ទ្រព្យសកម្មចំនួន៣ដែលអ្នកត្រូវវិនិយោគមុនការវិនិយោគទៅលើរបស់ខាងក្រៅណាទាំងអស់
មនុស្សគ្រប់គ្នាសុទ្ធតែមានគោលដៅដូចគ្នារួមមួយនៅក្នុងជីវិត នោះគឺជាការក្លាយជាអ្នកមាន។ ដើម្បីឆ្ពោះទៅសម្រេចឲ្យបាននូវគោលដៅដ៏មានមហិច្ឆតាមួយនេះ មានផ្លូវដើរជាច្រើនដែលអាចដឹកនាំមនុស្សឲ្យក្លាយជាអ្នកមានបាន។ មនុស្សខ្លះដើរផ្លូវត្រូវក៏ទទួលបានលទ្ធផលនូវអ្វីដែលជាការប៉ងប្រាថ្នារបស់ខ្លួន ឯអ្នកខ្លះទៀតដើរផ្លូវខុសក៏ជួបនូវភាពបរាជ័យ។ ប៉ុន្តែ ហេតុអ្វីក៏បរាជ័យ ? ហេតុអ្វីគេធ្វើបាន ហើយយើងធ្វើមិនបាន ?
មនុស្សភាគច្រើន នៅពេលចាប់ផ្ដើមប្រមូលយកចំណេះដឹងអំពីលុយមកបញ្ចូលក្នុងខ្លួន ទាំងមិនទាន់បានប៉ុន្មានផងក៏ស្ទុះស្ទាចាប់ផ្ដើមចាយលុយវិនិយោគទៅលើផ្សារភាគហ៊ុន និងអចលនទ្រព្យជាដើម។ ដោយឡែក មាគ៌ាឆ្ពោះទៅរកភាពជោគជ័យក្នុងការមានសេរីភាពហិរញ្ញវត្ថុជាមូលដ្ឋានដំបូងបង្អស់នោះគឺត្រូវសួរខ្លួនឯងនូវសំណួរថា តើអ្វីគឺជាភាពខុសគ្នារវាង "ទ្រព្យសកម្ម" និង "ទ្រព្យអកម្ម" ?
ការយល់ច្រឡំទៅលើគំនិតពីរដែលដាច់ដោយឡែកពីគ្នានេះ នឹងរុញអ្នកឲ្យធ្លាក់ទឹកនៅពេលមួយដែលអ្វីៗបានហួសពេលអស់ទៅហើយមិនខាន។ លំនៅឋានដែលអ្នកកំពុងរស់នៅប្រកបដោយភាពសុខដុមរមនានេះ ពុំមែនជាទ្រព្យសកម្មនោះឡើយ។ ដូច្នេះតើអ្វីជា "ទ្រព្យសកម្ម" ? រាល់កម្មសិទ្ធិវត្ថុទាំងឡាយណា ដែលនាំមកនូវប្រយោជន៍ផ្នែកសេដ្ឋកិច្ចក្នុងពេលអនាគតមកឲ្យអ្នកវិញ នោះរបស់ទាំងនោះហើយគឺជាទ្រព្យសកម្ម។
វាជាទ្រព្យដែលនឹងបង្កើនតម្លៃរបស់វាក្នុងរយៈពេលវែងមួយ និងប្រមូលយកលុយបន្ថែមមកដាក់ក្នុងហោប៉ៅអ្នក។ ការវិនិយោគទៅលើផ្សារភាគហ៊ុន និងអចលនទ្រព្យគឺជាឧទាហរណ៍អំពីទ្រព្យសកម្ម។ ដោយឡែក តើអ្វីជា "ទ្រព្យអកម្ម" ? ផ្ទះសម្បែងរបស់អ្នក រថយន្តនិងឧបករណ៍អេឡិចត្រូនិកទំនើបៗទាំងនោះ រួមទាំងទូរស័ព្ទដែលអ្នកតែងអួតសំញែងគេនេះហើយសុទ្ធតែជាទ្រព្យអកម្ម ដែលមិនត្រឹមតែមិនបាននាំលុយមកចូលហោប៉ៅអ្នកវិញទេ តែក្នុងរយៈពេលយូរតម្លៃរបស់វានឹងកាន់តែចុះថយបន្តិចម្ដងៗ និងដកលុយចេញពីហោប៉ៅអ្នកវិញ។ បើអ្នកមានទ្រព្យអកម្មច្រើនជាងទ្រព្យសកម្ម នៅពេលអ្នកជួបនឹងវិបត្តិហិរញ្ញវត្ថុ ចង់មិនចង់ទ្រព្យអកម្មទាំងអស់នោះនឹងក្លាយជាបំណុលវន្តករដល់អ្នក។ បន្ទាប់ពីអាចបែងចែកគំនិតទាំងពីរនេះដាច់ពីគ្នាបានហើយ តើអ្វីទៅដែលអ្នកគួរវិនិយោគមុនគេបង្អស់ ? មានទ្រព្យសកម្ម៣យ៉ាង ដែលមិនថាអ្នកក្រក៏ដោយមានក៏ដោយ សុទ្ធតែមានដូចគ្នាទាំងអស់ ហើយការវិនិយោគទៅលើទ្រព្យសកម្មទាំង៣នោះគឺជាមាគ៌ានៃសេរីភាពហិរញ្ញវត្ថុដែលមនុស្សគ្រប់គ្នាប្រាថ្នាចង់បានផងដែរ។
