មានអ្វីទៅនៅក្នុងអាគុយ ដែលផ្ដល់ថាមពលដល់យានជំនិះរបស់អ្នកឲ្យទៅមុខបាន ?
តើអ្នកធ្លាប់ឆ្ងល់ដែរទេថា តើមានអ្វីខ្លះនៅក្នុងអាគុយដែលអាចដំណើរការណ៍ម៉ូតូឬរថយន្តរបស់អ្នកបាន ? បើចូលដល់ខាងក្នុងរបស់អាគុយ តើមានទំនាក់ទំនងអ្វីខ្លះដែលកើតឡើងដើម្បីផ្ដល់ថាមពលដល់យានជំនិះរបស់អ្នកឲ្យទៅមុខបាន ? នេះគ្រាន់តែជាបាតុភូតធម្មជាតិរបស់ម៉ូលេគុលអាតូមតូចៗដែលមើលមិនឃើញនឹងភ្នែកមនុស្ស ដែលត្រូវបានអ្នកវិទ្យាសាស្ត្រទាញយកប្រយោជន៍ពីបាតុភូតធម្មជាតិនេះយកមកប្រើប្រាស់ ដើម្បីផ្ដល់កំណើតដល់ឧបករណ៍អេឡិចត្រូនិកទាំងអស់នៅលើសកលលោកនេះតែប៉ុណ្ណោះឯង។
នៅក្នុងខ្លួនអ្នកក៏ដោយ វត្ថុអ្វីក៏ដោយ ពោលគឺគ្រប់យ៉ាងទាំងអស់សុទ្ធតែបង្កឡើងពីអាតូម។ រាល់អាតូមទាំងអស់សុទ្ធតែមានបន្ទុកវិជ្ជមាន និងបន្ទុកអវិជ្ជមានសមាមាត្រនឹងគ្នា ឬចំនួនបន្ទុក+ស្មើគ្នានឹងបន្ទុក-ក្នុងអាតូមនីមួយៗ។ បន្ទុកវិជ្ជមាននិងបន្ទុកណឺតតែងតែនៅជាមួយគ្នាបង្កជាណ្វៃយ៉ូដែលស្ថិតនៅចំកណ្ដាលអាតូម និងមានបន្ទុកអវិជ្ជមានវិលជុំវិញណ្វៃយ៉ូរបស់អាតូម។ ចំនួនបន្ទុកវិជ្ជមានដែលអាតូមមួយមាន កំណត់ទៅលើលក្ខណៈគីមីរបស់អាតូមនេះ។ ក៏ដោយសារតែដឹងពីចំនួនបន្ទុកវិជ្ជមានរបស់អាតូមនីមួយៗនេះ ទើបគេអាចបែងចែកដាច់ពីគ្នាបានថាអាតូមនេះជាអាតូមទង់ដែង ឬក៏អាតូមអ៊ីដ្រូហ្សែន ឬដែកជាដើម។
ប៉ុន្តែ បន្ទុកវិជ្ជមានរបស់អាតូម មិនមានសមត្ថភាពអាចធ្វើអ្វីបាននោះឡើយ ដោយសារតែកម្លាំងដ៏ខ្លាំងរបស់ដែលទាញបន្ទុកវិជ្ជមានឲ្យជាប់គ្នាជាមួយបន្ទុកណឺតនៅក្នុងណ្វៃយ៉ូមិនអាចផ្ដាច់ចេញពីគ្នាទៅណាបាន។ បន្ទុកអវិជ្ជមានក៏រងកម្លាំងពីបន្ទុកវិជ្ជមានដែលទាញវាឲ្យវិលជុំវិញណ្វៃយ៉ូរបស់អាតូមដែរ ប៉ុន្តែបន្ទុកអវិជ្ជមានទាំងអស់មិនផ្ដុំគ្នានៅតែមួយស្រទាប់ជុំវិញណ្វៃយ៉ូនោះទេ ក៏មិនខុសគ្នាពីប្រព័ន្ធព្រះអាទិត្យរបស់យើងដែលមានគន្លងជាច្រើនដែលភពនីមួយៗវិលជុំវិញព្រះអាទិត្យដែលនៅចំកណ្ដាលនោះដែរ។
