អ្វីជាភាពខុសគ្នារវាងការចាប់អារម្មណ៍ និង ការផ្ចង់អារម្មណ៍?
នៅពេលមនុស្សមិនយល់ពីអ្វីមួយ ពួកគេនឹងមានសេចក្ដីទោមនស្សជាមួយនឹងអ្វីមួយនោះមិនខាន។ តួយ៉ាង ការពិតនេះបញ្ជាក់យ៉ាងច្បាស់នៅត្រង់ថា មនុស្សមិនយល់ពីដំណើរការណ៍ធម្មជាតិនៃការគិតរបស់ខ្លួនឯង ជាហេតុនាំឲ្យពួកគេវិលវល់តែលតោលវង្វេងវង្វាន់ មានសេចក្ដីទោមនស្សជាមួយជីវិតរបស់ខ្លួន ក៏ព្រោះតែមិនយល់ពីធម្មជាតិរបស់ខ្លួនឯងនេះហើយ។ អ្វីក៏ដោយកើតឡើងជាផលតែងមានហេតុរបស់វាមកជាមួយជានិច្ច។
ព្រះពុទ្ធទ្រង់បានត្រាស់សម្ដែងប្រាប់មនុស្សលោកថា៖ «អ្នកនឹងក្លាយជាអ្វីដែលអ្នកគិត អ្នកនឹងស្រូបទាញនូវអ្វីដែលអ្នកមានអារម្មណ៍ ហើយអ្នកនឹងបង្កើតនូវអ្វីដែលអ្នកស្រមៃ»។ នេះមានសេចក្ដីថា ការគិតរបស់អ្នកគឺជាប្រភពនៃការកកើតអ្វីៗទាំងឡាយ។ គំនិតនេះមិនមែនបកស្រាយដោយរវើរវាយតាមបែបសាសនានោះទេ ព្រោះថាសូម្បីតែវិទ្យាសាស្ត្រដែលសិក្សាពីចិត្តសាស្ត្រមនុស្សក៏បានគាំទ្រនឹងគោលការណ៍ធម្មជាតិរបស់សកលលោកនេះផងដែរ។
យ៉ាងណាមិញ ជាដំបូងអ្នកគួរប្រាកដជាមួយភាពខុសគ្នារវាងការចាប់អារម្មណ៍លើអ្វីមួយនិងការផ្ចង់អារម្មណ៍ជាមុនសិន។ វាហាក់ដូចជាគ្មានភាពខុសប្លែកគ្នាអ្វីនោះទេ និងតែងត្រូវបានគេប្រើឆ្លាស់គ្នាតម្រង់រកអត្ថន័យតែមួយ។ ប៉ុន្តែ នៅពេលអ្នកកាន់តែផ្ចង់អារម្មណ៍ខ្លាំងទៅលើអ្វីមួយ អ្នកនឹងកាន់តែមិនចាប់អារម្មណ៍យកចិត្តទុកដាក់លើអ្វីៗកើតឡើងនៅជុំវិញខ្លួនអ្នកខ្លាំងប៉ុននោះដែរ។ ខួរក្បាលរបស់អ្នកត្រូវការជំនួយពីញាណទាំង៥ ដើម្បីអាចឲ្យអ្នកចាប់អារម្មណ៍លើអ្វីមួយបាន។
ឧទាហរណ៍ថា អ្នកកំពុងចាប់អារម្មណ៍លើវត្ថុមួយនៅក្នុងទេសភាពដ៏ស្រស់ស្អាតមួយ បើទោះជាអ្នកកំពុងជក់ចិត្តនឹងវត្ថុនោះក៏ពិតមែន ប៉ុន្តែអ្នកនៅតែអាចចាប់អារម្មណ៍ពីអ្វីៗដែលកំពុងកើតឡើងនៅជុំវិញខ្លួនអ្នក ដោយមានការរួមចំណែកពីញាណដទៃៗទៀត។ ម្យ៉ាងទៀត