តើអ្នកដឹងទេថាការទុកឧបករណ៍អេឡិចត្រូនិកក្បែរខ្លួនពេលគេងផ្ដល់ផលប៉ះពាល់អ្វីខ្លះ ?
ការរស់នៅរបស់មនុស្សក្នុងសម័យបច្ចេកវិទ្យាបច្ចុប្បន្នបានឆ្លុះបញ្ចាំងឲ្យឃើញថាយើងមិនអាចរស់នៅដោយខ្វះឧបករណ៍អេឡិចត្រូនិកទាំងនោះបានឡើយ។ ដូច្នេះវាក៏បានជំរុញឲ្យមានការសិក្សាជាច្រើនត្រូវបានធ្វើឡើងដើម្បីស្វែងរកថាតើការគេងដោយមានឧបករណ៍អេឡិចត្រូនិកនៅក្បែរខ្លួននឹងមានផលប៉ះពាល់យ៉ាងដូចម្ដេចខ្លះចំពោះសុខភាពរបស់ពួកគេ។ ថ្វីត្បិតតែការសិក្សាទាំងអស់មិនទាន់ឈានដល់សេចក្ដីសន្និដ្ឋានចុងក្រោយជាក់លាក់មួយពីផលប៉ះពាល់ក៏ដោយ ប៉ុន្តែក្នុងនោះមានចំណុចមួយចំនួនដែលអ្នកប្រើប្រាស់ឧបករណ៍អេឡិចត្រូនិកទាំងអស់គួរពិចារណា។
ទូរស័ព្ទដៃរបស់អ្នកមិនមែនបិទមុខងារលែងដំណើរការណ៍អ្វីទាំងអស់នោះទេ បើទោះជាអ្នកឈប់ប្រើប្រាស់វាហើយក្ដី ព្រោះទូរស័ព្ទអ្នកដែលប្រើប្រាស់រលកវិទ្យុសម្រាប់ប្រាស្រ័យទាក់ទងពីតំបន់មួយទៅតំបន់មួយនេះ នៅតែបន្តទំនាក់ទំនងជាមួយនឹងស្ថានីយរលកវិទ្យុជានិច្ច។ រលកវិទ្យុស្ថិតនៅក្នុងចំណោមកាំរស្មីអេឡិចត្រូម៉ាញេទិចជាមួយគ្នានឹងប្រភេទកាំរស្មីX និងកាំរស្មីហ្កាម៉ា ប៉ុន្តែបើទោះជារលកវិទ្យុគឺជាប្រភេទកាំរស្មីដែលមានថាមពលខ្សោយជាងគេបំផុតស្ទើរតែមិនគួរឲ្យព្រួយបារម្ភអ្វីពីផលប៉ះពាល់ចំពោះសុខភាព ក៏ការណ៍ដែលទុកទូរស័ព្ទក្បែរខ្លួនពេលកំពុងគេងបែបនេះ មានឱកាសខ្ពស់ក្នុងការបង្កជារោគសញ្ញាឈឺក្បាលធេងធោង វិលមុខ ក្អួតចង្អោរ និងបណ្ដាលឲ្យការគេងប្រព្រឹត្តទៅមិនប្រក្រតី ជាពិសេសកម្រិតនៃផលប៉ះពាល់នឹងមានកាន់តែខ្លាំងបើសិនជាអ្នកបើកអ៊ីនធឺណិតឬWifiចោល។
ការគេងដែលប្រកបដោយគុណភាពឬនៅពេលអ្នកគេងដោយស្កប់ស្កល់មិនមានការរំខានអ្វីពីខាងក្រៅ និងគ្រប់ម៉ោងកំណត់របស់វា នោះនៅពេលអ្នកភ្ញាក់ពីគេងពេលព្រឹក អ្នកនឹងទទួលបានថាមពលពេញលេញ ប្រៀបដូចជាទូរស័ព្ទដែលបានសាកថ្មពេញដូច្នោះដែរ ហើយអ្នកនឹងទទួលអារម្មណ៍ស្រស់ថ្លា រួចរាល់សម្រាប់ការប្រើប្រាស់ខួរក្បាលពេញទំហឹងសម្រាប់បំពេញការងារយ៉ាងមានប្រសិទ្ធភាព។ យ៉ាងណាមិញ អ្នកនឹងរារាំងខ្លួនឯងមិនឲ្យខួរក្បាលរបស់អ្នកបញ្ចេញអស់នូវសក្ដានុពលរបស់វានោះទេ បើសិនជាការគេងរបស់អ្នកត្រូវបានរំខានដោយសំឡេងសារឥតប្រយោជន៍ទាំងនោះលោតឡើងមកដាស់អ្នក។
នៅពេលអ្នកកំពុងគេង ស្រាប់តែសំឡេងសារលោតឡើងដោយឥតរំពឹងទុកបែបនេះ នោះអ្នកនឹងភ្ញាក់មកទាំងកម្រោល ហើយវាក៏មិនខុសអ្វីពីការណ៍ដែលអ្នកទៅរំខានដំណេករបស់ខ្លួននោះដែរ។ នៅពេលភ្ញាក់មកដោយកម្រោលហើយ អ្នកនឹងពិបាកក្នុងការសម្ងំគេងលក់វិញ។ បើហេតុការណ៍នេះចេះតែកើតឡើងដោយមិនរកវិធីសាស្ត្របញ្ឈប់ នោះវានឹងធ្វើឲ្យអ្នកឆាប់មានអារម្មណ៍ច្រាស់ច្រាល់ក្រហល់ក្រហាយក្នុងខ្លួន និងវិវត្តទៅជារោគគេងមិនលក់។ បើអ្នកគេងមិនបានគ្រប់គ្រាន់តាមចំនួនកំណត់ជារៀងរាល់យប់នោះទេ បញ្ហាសុខភាពកាន់តែធ្ងន់ធ្ងរនឹងចេះតែមកបន្តបន្ទាប់គ្នា ដោយចេញមកពីរឿងតូចតាចមួយប៉ុណ្ណោះ។
ម្យ៉ាងទៀតយ៉ាងហោចណាស់រយៈពេល២ទៅ៣ម៉ោងមុនពេលចូលគេង អ្នកមិនគួរសម្លឹងអេក្រង់ទូរស័ព្ទនោះឡើយ ព្រោះពន្លឺដែលបញ្ចេញមកពីទូរស័ព្ទនឹងធ្វើឲ្យប្រព័ន្ធជីវសាស្ត្ររបស់អ្នកឬជាវដ្ដគេងរបស់អ្នកច្រឡំថាជាពេលថ្ងៃ ហេតុនេះក៏ដាស់អ្នកមិនឲ្យងងុយគេង។ ដូច្នេះពេលគេង អ្នកត្រូវប្រាកដថាអ្នកគ្មានរឿងអ្វីត្រូវរំខានឲ្យគិតនោះឡើយ។ មុនពេលចូលគេង២ទៅ៣ម៉ោងមិនត្រូវប្រើប្រាស់ឧបករណ៍អេឡិចត្រូនិកទាំងឡាយ និងបិទអ៊ីនធឺណិតរបស់អ្នក ហើយទុកទូរស័ព្ទឬគ្រប់ឧបករណ៍អេឡិចត្រូនិកទាំងអស់ឲ្យបានឆ្ងាយពីខ្លួន ដើម្បីធានាពីសុវត្ថិភាពរបស់អ្នកទាំងមូល៕
ដោយ៖ ស្រីពៅ
