តើធម្មជាតិរបស់ពន្លឺគឺជាអ្វី ?
នៅពេលអ្នកបិទភ្នែកគេង ពិភពលោករបស់អ្នកក៏ប្រែជាងងឹត។ ខណៈពេលដែលអ្នកភ្ញាក់ពីគេងភ្លាម ភ្នែករបស់អ្នកក៏បានផ្ដល់នូវទិដ្ឋភាពចម្រុះពណ៌អំពីអ្វីៗដែលកើតឡើងនៅជុំវិញខ្លួនអ្នក។ ធម្មជាតិរបស់ពន្លឺ គ្រាន់តែជារឿងរ៉ាវធម្មជាតិដែលមនុស្សទូទៅចាត់ទុកថាធម្មតា ដែលអ្នកប្រាជ្ញដ៏អស្ចារ្យជាច្រើនរូបចាប់តាំងពីអ៊ីសាក់ ញូតុន តមកដល់អាល់ប៊ឺត អាញស្តាញ រហូតមកទល់បច្ចុប្បន្ន មិនទាន់អាចបកស្រាយបានថាពន្លឺជាអ្វីឲ្យពិតប្រាកដ។ តើពន្លឺគឺជាអ្វី ?
នៅក្នុងសតវត្សទី១៧ កំពូលអ្នកប្រាជ្ញវិទ្យាសាស្ត្ររបស់អង់គ្លេស អ៊ីសាក់ ញូតុន គឺជាអ្នកវិទ្យាសាស្ត្រដំបូងគេបង្អស់ដែលបានចាប់ផ្ដើមប្រវត្តិសាស្ត្រនៃរឿងរ៉ាវរបស់ធម្មជាតិនៃពន្លឺ។ ក្នុងពេលមួយ គាត់បានព្យាយាមឆ្លើយនឹងសំណួរដ៏អាថ៌កំបាំងអំពីធម្មជាតិមួយនេះ ដោយធ្វើការពិសោធន៍ដោយប្រើប្រាស់ព្រីសចំណាំងផ្លាតជាមួយនឹងពន្លឺពណ៌សរបស់ព្រះអាទិត្យដែលបានចាំងមក។
នៅពេលនោះគាត់ក៏ទទួលបានពន្លឺ៧ពណ៌ដូចដែលជាបាតុភូតឥន្ទធនូដែលយើងធ្លាប់ឃើញ។ ការណ៍នេះក៏នាំញូតុនទៅរកការសន្និដ្ឋានថា ពន្លឺពណ៌សគឺជាការរួមបញ្ចូលគ្នានៃពន្លឺ៧ពណ៌មាន ក្រហម ទឹកក្រូច លឿង បៃតង ផ្ទៃមេឃ ខៀវ និងស្វាយ។
តើពន្លឺគឺជាអ្វី ? ព្រះអាទិត្យបញ្ចេញពន្លឺឬកាំរស្មីដ៏ខ្លាំងក្លា និងមានរូបរាងជារលកដែលដាលឡើងដាលចុះដូចរលកនៅក្នុងទឹកសមុទ្រដូច្នោះដែរ ហើយពន្លឺក៏មានលក្ខណៈជាអគ្គិសនីនិងដែនម៉ាញេទិចផងដែរ ដូច្នេះហើយទើបពន្លឺត្រូវបានគេឲ្យឈ្មោះថា កាំរស្មីអេឡិចត្រូម៉ាញេទិច។ ពន្លឺដែលបញ្ចេញពីព្រះអាទិត្យមកកាន់ភពផែនដីនិងអាចឲ្យយើងមើលឃើញពិភពលោកជាមួយពណ៌ដ៏ចម្រុះគ្នានេះ គ្រាន់តែជាចំណែកដ៏តូចមួយនៅក្នុងវិសាលភាពនៃកាំរស្មីអេឡិចត្រូម៉ាញេទិចទាំងអស់របស់ព្រះអាទិត្យប៉ុណ្ណោះ។
វិសាលភាពនៃកាំរស្មីអេឡិចត្រូម៉ាញេទិច គឺជាក្រុមគ្រួសារមួយដែលមានសមាជិក៧នាក់។ សមាជិក៧នាក់នេះគឺជាកាំរស្មីទាំង៧ប្រភេទដែលរួមបញ្ចូលគ្នាជាគ្រួសារតែមួយនៅក្នុងវិសាលភាពនៃកាំរស្មីអេឡិចត្រូម៉ាញេទិច។ អ្វីដែលកំណត់នូវភាពខុសគ្នារវាងកាំរស្មីប្រភេទនីមួយៗ គឺជាលក្ខណៈ៣យ៉ាងដែលមាន ជំហានរលក ប្រេកង់ និងថាមពលរបស់វា។
តើជំហានរលកជាអ្វី ? បើអ្នកធ្លាប់សង្កេតទៅលើរលកដែលដាលនៅក្នុងទឹកសមុទ្រ អ្នកនឹងសង្កេតឃើញមានកំពូលនីមួយៗដែលរលកដាលបាន។ ចន្លោះពីកំពូលរបស់រលកមួយទៅកំពូលរបស់រលកមួយទៀតគឺជា ជំហានរលក។ ចុះអ្វីទៅជាប្រេកង់ ? ប្រេកង់សំដៅទៅលើចំនួនដែលរលកដែលដាលបាននៅក្នុងរយៈពេល១វិនាទី។
