បិតាស្ថាបនិកដ៏សំខាន់៣រូបក្នុងប្រវត្តិសាស្ត្ររបស់សហរដ្ឋអាមេរិក
ប្រវត្តិសាស្ត្រសហរដ្ឋអាមេរិក ដែលឥឡូវនេះត្រូវបានពិភពលោកទទួលស្គាល់នូវភាពជាមហាអំណាចសេដ្ឋកិច្ចពិភពលោក ក៏ធ្លាប់មានអតីតកាលជាទឹកដីមួយក្នុងចំណោមទឹកដីដ៏ច្រើនលើសលប់ទៀតក្នុងសកលលោក ដែលស្ថិតនៅក្រោមនឹមអាណានិគមរបស់ប្រវត្តិសាស្ត្រនៃចក្រភពដ៏ធំជាងគេបំផុតរបស់អង់គ្លេស នៅអំឡុងរយៈកាលពីចុងសតវត្សទី១៦ ដល់ដើមសតវត្សទី១៨។
របៀបរបបនៃការគ្រប់គ្រងរបស់ពួកអង់គ្លេសមិនតិចនោះទេដែលបានបង្កជាការមិនពេញចិត្តចំពោះម្ចាស់ស្រុក ដែលជាប្រជាជនអាមេរិក ប៉ុន្តែក្នុងនោះគោលនយោបាយពីររបស់អង់គ្លេសពាក់ព័ន្ធនឹងពន្ធ និងមួយទៀតគឺព្រំដែន ដែលបានដុតរោលភ្លើងសកម្មភាពប្រឆាំងជាបន្តបន្ទាប់ រហូតនាំឲ្យមានការមូលមតិគ្នាទាមទារឯករាជ្យពីពួកអង់គ្លេសបានសម្រេចនៅថ្ងៃទី៤ ខែកក្កដា ឆ្នាំ១៧៧៦។ នៅពីក្រោយភាពចម្រើនរុងរឿងរបស់សង្គមជាតិមួយ តែងតែឆ្លុះបញ្ចាំងពីអ្នកដឹកនាំដ៏មានគតិបណ្ឌិតជាគំរូជានិច្ច។ ក្នុងនោះផងដែរ មានបុគ្គលសំខាន់ៗ៣រូបដែលបានបន្សល់ទុកនូវកេរ្តិ៍ឈ្មោះជាបិតាស្ថាបនិករបស់អាមេរិក។
១) George Washington៖ ប្រធានាធិបតីអាមេរិកដំបូងគេរូបនេះចាប់កំណើតក្នុងឆ្នាំ១៧៣២ នៅក្នុងស្រុក Westmoreland នៃរដ្ឋ Virginia។ លោកគឺជាកូនច្បងនៅក្នុងអាពាហ៍ពិពាហ៍ទី២របស់ឪពុកលោក ដែលស្លាប់បាត់បង់ជីវិតនៅពេលលោកមានអាយុ១១ឆ្នាំ។ បើទោះជាការអប់រំក្នុងសាលាមិនសូវជាបានជ្រៅជ្រះ យ៉ាងណាមិញការបង្ហាត់បង្រៀនពីបងប្រុសម្នាក់របស់គាត់ដែលមានតំណែងខ្ពស់មួយក្នុងទាហានយោធាជើងទឹក និងមានឪពុកតែមួយនិងម្ដាយផ្សេងគ្នានេះ មានឥទ្ធិពលយ៉ាងខ្លាំងក្នុងដំណាក់កាលជីវិតបន្ទាប់របស់លោកដែលបានចូលបម្រើការក្នុងផ្នែកទាហានយោធាប្រចាំរដ្ឋ Virgina។
អាយុត្រឹមតែ២១ឆ្នាំប៉ុណ្ណោះ ប៉ុន្តែលោកទទួលបានការទុកចិត្តពីអភិបាលរបស់រដ្ឋ Virgina បញ្ជូនទៅធ្វើបេសកកម្មនាំសារដល់ទាហានបារាំង។ ក្នុងឆ្នាំ១៧៧៤ លោកបានស្ថិតក្នុងចំណោមអ្នកតំណាងរដ្ឋ Virginaក្នុង The Continental Congress។ ជាប្រធានាធិបតីជាប់ឆ្នោតដំបូងគេបង្អស់របស់អាមេរិក បិតាស្ថាបនិកម្នាក់នេះបានចូលកាន់តំណែងនៅថ្ងៃទី៣០ ខែមេសា ឆ្នាំ១៧៨៩ និងអាចបន្តតំណែងទៅមួយអាណត្តិទៀត។ នៅឆ្នាំ១៧៩៩ជាឆ្នាំដែលលោកបានរលត់ជីវិតពីពិភពលោកនេះទៅ។
