តើស្ត្រេសនឹងផ្លាស់ប្ដូរទម្រង់ខួរក្បាលរបស់អ្នកយ៉ាងដូចម្ដេចខ្លះ ?
វត្ថុដ៏អស្ចារ្យបំផុតដែលធម្មជាតិបានផ្ដល់មកឲ្យមនុស្សយើងគ្រប់គ្នា នោះគឺជាខួរក្បាលនេះឯង។ រាល់គំនិតទាំងឡាយគឺជាផលិតផលដែលផលិតឡើងដោយម៉ាស៊ីនដ៏ឈ្លាសវៃមួយនេះ។ មិនថាជាគំនិតច្នៃប្រឌិតរបស់បុគ្គលជោគជ័យក្នុងលោកក៏ដោយ ឬជាគំនិតវិជ្ជមានដែលឆក់ទាញយករឿងវិជ្ជមានចូលក្នុងជីវិតក៏ដោយ ឬជាគំនិតអវិជ្ជមានក៏ដោយ សុទ្ធតែមានប្រភពកំណើតចេញមកពីរោងចក្រម៉ាស៊ីនខួរក្បាលនេះទាំងអស់។
ដូច្នេះ បើអ្នកចំណាយពេលជារៀងរាល់ថ្ងៃទៅលើការបណ្ដុះពូជនូវគំនិតអវិជ្ជមាន តើក្នុងរយៈពេលវែងវានឹងមានផលប៉ះពាល់អ្វីខ្លះដល់ខួរក្បាលរបស់អ្នក ? នៅក្នុងខួរក្បាលរបស់អ្នក មានតំបន់មួយឈ្មោះថា amygdala គឺជាតំបន់ដែលស្តុកទុកនូវការចងចាំដែលមានទំនាក់ទំនងជាមួយអារម្មណ៍អវិជ្ជមានរបស់អ្នក ជាបទពិសោធន៍ទាំងឡាយណាដែលនាំមកនូវអារម្មណ៍អវិជ្ជមាន។ ប៉ុន្តែតំបន់នេះមិនត្រឹមតែគ្រប់គ្រងទៅលើអារម្មណ៍របស់អ្នកប៉ុណ្ណោះទេ តែក៏ជាការឆ្លើយតបបែបបន្ទាន់ភ្លាមៗដូចជាពេលដែលអ្នកជួបនឹងហេតុការណ៍គ្រោះថ្នាក់ផងដែរ។
នេះគឺជាហេតុផលមួយដែលបង្ហាញអំពីទំនាក់ទំនង ដែលនៅក្នុងសភាពតានតឹង រងសម្ពាធ កើតទុក្ខ ស្ត្រេស និងភាពភ័យខ្លាច មនុស្សយើងនឹងបាត់បង់ភាពឈ្លាសវៃរបស់ខ្លួនជាងមុន។ នៅពេលគិតអវិជ្ជមាន ពួកគេច្រើនតែជ្រើសរើសឆ្លើយតបចំពោះស្ថានការណ៍និងមនុស្សជុំវិញខ្លួនបែបបន្ទាន់ភ្លាមៗ ឬអារម្មណ៍ដឹកមុខនេះឯង។ ការមើលឃើញបែបសុទិដ្ឋិនិយមរបស់ពួកគេចំពោះអ្វីៗដែលអាចទៅរួច ប្រែក្លាយជារួមតូច និងមានដែនកំណត់។
សមត្ថភាពក្នុងការគិតវិភាគ ថ្លឹងថ្លែងនិងវិនិច្ឆ័យហេតុផលរបស់ពួកគេ ត្រូវបានគ្របដណ្ដប់និងគ្រប់គ្រងដោយអារម្មណ៍អវិជ្ជមាន ហើយវាថែមទាំងរំខានដល់ដំណើរការណ៍ទទួលយកទិន្នន័យថ្មីៗមកស្តុកទុកក្នុងការចងចាំផងដែរ។ រីឯតំបន់thalamusរបស់ខួរក្បាលវិញ មានតួនាទីបញ្ជូនសញ្ញាណផ្សេងៗដែលពាក់ព័ន្ធជាមួយនឹងការធ្វើចលនាទៅកាន់រាងកាយទាំងមូលរបស់អ្នក។ នៅពេលអ្នកគិតអវិជ្ជមាន ឬស្ថិតនៅក្នុងសភាពស្ត្រេស តំបន់នេះមិនអាចបែងចែកដាច់ពីភាពខុសគ្នារវាងអារម្មណ៍អវិជ្ជមាននិងសភាពគ្រោះថ្នាក់នោះឡើយ។ នៅពេលអ្នកស្ថិតនៅក្នុងសភាពគ្រោះថ្នាក់ គឺតំបន់ thalamus នេះឯងដែលបញ្ជូនសញ្ញាណទៅកាន់រាងកាយអ្នកឲ្យបេះដូងអ្នកលោតញាប់ ដកដង្ហើមញាប់ជាងមុន សម្ពាធឈាមឡើងខ្ពស់ និងបែកញើស ហើយអ្នកក៏រត់គេចចេញនេះឯង។
នៅពេលវាមិនអាចបែងចែកបែបនេះ បើអ្នកគិតអំពីអ្វីដែលអ្នកភ័យខ្លាច តើអ្នកមានធ្លាប់ចាប់អារម្មណ៍ទេថា រាងកាយរបស់អ្នកក៏មានប្រតិកម្មនៅក្នុងសភាពដូចគ្នានឹងពេលជួបគ្រោះថ្នាក់ដែរ ? ស្ត្រេសម្ដងម្កាល គឺជារឿងធម្មតារបស់មនុស្សគ្រប់គ្នា ប៉ុន្តែបើអ្នកទម្លាប់គិតបែបនេះជាប្រចាំ ក្នុងរយៈពេលវែងវានឹងប៉ះពាល់ដល់សុខភាពផ្លូវកាយនិងផ្លូវចិត្តរបស់អ្នកក្នុងពេលតែមួយ។ ជាលទ្ធផលអ្នកនឹងអាចកើតជំងឺផ្លូវចិត្ត បាក់ទឹកចិត្ត ភាពមិនប្រក្រតីរបស់អារម្មណ៍ជាដើម។ ផលប៉ះពាល់ដ៏ចម្បងមួយទៀតពីការគិតអវិជ្ជមាន នោះវានឹងទៅបំផ្លាញកោសិកាណឺរ៉ូននៅក្នុងខួរក្បាលអ្នកឲ្យងាប់ ដែលវាមានតួនាទីយ៉ាងសំខាន់ក្នុងការស្តុកទុកទិន្នន័យនៅក្នុងការចងចាំរបស់អ្នក។ ដូច្នេះវានឹងប៉ះពាល់ដល់អារម្មណ៍របស់អ្នក ជាពិសេសការចងចាំរបស់អ្នកនឹងអន់ថយអាក្រក់ជាងមុន៕
ដោយ៖ ស្រីពៅ