កាំរស្មីទាំង៧ប្រភេទមាន រលកវិទ្យុ (radiowave) រលកមីក្រូ (microwave) កាំរស្មីក្រហមអាំងប្រា IR (infrared light) ពន្លឺមើលឃើញ (visible light) កាំរស្មីUV (UV light) កាំរស្មីX (X-ray) និងកាំរស្មីហ្កាម៉ា (Gamma ray)។ គេតែងតែប្រើប្រាស់រលកវិទ្យុដើម្បីបញ្ជូនរលកសញ្ញាក្នុងឧបករណ៍អេឡិចត្រូនិកផ្សេងៗ ដោយសារតែលក្ខណៈរបស់វាដែលមានជំហានរលកវែងជាងគេបង្អស់។
បើកាលណាជំហានរលកកាន់តែវែង ចំនួនរលកដែលដាលបានក្នុង១វិនាទីឬសំដៅលើប្រេកង់របស់វានឹងមានកាន់តែទាប ហើយថាមពលដែលវាបញ្ចេញបានក៏មានខ្សោយដែរ។ ឬអាចនិយាយបានថា រលកដែលដាលកាន់តែញាប់ មានថាមពលកាន់តែខ្លាំង ប្រេកង់កាន់តែខ្ពស់ និងចន្លោះពីរលកមួយទៅមួយឬជំហានរលក កាន់តែខ្លី។
នៅក្នុងវិសាលភាពនៃកាំរស្មីអេឡិចត្រូម៉ាញេទិចរបស់ព្រះអាទិត្យ កាំរស្មីទាំង៧ប្រភេទនេះបណ្ដេញគ្នាចាប់ពីរលកវិទ្យុដែលមានជំហានរលកវែងជាងគេ ឯប្រេកង់និងថាមពលទាបជាងគេ រហូតដល់កាំរស្មីហ្កាម៉ាដែលមានជំហានរលកខ្លីជាងគេបង្អស់ និងមានប្រេកង់និងថាមពលខ្ពស់ជាងគេបង្អស់ ជាហេតុនាំឲ្យវាជាកាំរស្មីដែលផ្ដល់ភាពគ្រោះថ្នាក់ជាងគេបង្អស់ដែរ។
ក្នុងចំណោមកាំរស្មីទាំង៧ប្រភេទ កាំរស្មីដែលផ្ដល់ពន្លឺឲ្យយើងមើលឃើញពណ៌នៅលើភពផែនដីនេះគឺជាចំណែកដ៏តូចមួយនៃពន្លឺមើលឃើញ (visible light) ដែលមានឈ្មោះរបស់វាពីលក្ខណៈដែលវាអាចមើលឃើញដោយភ្នែករបស់មនុស្សនេះឯង។ ប៉ុន្តែបើការវិវត្តរបស់មនុស្ស មិនបានផ្ដល់ឲ្យអ្នកនូវភ្នែកមួយគូដែលអាចចាប់យកពន្លឺដែលចាំងមកបាន ក៏អ្នកនៅតែមិនអាចមើលឃើញដែរ។ នៅខាងក្រោយគ្រាប់ភ្នែករបស់អ្នក មានរ៉េទីនដែលមានតួនាទីចាប់យកពន្លឺដែលចាំងមកប៉ះនឹងភ្នែក ដើម្បីបញ្ជូនទៅកាន់ខួរក្បាលអំពីព័ត៌មានដែលវាទទួលបានពីខាងក្រៅ។
នៅក្នុងរ៉េទីនមានកោសិកា២ប្រភេទសម្រាប់ចាប់យកពន្លឺ។ កោសិកាកោណ មានតួនាទីចាប់យកពន្លឺខ្លាំង រីឯកោសិកាដំបងមានតួនាទីទៅលើគំហើញសខ្មៅឬពន្លឺខ្សោយ ដែលយើងប្រើប្រាស់នៅពេលយប់។ កោសិកាកោណមានកោសិកាចំនួន៣ប្រភេទទៀត ដែលមានមួយសម្រាប់ឆ្លើយតបនឹងពណ៌ក្រហម មួយទៀតឆ្លើយតបនឹងពណ៌បៃតង និងមួយទៀតឆ្លើយតបនឹងពណ៌ខៀវ។ ធម្មជាតិបានផ្ដល់ឲ្យភ្នែករបស់យើងជាមួយនឹងកោសិកាឆ្លើយតបនឹងពណ៌ចំនួន៣ប៉ុណ្ណោះ។ មូលហេតុដែលយើងអាចមើលឃើញពណ៌ចម្រុះជាច្រើនបាន នេះក៏ព្រោះតែជាការសហការរវាងកោសិកាឆ្លើយតបប្រភេទនីមួយៗនេះឯង៕
ដោយ៖ ស្រីពៅ
