មុននឹងចង់ដកជើងរាថយចេញពីផ្លូវទៅរកគោលដៅ សួរខ្លួនឯងជាមុនសិនថាតើខ្លួនឯងកំពុងខ្លាចអ្វី ?
មានឃ្លាមួយរបស់ Ellen Johnson Sirleaf បានពោលឡើងថា៖ "បើក្ដីសុបិនរបស់អ្នកមិនបានធ្វើឲ្យអ្នកភ័យខ្លាចនោះទេ នោះវាមិនទាន់អស្ចារ្យនោះឡើយ"។ នៅពេលគ្មានគោលដៅក្នុងជីវិត មនុស្សម្នាក់នោះប្រៀបដូចជារស់នៅត្រឹមតែសម្បកខ្លួន ឬមានអារម្មណ៍ថារស់មិនចំជារស់ស្លាប់មិនចំជាស្លាប់។ បើកភ្នែកពីគេងមកពីមួយថ្ងៃទៅមួយថ្ងៃ មិនដឹងថាត្រូវធ្វើអ្វី រស់នៅដើម្បីអ្វី ហើយអ្វីទៅជាអត្ថន័យជីវិតរបស់ខ្លួនឯង ?
ម្នាក់នេះគ្មានថាមពលអ្វីដែលជាកម្លាំងចិត្តពីខាងក្នុងមកជំរុញពួកគេឲ្យពុះកញ្ជ្រោលនឹងការរស់នៅជីវិតពីមួយវិនាទីទៅមួយវិនាទីឲ្យមានតម្លៃនោះឡើយ។ ដោយឡែក នៅពេលមានគោលដៅជាក់ច្បាស់ថាពួកគេត្រូវដើរតាមផ្លូវណា គោលដៅនេះហើយដែលបានបំពេញឲ្យជីវិតពួកគេនូវអត្ថន័យ និងតម្លៃនៃជីវិត ដែលដុតភ្លើងដ៏ពុះកញ្ជ្រោលពីខាងក្នុងដើម្បីរំកិលភ្នំដែលមករារាំងដំណើរពួកគេក្នុងការសម្រេចគោលដៅមួយនេះ។ ប៉ុន្តែនេះមិនមែនមកពីពួកគេគ្មានភាពភ័យខ្លាចនោះទេ។ ពួកគេក៏សុទ្ធតែចាប់ផ្ដើមចេញពីភាពភ័យខ្លាច ភាពច្របូកច្របល់ និងស្មុគស្មាញអស់ទាំងនោះដែរ។
ប៉ុន្តែអ្វីដែលធ្វើឲ្យពួកគេនៅតែអាចបន្តដំណើរទៅមុខបាន នោះគឺពួកគេរកមុខសញ្ញាឲ្យច្បាស់ថា តើអ្វីទៅដែលពួកគេកំពុងតែភ័យខ្លាច ? ដូចឃ្លាខាងលើ បើគោលដៅមួយនោះមិនធ្វើឲ្យអ្នកភ័យខ្លាចទេ នោះវាមិនទាន់ជាគោលដៅអស្ចារ្យនោះឡើយ។ ប៉ុន្តែអ្វីដែលសំខាន់និងជាសំណួរដែលអ្នកត្រូវស្វែងរកឫសគល់ដំបូងគេនោះគឺ ជាអ្វីទៅដែលអ្នកភ័យខ្លាចក្នុងការសម្រេចគោលដៅមួយនោះ។ ទាល់តែអ្នកដឹងថាខ្លួនឯងកំពុងឈឺអ្វី មានជំងឺអ្វី ទើបអ្នកដឹងថាថ្នាំប្រភេទណាអាចជួយព្យាបាលអ្នកឲ្យជាសះស្បើយបាន។
