ជីវិតគ្មានភាពយុត្តិធម៌ទេ ប៉ុន្តែភាពអយុត្តិធម៌នេះមិនអាចយកឈ្នះចិត្តអំណត់តស៊ូរបស់មនុស្សរឹងមាំឡើយ
អ្នកត្រូវដឹងថា ឆាកជីវិតគ្មានភាពយុត្តិធម៌ចាប់តាំងពីចំណុចចាប់ផ្ដើមដំបូងមកម្ល៉េះ។ ប៉ុន្តែអ្វីដែលអ្នកត្រូវដឹងនិងចងចាំផងដែរនោះគឺ ភាពអយុត្តិធម៌គ្មានថ្ងៃអាចយកឈ្នះលើភាពអំណត់អត់ធ្មត់តស៊ូរបស់មនុស្សរឹងមាំបាននោះឡើយ។ ភាពខុសគ្នានៅក្នុងស្ថានភាពគ្រួសារនិងស្ថានភាពសង្គមមានឥទ្ធិពលទៅលើឆាកជីវិតរបស់មនុស្សម្នាក់ៗឲ្យខុសគ្នា មិនស្មើគ្នា ឬមិនមានភាពយុត្តិធម៌នេះឯង ក៏ព្រោះតែមនុស្សគ្រប់គ្នាមិនមែនចាប់ផ្ដើមចេញពីចំណុចដូចគ្នា ឬស្ថានភាពសុខភាពដូចគ្នានៅក្នុងទីប្រកួតរត់ប្រណាំងនោះឡើយ។
អ្នកខ្លះកើតមកនៅក្នុងត្រកូលគ្រួសារស្ដុកស្ដម្ភ ស្របពេលដែលអ្នកខ្លះទៀតក៏កើតមកជាមួយនឹងភាពអត់ឃ្លានក្រខ្សត់មករួចទៅហើយ។ នៅក្នុងសង្គមខ្លះ ស្ត្រីត្រូវតែនៅក្រោមអំណាចបុរសនិងសង្គម។ ពួកគេត្រូវបានគេមាក់ងាយមិនឲ្យតម្លៃ និងមិនឲ្យរៀនសូត្របានខ្ពង់ខ្ពស់ដូចបុរសនោះឡើយ។ ត្រង់ចំណុចនេះហើយ គឺជាភាពអយុត្តិធម៌របស់ជីវិតមនុស្សម្នាក់ៗ។ ប៉ុន្តែអ្វីដែលគេគាំទ្រច្រើន មិនប្រាកដថាសុទ្ធតែជាការគិតត្រឹមត្រូវនោះឡើយ។ យ៉ាងណាមិញ ចំណេះដឹងគឺជាអំណាច។ ខ្វះខាតការយល់ដឹងគឺជាការខ្វះខាតនូវអំណាច។ តើជាការយល់ដឹងអ្វី ដែលជាអំណាច ? នោះគឺជាការយល់ដឹងថាអំណាចរបស់អ្នកស្ថិតនៅពីលើអំណាចជោគវាសនា ឬកត្តាខាងក្រៅទាំងឡាយមិនថាសង្គមឬគ្រួសារដែលមានឥទ្ធិពលទៅលើជីវិតអ្នក។
អំណាចក្នុងការធ្វើជាម្ចាស់កំណត់ជោគវាសនាជីវិតរបស់ខ្លួនឯង គឺស្ថិតនៅខាងក្នុងខ្លួនរបស់អ្នក ពុំមែនជាអំណាចដែលអ្វីៗនៅខាងក្រៅប្រគល់សិទ្ធិមកឲ្យអ្នកនោះឡើយ។ អំណាចគឺនៅជិតអ្នកបំផុត វាកំពុងតែបញ្ចេញពន្លឺមកពីខាងក្នុងខ្លួនអ្នក តែមកពីអ្នកចេះតែស្វែងរកសិទ្ធិអំណាចរបស់ខ្លួនពីខាងក្រៅនេះឯង ទើបអ្នកមិនអាចមានសេរីភាពធ្វើនូវអ្វីដែលអ្នកចង់ធ្វើ មិនមានទំនុកចិត្តលើខ្លួនឯង ហើយមិនអាចក្លាយជាមនុស្សអស្ចារ្យដូចនៅក្នុងក្ដីសុបិនរបស់ខ្លួននេះឯង។ ការដែលអ្នកស្វែងរកសិទ្ធិអំណាចពីខាងក្រៅ ដើម្បីសម្រេចគោលដៅដែលខ្លួនចង់បាន វាមានន័យថាអ្នកអង្គុយរំពឹងចង់ឲ្យស្ថានការណ៍ខាងក្រៅផ្លាស់ប្ដូរ ដូច្នេះហើយអ្នកក៏ចាប់ផ្ដើមគ្មានទំនួលខុសត្រូវទៅលើជីវិតខ្លួនឯង ហើយបន្ទោសស្ថានការណ៍ខាងក្រៅ បន្ទោសគ្រួសារ មិត្តភ័ក្ដិ និងសង្គមដែលធ្វើឲ្យអ្នកត្រូវធ្លាក់នៅក្នុងស្ថានការណ៍បែបនេះ។