ដូចនេះ បើភពណាវិលកាន់តែឆ្ងាយពីព្រះអាទិត្យ កម្លាំងដែលទទួលរងពីព្រះអាទិត្យក៏កាន់តែខ្សោយជាងភពដែលនៅជិតព្រះអាទិត្យជាងគេដែរ។ រីឯណ្វៃយ៉ូរបស់អាតូមវិញ ចំពោះបន្ទុកអវិជ្ជមានដែលនៅស្រទាប់ក្រៅគេបង្អស់នឹងទទួលរងកម្លាំងតិចពីវា ដូចនេះពួកវាងាយនឹងហោះហើរចេញដោយសេរីពីណ្វៃយ៉ូអាតូមរបស់វា ដោយគ្រាន់តែមានកម្លាំងពីខាងក្រៅជំរុញប៉ុណ្ណោះ។ បាតុភូតធម្មជាតិនេះឯងដែលត្រូវបានអ្នកវិទ្យាសាស្ត្រ និងអ្នកផលិតឧបករណ៍ទាំងអស់ទាញយកប្រយោជន៍ដើម្បីបង្កើតជាចរន្តអគ្គិសនីឡើង។
ច្បាប់របស់អាតូម គឺចំនួនបន្ទុកវិជ្ជមាននិងអវិជ្ជមានត្រូវតែស្មើគ្នាជានិច្ច។ ដូច្នេះ ដោយគ្រាន់តែធ្វើឲ្យវាមិនស្មើគ្នានោះយើងអាចបង្កើតចរន្តអគ្គិសនីបានហើយ។ ប៉ុន្តែ មិនមែនបន្ទុកអវិជ្ជមានស្រទាប់ក្រៅនៅក្នុងគ្រប់ប្រភេទអាតូមទាំងអស់ សុទ្ធតែងាយនឹងហោះហើរចេញពីណ្វៃយ៉ូរបស់វានោះឡើយ មានន័យថាវាក៏មិនងាយនឹងចម្លងចរន្តអគ្គិសនីដែរ ដែលនេះហើយគឺជាលក្ខណៈដែលអ៊ីសូឡង់មាន។ ផ្ទុយទៅវិញចំពោះប្រភេទអាតូមដូចជាទង់ដែង ប្រាក់ អាលុយមីញ៉ូមជាដើម បន្ទុកអវិជ្ជមានស្រទាប់ក្រៅរបស់អាតូមទាំងនេះសុទ្ធតែងាយនឹងហោះហើរចេញពីណ្វៃយ៉ូរបស់វា។ ហេតុនេះហើយទើបគេតែងតែប្រើប្រាស់វត្ថុទាំងនេះជាខ្សែភ្លើង ឬក្នុងគោលដៅផ្សេងៗសម្រាប់ចម្លងចរន្ត។
ដូចបានរៀបរាប់ខាងលើ យើងដឹងហើយថាអាតូមដែលមានបន្ទុកអវិជ្ជមានស្រទាប់ក្រៅដែលងាយនឹងហើរចេញពីណ្វៃយ៉ូ នឹងកាន់តែងាយស្រួលក្នុងការបង្កើតចរន្តអគ្គិសនី ដោយធ្វើយ៉ាងណាឲ្យចំនួនបន្ទុកវិជ្ជមាននិងអវិជ្ជមានមិនស្មើគ្នា ពោលគឺត្រូវប្រើប្រាស់កម្លាំងណាមួយដើម្បីទាក់ទាញបន្ទុកអវិជ្ជមានរបស់វាឲ្យចេញពីណ្វៃយ៉ូ នោះអាតូមរបស់វានឹងខ្វះបន្ទុក- ហើយកើនបន្ទុក+ វិញ។ នៅពេលវាមិនស្មើគ្នា តាមច្បាប់របស់អាតូមខ្លួនវា វានឹងព្យាយាមធ្វើយ៉ាងណាដើម្បីឲ្យចំនួនបន្ទុកទាំងពីរមានតុល្យភាពនឹងគ្នាក្នុងអាតូម។