ដើម្បីយកឈ្នះអ្វីៗទាំងឡាយនៅក្នុងជីវិត ការស្គាល់ខ្លួនឯងគឺជារឿងសំខាន់បំផុត។ ស្គាល់ថាអ្វីជាចំណុចខ្លាំងនិងខ្សោយរបស់ខ្លួនឯង អ្វីទៅដែលមកបន្លាចចិត្តអ្នកឲ្យរារែកដកថយចេញពីទីរត់ប្រណាំងទៅរកគោលដៅមួយនេះ។ មិនថាភាពភ័យខ្លាចនោះគឺជាកត្តាគ្រួសារ ខ្វះខាតសមត្ថភាព ឬខ្វះការលើកទឹកចិត្តពីអ្នកជុំវិញខ្លួននោះឡើយ ដឹងថាជំងឺជាអ្វីហើយ អ្នកត្រូវព្យាបាលវា មិនមែនទុកវាចោលហើយរំពឹងទុកថាវានឹងជាដោយខ្លួនឯងនោះឡើយ។ ដូចគ្នាដែរ អ្នកត្រូវរត់បុកទម្លុះភាពភ័យខ្លាចនោះ ពុំមែនរត់គេចចេញពីវាឡើយ។ សំខាន់ស្ថិតនៅលើថាតើអ្នកចង់បានវាខ្លាំងប៉ុណ្ណាតែប៉ុណ្ណោះឯង។ ពិតណាស់អ្នកណាក៏ចង់ផ្លាស់ប្ដូរពិភពលោកឬស្ថានការណ៍ខាងក្រៅរបស់ពួកគេដែរ ប៉ុន្តែចំណុចចាប់ផ្ដើមនោះគឺត្រូវចេញពីខ្លួនឯងមកមុន មានន័យថាផ្ដើមពីក្នុងចេញទៅក្រៅ ពុំមែនផ្ដើមពីក្រៅចូលទៅក្នុងនោះឡើយ។
មិនមែនបន្ទោសថាមកពីសង្គមបែបនេះ ឬមកពីស្ថានភាពបែបនេះ ឬមកពីអ្នកនេះអ្នកនោះឡើយ ខាងក្រៅវានឹងផ្លាស់ប្ដូរដោយឯកឯង នៅពេលអ្នកផ្លាស់ប្ដូរខ្លួនឯងជាមុន។ បញ្ហាមិនអាចដោះស្រាយបានឡើយ បើអ្នករំពឹងចង់ឲ្យខាងក្រៅផ្លាស់ប្ដូរមុន ដោយមិនគិតផ្ដោតទៅលើការផ្លាស់ប្ដូរខ្លួនឯងមុនសោះ។ ចង់ផ្លាស់ប្ដូរសង្គមឲ្យចាប់ផ្ដើមឲ្យតម្លៃទៅលើការអានសៀវភៅ វាទាល់តែអ្នកចាប់ផ្ដើមកាន់សៀវភៅអានទៅមុន។
ចង់ឲ្យគ្រួសារនិងសង្គមគេទទួលស្គាល់អ្នក វាទាល់តែអ្នកចេះទទួលស្គាល់ខ្លួនអ្នកជាមុនសិន ហើយប្រឹងប្រែងពង្រីកចំណេះដឹងនិងសមត្ថភាពរបស់អ្នក ដែលចាំបាច់សម្រាប់សម្រេចគោលដៅ។ ខាងក្នុងផ្លាស់ប្ដូរបានហើយ នោះខាងក្រៅគឺជារឿងមកតាមក្រោយនោះទេ គ្រាន់តែអ្វីៗត្រូវការពេលវេលា ឲ្យតែអ្នកអត់ធ្មត់និងមិនបោះបង់ ហើយជឿជាក់ជានិច្ចចំពោះខ្លួនឯង បើទោះគ្មានការលើកទឹកចិត្តនិងការឲ្យតម្លៃពីអ្នកជុំវិញក៏ដោយ សំខាន់ត្រូវចេះថ្លឹងថ្លែងខ្លួនឯងថាវាជារឿងត្រឹមត្រូវឬអត់ ហើយប៉ះពាល់ដល់អ្នកដទៃឬអត់៕
ដោយ៖ ស្រីពៅ