១) អត្តសញ្ញាណរបស់អ្នក
ហេតុអ្វីជាអត្តសញ្ញាណ ? ជាទ្រព្យដ៏សំខាន់មួយដែលមនុស្សប្រាថ្នាក្លាយជាអ្នកមានភាគច្រើនតែងមិនសូវយកចិត្តទុកដាក់ ដែលទាល់តែបាត់បង់ទើបដឹងពីសារៈសំខាន់របស់វា។ នៅពេលអ្នកដកប្រាក់ឬដាក់ប្រាក់នៅក្នុងធនាគារ ស្នើសុំការងារធ្វើពីស្ថាប័នការងារណាមួយ ធ្វើដំណើរទៅក្រៅប្រទេស ទិញឬលក់ផ្ទះ បើសិនជាអ្នកមិនមានភាពប្រាកដជាក់លាក់ដែលអាចផ្ដល់នូវជំនឿទុកចិត្តដល់អ្នកដទៃបាន ដែលជាអត្តសញ្ញាណសម្គាល់ថាតើអ្នកជានរណាទេ តើមាននរណាផ្ដល់សិទ្ធិអនុញ្ញាតដល់អ្នកឲ្យធ្វើរឿងខាងលើទាំងនោះបាន ? អ្នកនឹងប្រឈមនឹងហានិភ័យធ្ងន់ធ្ងរ ប្រសិនជាមានអ្នកលួចបានការសម្ងាត់ពីអត្តសញ្ញាណរបស់អ្នក រួចយកទៅប្រើប្រាស់ក្នុងគោលបំណងជាប្រយោជន៍របស់ពួកគេ។ ដោយប្រើប្រាស់គណនីរបស់អ្នក អ្នកនឹងត្រូវបង់ប្រាក់ក្នុងចំនួនដ៏ច្រើនទៅលើអ្វីដែលខ្លួនឯងមិនបានចំណាយទាល់តែសោះ។ បើបែបនេះអាចកើតឡើងបានហើយ បំណុលក៏មិនមែនមិនអាចទៅរួចដែរ ដែលថាមិនអាចកើតឡើងនោះ។
២) សម្ព័ន្ធភាពរបស់អ្នក
ត្រង់នេះមិនមែនចង់បង្ហាញថា ទាល់តែនរណាមួយមានប្រយោជន៍ដល់អ្នកចាំអ្នករាប់អានគេនោះទេ។ ប៉ុន្តែសម្ពន្ធភាពនៅទីនេះគឺជាសម្ពន្ធភាពទាំងឡាយណា ដែលគេអាចជួយអ្នកបង្កើនចំណេះដឹងអំពីលុយ។ គឺជាអ្នកដែលអាចជាដៃគូសហការគ្នាដ៏ល្អក្នុងការវិនិយោគកិច្ចការរកស៊ីផ្សេងៗនៅផ្លូវដំណើរខាងមុខបាន។
៣) វិនិយោគទៅលើខ្លួនឯង
មហាសេដ្ឋីគ្រប់រូបមិនមែនចាប់ផ្ដើមភ្លាមដោយការវិនិយោគទៅលើរបស់ខាងក្រៅ ក្រៅតែអំពីចិត្តគំនិតរបស់ខ្លួនឯងជាមុននោះទេ។ ត្រង់នេះគឺចង់សង្កត់ធ្ងន់សំខាន់ទៅលើចំណេះដឹងដែលក្នុងសាលាមិនបានផ្ដល់ឲ្យ នោះគឺជាចំណេះដឹងអំពីលុយ។ អ្នកពុំចាំបាច់ព្រួយបារម្ភជាមុនថាអ្នកនឹងត្រូវខាតពេលអស់ច្រើនទៅលើការវិនិយោគទៅលើខ្លួនឯងនេះទេ។ ជារៀងរាល់ថ្ងៃ អ្នកអាចដុសខាត់ការចេះដឹងរបស់អ្នកដោយគ្រាន់តែអានសារព័ត៌មានពាក់ព័ន្ធជាមួយបញ្ហាលុយ និងរៀនតាមបណ្ដាញសង្គមដោយឥតគិតថ្លៃមួយថ្ងៃបន្តិចៗជាការប្រសើរទៅហើយ៕
ប្រែសម្រួល៖ ស្រីពៅ
ប្រភព៖ richdad & accountingtools