អតុល្យភាពនេះហើយដែលបង្កជាកម្លាំងឲ្យបន្ទុកអវិជ្ជមានព្យាយាមស្វែងរកតុល្យភាព ដែលចលនានេះបង្កើតជាចរន្តអគ្គិសនីនៅក្នុងខ្សែភ្លើង។ អាតូមដែលទទួលរងកម្លាំងធ្វើឲ្យបន្ទុកអវិជ្ជមានចេញពីណ្វៃយ៉ូ នឹងមានចំនួនបន្ទុកវិជ្ជមានលើសបន្ទុកអវិជ្ជមាន ដូចនេះវានឹងក្លាយជាអ៊ីយ៉ុង គឺជាអ៊ីយ៉ុងវិជ្ជមាន។ ចំណែកឯអាតូមដែលបានទាញយកបន្ទុកអវិជ្ជមានពីគេ ហើយកើនចំនួនបន្ទុកអវិជ្ជមានជាហេតុនាំឲ្យខ្វះចំនួនបន្ទុកវិជ្ជមាន ដូចនេះវានឹងក្លាយជាអ៊ីយ៉ុងអវិជ្ជមាន។ កម្លាំងដែលយើងអាចប្រើប្រាស់ដើម្បីជំរុញអតុល្យភាពនេះឡើង អាចជាកម្លាំងកកិត ដូចជាក្នុងរដូវរងាពេលអ្នកដោះអាវដែលធ្វើឡើងពីកប្បាសចេញ អ្នកនឹងសង្កេតឃើញមានផ្កាភ្លើងព្រាកៗចេញមក ដែលនេះកើតឡើងដោយសារការបន្ទេរបន្ទុកគ្នាទៅវិញទៅមករវាងអាតូមដែលបង្កអ្នកនិងអាតូមរបស់ក្រណាត់កប្បាស ដោយសារតែមានបន្ទេរមានន័យថាអាតូមនៅម្ខាងនឹងទាញយកបន្ទុកអវិជ្ជមានពីអាតូមម្ខាងទៀត ដូចនេះអតុល្យភាពនេះក៏បង្កជាចរន្តអគ្គិសនីជាផ្កាភ្លើងព្រាកៗនេះឯង។
លើសពីនេះកម្លាំងអាចជាការដុតកម្ដៅ និងអាចជាប្រតិកម្មគីមី ដែលជាគំនិតមូលដ្ឋាននៅពីក្រោយដំណើរការណ៍របស់អាគុយ។ នៅក្នុងអាគុយ ធ្វើឡើងពីអេឡិចត្រូតលោហៈនៅសងខាង ដែលសម្រាប់អាគុយខ្លះម្ខាងអាចជាសំណ (ព្រោះវាចម្លងចរន្ត) និងម្ខាងទៀតអាចជាសំណឌីអុកស៊ីត ដែលចម្លងចរន្តដូចគ្នាដែរ ហើយដាក់លោហៈចម្លងចរន្តទាំងពីរនេះជ្រមុជនៅក្នុងអាស៊ីដស៊ុលផួរិចខាប់។ គឺទំនាក់ទំនង ឬប្រតិកម្មអគ្គិសនីគីមីរវាងពួកវានេះហើយជាអ្នកជំរុញឲ្យមានដំណើរការណ៍បង្កើតចរន្តអគ្គិសនីនៅក្នុងអាគុយ៕
ដោយ៖ ស្រីពៅ