២) Benjamin Franklin៖ ជាអ្នកវិទ្យាសាស្ត្រដ៏អស្ចារ្យបំផុត អ្នកបង្កើតវត្ថុច្នៃប្រឌិត អ្នកការទូត អ្នកយុទ្ធសាស្ត្រជំនួញ ព្រមទាំងជាអ្នករិះគិតផ្នែកនយោបាយដ៏សំខាន់មួយរូបរបស់អាមេរិករូបនេះ ថ្វីត្បិតតែគាត់មិនមានប្រវត្តិសាស្ត្រជាប្រធានាធិបតីសហរដ្ឋអាមេរិក ប៉ុន្តែបើពុំមានចំណែកពីស្នាដៃរបស់លោកទេ អាមេរិកក៏មិនអាចក្លាយមកជាអស្ចារ្យបានដូច្នេះដែរ។
បុរសដែលចាប់កំណើតនៅឆ្នាំ១៧០៦ នៅរដ្ឋ Bostonមួយនេះ គឺជាកូនទី១៥ក្នុងចំណោមកូនទាំង១៧របស់គ្រួសារវណ្ណៈកណ្ដាលមួយ។ ក្រៅពីមានជីវិតជាសហគ្រិនដ៏ជោគជ័យហើយ រួមនឹងធ្វើការពិសោធន៍លើអគ្គិសនី បិតាស្ថាបនិកនេះថែមទាំងមានស្នាដៃនិពន្ធសំខាន់ៗមួយចំនួនដែលមានឥទ្ធិពលអាចបង្រួបបង្រួមភាពចម្រុះខុសគ្នានៃគំនិត ជាតិសាសន៍របស់ប្រជាជនអាមេរិកឲ្យមករួមគ្នាជាធ្លុងមួយបាន។
៣) James Madison៖ ប្រធានាធិបតីទី៤របស់សហរដ្ឋអាមេរិក លោក James Madison បានកើតនៅរដ្ឋ Virgina ក្នុងឆ្នាំ១៧៥១។ ជាមួយនឹងដំណើរការណ៍សិក្សាអប់រំក្នុងសាលាបានយ៉ាងល្អប្រសើរ លោកបានបញ្ចប់ការសិក្សាពី The College of New Jersey នៅពេលទើបនឹងឈានដល់វ័យ២០ឆ្នាំប៉ុណ្ណោះ។ នៅឆ្នាំ១៧៧៦ តំណែងដ៏សំខាន់មួយនៅក្នុងសន្និបាតរដ្ឋធម្មនុញ្ញរបស់រដ្ឋ Virgina ដែលជំរុញឲ្យមានការទាមទារឯករាជ្យរបស់អាមេរិកពីនឹមអាណានិគមរបស់អង់គ្លេស បានធ្លាក់ទៅលើការទទួលខុសត្រូវរបស់លោក។
រីឯរវាងឆ្នាំ១៧៧៧ដល់ឆ្នាំ១៧៧៩ Madison ក៏បានក្លាយជាសមាជិកមួយក្នុងក្រុមប្រឹក្សាភិបាលរបស់រដ្ឋ Virginaផងដែរ។ ក្នុងឆ្នាំ១៧៨០ គណៈប្រតិភូក្មេងខ្ចីជាងគេក្នុងវ័យ២៩ឆ្នាំ ត្រូវបានគេតែងតាំងនៅ The Continental Congress។ លោកគឺជាបុគ្គលដ៏សំខាន់មួយ ដែលនាំមុខឲ្យមានការសរសេរព្រាងឡើងនូវគម្រោងការរបស់រដ្ឋ Virginia (Virginia Plan) ដែលបានក្លាយជាសសរគ្រឹះនៃរដ្ឋធម្មនុញ្ញរបស់អាមេរិក និងបានតាក់តែងរដ្ឋធម្មនុញ្ញមួយចំនួនទៀតផងដែរ និងក្នុងឆ្នាំ១៨០៨ ក៏ត្រូវបានបោះឆ្នោតតែងតាំងជាប្រធានាធិបតីទី៤របស់អាមេរិក៕
ដោយ៖ ស្រីពៅ
