ហេតុផលបួនយ៉ាងដែលធ្វើឱ្យសិង្ហបុរីជាប្រទេសទាក់ទាញបំផុតសម្រាប់អ្នកវិនិយោគ
នៅក្នុងតំបន់អាស៊ីអាគ្នេយ៍ ឬនៅទូទាំងទ្វីបអាស៊ី សិង្ហបុរីគឺជាប្រទេសដែលទទួលបានការទាក់ទាញបំផុត សម្រាប់ការវិនិយោគ និងវិស័យសហគ្រិនភាព។ ខាងក្រោមនេះជា ហេតុផលបួនយ៉ាងដែលធ្វើឱ្យប្រទេសដែនកោះមួយនេះមានភាពទាក់ទាញ៖
១) ការគាំទ្រពីសំណាក់រដ្ឋបាលមូលដ្ឋាន អាជីវកម្មខ្នាតតូចភាគច្រើន ទទួលបានការជួយគាំទ្រពីក្រុមអ្នកធ្វើនយោបាយ (រដ្ឋាភិបាល) របស់ប្រទេសនេះ។ រដ្ឋាភិបាលបានដាក់ចេញនូវមូលនិធិ "សហគ្រិនភាពផ្ដោតលើបច្ចេកវិទ្យា (Technopreneurship) នៅឆ្នាំ១៩៩៩ ដែលមានទំហំទឹកប្រាក់ ១ពាន់លានដុល្លារ ដែលទឹកប្រាក់ប្រហែល ២លានដុល្លារបានធ្លាក់ដល់ដៃក្រុមហ៊ុននីមួយៗ។ មកដល់ឆ្នាំ២០១៣ អនុនាយករដ្ឋមន្ត្រីសិង្ហបុរីបានប្រកាសបន្ថែមទឹកប្រាក់ ៥០លានដុល្លារដើម្បីគាំទ្រដល់ក្រុមហ៊ុនថ្មីក្នុងស្រុក។ និយាយដោយខ្លី រដ្ឋាភិបាលសិង្ហបុរីបាននិងកំពុងគាំទ្រដល់ក្រុមហ៊ុនបង្កើតថ្មីទាំងបែបបទគតិយុត្តិ និងថវិកា។
២) ឱកាសដ៏សម្បូរបែប ការវិនិយោគដល់ការដោះស្រាយបញ្ហាសហគមន៍ គឺទទួលបានការគាំទ្រខ្លាំងក្លាមែនទែន ហើយក៏ទទួលបានជោគជ័យផងដែរ។ ការវិនិយោគទៅលើវិស័យអប់រំ គ្រប់គ្រងសន្និធិ សុខភាព គឺស្ថិតនៅក្នុងវិស័យដែលមានសក្ដានុពល។នេះបើតាមការអះអាងរបស់អ្នកជំនាញផ្នែកសហគ្រិនភាព និងហិរញ្ញវត្ថុ លោក Kuo-Yi Lim។
៣) អត្រាអ្នកប្រើទូរស័ព្ទ និងអ៊ីនធឺណិតច្រើនលើសលប់ ៩០%នៃប្រជាជនសិង្ហបុរីគឺប្រើប្រាស់ទូរស័ព្ទ ដែលជាចំនួនច្រើនជាងគេបំផុតនៅទ្វីបអាស៊ី។ ទីផ្សារពាណិជ្ជកម្មតាមប្រព័ន្ធអ៊ីនធឺណិត (e-commerce) បើបូកបញ្ចូលគ្នារវាងម៉ាឡេស៊ី និងសិង្ហបុរី គឺស្មើនឹងពាក់កណ្ដាលនៃចំនួនសរុបនៅក្នុងតំបន់អាស៊ីអាគ្នេយ៍ បើទោះបីជាចំនួនជាក់ស្ដែងគឺស្មើប្រមាណតែ ៨%ក៏ដោយ។
៤) ក្រុមហ៊ុនមូលធនចាប់អារម្មណ៍ច្រើន ក្រុមហ៊ុនមូលធនធំៗដែលជំរុញឱ្យមានការរកស៊ីកាន់តែសម្បូរបែប គឺមានច្រើននៅប្រទេសសិង្ហបុរី។ ក្រុមហ៊ុនទាំងនេះជាប្រភពទុននៃបណ្ដាក្រុមហ៊ុនផ្សេងទៀត ហើយជាផ្នែកមួយដែលទាក់ទាញការវិនិយោគច្រើនផងដែរ៕
ដោយ៖ រតនៈវិភូ
