ្នកមិនមែនចរចាដើម្បីយកឈ្នះចាញ់ជាមួយពួកគាត់នោះទេ ប៉ុន្តែគឺដើម្បីស្វែងយល់ពីការយល់ឃើញដែលមានខុសពីគ្នារបស់ភាគីម្ខាងទៀត ដើម្បីស្វែងរកចំណុចប្រសព្វរួមមួយដែលចុះសម្រុងនឹងគ្នាចំពោះបញ្ហាតែមួយបាន។ បើមកចរចាដើម្បីយល់ពីគ្នា និងមិនមែនយកឈ្នះចាញ់ នោះអ្នកមិនត្រូវខ្វល់តែពីការគិតរបស់អ្នកតែឯងបាននោះទេ អ្នកត្រូវយកចិត្តពួកគាត់ដាក់ចិត្តខ្លួនឯង អ្នកត្រូវយល់ពីគេជាមុន ទើបគេអាចយល់ពីអ្នកវិញបាន។
ទាល់តែអ្នកបានផ្ដល់ខ្យល់ដកដង្ហើមគ្រប់គ្រាន់ឲ្យពួកគេ ទាល់តែពួកគេបាននិយាយចេញនូវអ្វីដែលពួកគេចង់និយាយជាមុនសិន ទើបភាពតឹងណែនចេញពីទ្រូងរបស់ពួកគេនិងមានចន្លោះធូរស្បើយសម្រាប់ស្ដាប់ពីការយល់ឃើញរបស់អ្នកវិញម្ដង។ អ្នកមិនអាចរំពឹងឲ្យបញ្ហាបញ្ចប់ដោយធ្វើខ្លួនឯងជាចំណែកមួយនៃបញ្ហានោះទេ តែអ្នកត្រូវដកខ្លួនធ្វើជាអ្នកចាំដោះស្រាយបញ្ហាវិញ។ មានន័យថាអ្នកមិនអាចរំពឹងឲ្យអ្នកដទៃផ្លាស់ប្ដូរមុន ដោយមិនគិតផ្លាស់ប្ដូរខ្លួនឯងជាមុននោះទេ។ មនុស្សណាក៏ត្រូវការការយល់ចិត្តពីអ្នកដទៃដែរ ដូចនេះបើអ្នកអត់ធ្មត់ចាំស្ដាប់ពួកគេយ៉ាងណាដើម្បីឲ្យពួកគេមានអារម្មណ៍ថាអ្នកបានយល់ពីពួកគេហើយ នោះពួកគេនឹងចាំស្ដាប់អ្នកដោយសេចក្ដីមេត្តាដូចនេះវិញមិនខាន។
គ្រប់គ្នាសុទ្ធតែមានការយល់ឃើញខុសពីគ្នាទៅលើបញ្ហាដូចគ្នា ប៉ុន្តែភាពខុសគ្នានេះនឹងអាចស្វែងរកចំណុចប្រសព្វណាមួយរួមគ្នាបានឲ្យតែអ្នកដាក់ចិត្តថាចង់សម្រេចឲ្យដល់គោលដៅនោះមែន។ ម្យ៉ាងទៀតវាជារឿងដែលត្រូវការពេលវេលា ដែលប្រហែលជាមិនមែនគ្រាន់តែម្ដងពីរដងអាចដល់គោលដៅរួមគ្នានេះបានឡើយ។ ការប្រតិកម្មឆ្លើយតបភ្លាមៗដោយគិតតែពីអារម្មណ៍របស់ខ្លួនឯង អាចឲ្យអ្នកយកឈ្នះពួកគាត់ក្នុងរយៈពេលខ្លី ប៉ុន្តែប្រយោជន៍ក្នុងរយៈពេលខ្លីនេះនឹងនាំមកនូវភាពល្អក់កករក្នុងចិត្តសមាជិកគ្រួសារគ្រប់គ្នាក្នុងរយៈពេលវែង៕
ដោយ៖ ស្រីពៅ