អ្នកចង់ឲ្យខាងក្រៅផ្លាស់ប្ដូរ នោះស្ថានការណ៍បច្ចុប្បន្នរបស់អ្នកនឹងផ្លាស់ប្ដូរតាមការប៉ងប្រាថ្នារបស់អ្នក។ វាក៏មិនខុសពីការដែលអ្នកប្រគល់សិទ្ធិអំណាចជាម្ចាស់ជីវិតរបស់ខ្លួនទៅឲ្យរបស់ខាងក្រៅជាអ្នកកំណត់នោះដែរ។ នៅពេលអ្នករស់នៅបែបនេះ គឺអ្នករស់នៅក្រោមព្រហ្មលិខិតដែលបានមកកំណត់ជីវិតអ្នកមែនហើយ។ អ្វីៗនឹងផ្លាស់ប្ដូរ នៅពេលអ្នកចាប់ផ្ដើមផ្ដោតទៅលើអំណាចពីខាងក្នុងខ្លួនរបស់អ្នកវិញ ដើម្បីផ្លាស់ប្ដូរជោគវាសនាជីវិតអ្នក។ ភាពអំណត់អត់ធ្មត់តស៊ូរបស់មនុស្សរឹងមាំនឹងអាចយកឈ្នះទៅលើភាពអយុត្តិធម៌ទាំងឡាយដែលបានមកកំណត់ជោគវាសនាជីវិតពួកគេ។
អ្វីដែលអ្នកត្រូវផ្លាស់ប្ដូរចេញ នោះគឺត្រូវដកឫសគល់នៃជំនឿអន់ថយ ជំនឿបរាជ័យ ឬជំនឿដែលកើតចេញពីកង្វះការយល់ដឹងនេះឲ្យអស់ រួចបណ្ដុះនូវជំនឿវិជ្ជមានទាំងឡាយណាដែលដឹកនាំអ្នកទៅរកភាពជោគជ័យ។ ឥទ្ធិពលនៃជំនឿឬការគិតដែលអ្នកតែងមានជារឿយៗ ប្រៀបដូចជាដែកឆក់ដូច្នោះ បើអ្នកគិតបែបណា អ្នកនឹងឆក់ទាញរបស់បែបនោះមកចូលក្នុងជីវិតរបស់អ្នកដូចគ្នាដែរ។ ឃ្លាមួយរបស់ Marie Curie បានពោលថា៖ "បើអ្នកមានឆន្ទៈពិតប្រាកដ នោះអ្នកនឹងរកឃើញផ្លូវដើម្បីទៅរកអ្វីដែលអ្នកចង់បាន"។
អ្វីដែលសំខាន់ស្ថិតនៅត្រង់ថា តើអ្នកចង់បានវាខ្លាំងប៉ុណ្ណា ? បើអ្នកចង់បានវាខ្លាំងដូចនឹងដង្ហើមដែលអ្នកខ្វះមិនបាន នោះអ្នកនឹងរំកិលភ្នំនិងពុះពាររំលងឧបសគ្គទាំងប៉ុន្មាន ដើម្បីទទួលបាននូវអ្វីដែលអ្នកចង់បាន។ បើអ្នកបន្ទោសថាមកពីនេះឬមកពីនោះ ទើបអ្នកបោះបង់មិនទៅដល់គោលដៅរបស់ខ្លួន អ្នកគួរតែបន្ទោសខ្លួនឯងវិញទៅ គឺមកពីអ្នកខ្វះឆន្ទៈប៉ុណ្ណោះ។ មនុស្សដែលមានឆន្ទៈពិតប្រាកដ ពួកគេគ្មានលេសមកការពារខ្លួនឯងនោះឡើយ។
កង្វះការយល់ដឹងដែលដឹងថាសិទ្ធិអំណាចក្នុងការធ្វើជាម្ចាស់ជោគវាសនាជីវិតរបស់ខ្លួន គឺស្ថិតនៅខាងក្នុងខ្លួនពួកគេ នឹងធ្វើឲ្យមនុស្សក្លាយជាទាសករនៃអ្វីៗដែលនៅជុំវិញខ្លួនពួកគេ។ ដែនកំណត់នៃសមត្ថភាពរបស់អ្នក គឺកើតចេញពីការទទួលយកជឿពីអ្នកដទៃរួចការគិតរបស់អ្នកជាអ្នកកំណត់ឲ្យខ្លួនឯងប៉ុណ្ណោះ។ មនុស្សគ្រប់គ្នាសុទ្ធតែអាចឈានហួសរំលងពីដែនកំណត់របស់ខ្លួន ដរាបណាអណ្ដាតភ្លើងនៃភាពជឿជាក់លើខ្លួនឯងមិនចេះរលត់សាបសូន្យ៕
ដោយ៖ ស្រីពៅ
