គ្រប់ពេលអ្នកធ្វើការងារច្រើនមុខក្នុងពេលតែមួយ តើទម្លាប់នេះកំពុងតែលួចបំផ្លាញខួរក្បាលអ្នកដូចម្ដេចខ្លះ ?
មនុស្សជាច្រើនតែងមានទម្លាប់ធ្វើការច្រើនមុខក្នុងពេលតែមួយ។ នៅពេលដែលពួកគេយល់ថាការធ្វើបែបនេះនឹងចំណេញពេលវេលា និងបង្កើនផលិតភាពការងារឲ្យបានច្រើនដោយចំណាយរយៈពេលតិច អ្វីដែលពួកគេកំពុងធ្វើគឺកំពុងតែនាំពួកគេទៅរកលទ្ធផលដែលបញ្ច្រាសទិសពីលទ្ធផលដែលពួកគេរំពឹងទុកហើយ។
បើអ្នកមានទម្លាប់ធ្វើការច្រើនមុខក្នុងពេលតែមួយ ដើម្បីសម្រេចការងារទាំងនោះឲ្យទទួលបានលទ្ធផលល្អ នោះអ្នកកំពុងយល់ខុសហើយ អ្នកកំពុងប្រើប្រាស់ខួរក្បាលរបស់អ្នកនៅក្នុងផ្លូវខុសហើយ។ អ្នកវិទ្យាសាស្ត្រប្រព័ន្ធប្រសាទនៅសាកលវិទ្យាល័យ MIT អ្នកស្រី Earl Miller បានលើកឡើងថា ធម្មជាតិនៃខួរក្បាលរបស់យើងមិនមែនសម្រាប់ប្រើប្រាស់ទៅលើការងារច្រើនមុខក្នុងពេលតែមួយនោះទេ។
នៅពេលដែលអ្នកទាំងនោះយល់ថា ពួកគេកំពុងតែធ្វើការច្រើនមុខក្នុងពេលតែមួយ តាមការពិតទៅគឺពួកគេកំពុងតែផ្លាស់ប្ដូរពីការងារមួយទៅការងារមួយទៀតយ៉ាងឆាប់រហ័សប៉ុណ្ណោះ។ គ្រប់ពេលដែលពួកគេធ្វើបែបនេះ គឺពួកគេកំពុងតែធ្វើឲ្យសមត្ថភាពក្នុងការគិតរបស់ពួកគេខាតបង់ហើយ។ អ្នកមិនអាចតម្រង់ការផ្ចង់អារម្មណ៍របស់អ្នកទៅលើរឿងពីរឬច្រើនជាងនេះក្នុងពេលដំណាលគ្នានោះឡើយ។ ម្ដងការងារមួយនេះដណ្ដើមយកការផ្ចង់អារម្មណ៍របស់អ្នកទៅ ម្ដងទៀតការងារមួយទៀតដណ្ដើមយកទៅវិញម្ដង។
នៅពេលការគិតរបស់អ្នកត្រូវបានផ្លាស់ប្ដូរទៅវិញទៅមកបែបនេះ វានឹងជំរុញឲ្យខួរក្បាលអ្នកផលិតចេញនូវអ័រម៉ូនរបស់ស្ត្រេស ដែលជាហេតុនាំឲ្យអ្នកមានអារម្មណ៍ហត់នឿយផ្លូវចិត្ត។ មួយវិញទៀត នៅពេលអ្នកផ្លាស់ប្ដូរការយកចិត្តទុកដាក់របស់អ្នកពីការងារមួយទៅមួយក្នុងពេលដំណាលគ្នា អ្នកមិនអាចគិតទៅលើការងារនីមួយៗយ៉ាងពេញទំហឹង ថ្លឹងថ្លែងវិនិច្ឆ័យ និងរិះគិតបានគ្រប់ជ្រុងជ្រោយនោះឡើយ។ លទ្ធផលនឹងប៉ះពាល់ដល់ប្រសិទ្ធភាពការងាររបស់អ្នក បើទោះជាអ្នកអាចចំណេញពេលវេលាពីទម្លាប់ធ្វើការរបៀបនេះ ប៉ុន្តែការងាររបស់អ្នកគឺគ្មានគុណភាពដូចគុណភាពការងារដែលចេញពីការផ្ចង់អារម្មណ៍គិតធ្វើវាតែមួយនោះដែរ។
ការសិក្សារបស់ University of London ដែលធ្វើការសិក្សាទៅលើមនុស្សមួយក្រុមនៅពេលដែលពួកគេធ្វើការច្រើនមុខក្នុងពេលតែមួយ។ លទ្ធផលបានបង្ហាញថា ទម្លាប់ធ្វើការរបៀបនេះបានធ្វើឲ្យកម្រិតIQរបស់អ្នកទាំងនោះធ្លាក់ចុះ។ កម្រិតIQដែលធ្លាក់ចុះប្រហាក់ប្រហែលនឹងមនុស្សដែលមិនបានគេង និងមនុស្សដែលជក់កញ្ឆាដូចគ្នាដែរ។ រីឯការសិក្សាមួយទៀតរបស់ University of Sussex បានបង្ហាញពីផលប៉ះពាល់ពីទម្លាប់ធ្វើការច្រើនមុខក្នុងពេលតែមួយ ដែលមានទៅលើការខូចខាតទម្រង់ខួរក្បាលអស់មួយជីវិត។
ពួកគេបានប្រើប្រាស់ម៉ាស៊ីនMRI ដើម្បីស្កេនសកម្មភាពខួរក្បាលរបស់អ្នកដែលប្រើប្រាស់ឧបករណ៍អេឡិចត្រូនិកច្រើនក្នុងពេលតែមួយ។ លទ្ធផលក៏បានបង្ហាញថា នៅត្រង់តំបន់មួយរបស់ខួរក្បាល ដែលគ្រប់គ្រងទៅលើអារម្មណ៍និងការអាណិតអាសូរ ត្រូវបានកាត់បន្ថយស្ដើងជាងមុន។ ក្នុងរយៈពេលវែង ទម្លាប់នេះក៏ប៉ះពាល់ដល់សមត្ថភាពក្នុងការចងចាំ និងសមត្ថភាពក្នុងការផ្ចង់អារម្មណ៍ឲ្យអន់ថយជាងមុន ព្រមទាំងចុះខ្សោយនូវសមត្ថភាពក្នុងការរិះគិតវិភាគផងដែរ។
ហើយអ្វីដែលរំខានដល់ខួរក្បាលអ្នកមិនឲ្យដំណើរការណ៍ដល់សក្ដានុពលពេញទំហឹងរបស់វា នោះគឺជាឧបករណ៍អេឡិចត្រូនិករបស់អ្នកនេះឯង៕
ដោយ៖ ស្រីពៅ