ដំណើរការណ៍នៃការចាប់អារម្មណ៍លើអ្វីមួយក៏ងាយនឹងត្រូវបានរំខានដោយកត្តាផ្សេងៗដែរ។ ដោយឡែក នៅពេលអ្នកផ្ចង់អារម្មណ៍ចំពោះអ្វីមួយវិញ វាប្រៀបបានទៅនឹងអំពូលភ្លើងដ៏ភ្លឺចិញ្ចាចមួយបញ្ចាំងក្នុងបន្ទប់ងងឹតដូច្នោះ គឺអ្វីៗគ្រប់យ៉ាង មានញាណទាំង៥របស់អ្នក អារម្មណ៍ ការគិត ការស្រមៃបង្កើតរូបភាពក្នុងគំនិត ការនិយាយជាមួយខ្លួនឯង ភាពងឿងឆ្ងល់ក្នុងគំនិត ប្រមូលផ្ដុំគ្នាផ្ដោតទៅលើប្រធានបទអ្វីមួយតែម្យ៉ាងដែលអ្នកកំពុងផ្ចង់អារម្មណ៍នោះ និងមិនងាយត្រូវបានរំខានដោយកត្តាផ្សេងៗឡើយ។
អ្វីដែលសំខាន់ និងជាមូលដ្ឋានគ្រឹះសម្រាប់អ្នកក្នុងការផ្លាស់ប្ដូរជីវិតអ្នក នោះគឺជាការផ្ចង់អារម្មណ៍របស់អ្នកនេះឯង ព្រោះថានៅពេលសម្បជញ្ញៈរបស់អ្នកដាក់ចិត្តផ្ចង់អារម្មណ៍ចំពោះអ្វីមួយហើយ អនុសម្បជញ្ញៈដែលប្រៀបបាននឹងកូនចៅក្រោមបង្គាប់ស្ដាប់តាមសម្បជញ្ញៈនឹងឆ្លើយតបទៅកាន់សម្បជញ្ញៈវិញដោយព្យាយាមប្រមូលផ្ដុំការចងចាំ អារម្មណ៍ និងការគិតទាំងឡាយដែលមានទំនាក់ទំនងនឹងអ្វីដែលសម្បជញ្ញៈកំពុងផ្ចង់អារម្មណ៍នោះឯង។ នេះហើយដែលអត្ថន័យដែលថាអ្នកនឹងស្រូបទាញនូវអ្វីដែលអ្នកមានអារម្មណ៍ចង់បង្ហាញនោះ។ នោះមានន័យថានៅក្នុងរូបភាពធំមួយ នៅពេលអ្នកផ្ដោតទៅលើផ្នែកអវិជ្ជមានរបស់វា នោះអ្នកក៏នឹងមានអារម្មណ៍មិនល្អ ហើយការប្រព្រឹត្តរបស់អ្នកក៏ស្ដែងចេញដោយអវិជ្ជមានដែរ នោះអ្នកនឹងស្រូបទាញយកនូវអ្វីៗដែលអកុសលចូលមកក្នុងជីវិតអ្នកដូចគ្នាដែរ។ ដូច្នេះ ប្រសិនជាអ្នកចង់ផ្លាស់ប្ដូរផលក្នុងជីវិតអ្នក អ្នកត្រូវចាប់ផ្ដើមដោយផ្លាស់ប្ដូរហេតុរបស់អ្នក ដែលជាការគិត នោះគឺជាការផ្លាស់ប្ដូរការផ្ចង់អារម្មណ៍របស់អ្នកជាមុននេះឯង៕
អត្ថបទល្អៗផ្សេងទៀត៖ តើនៅក្រោមការគ្រប់គ្រងរបស់ស្ដេចក្រិកបុរាណរូបណា ដែលធ្វើឲ្យទឹកដីនេះបានស្គាល់ពីភាពរុងរឿង ? ហេតុអ្វីនាំឲ្យមានអាពាហ៍ពិពាហ៍បងប្អូនសែស្រឡាយគ្នា ហើយវាប៉ះពាល់អ្វីខ្លះ?
ប្រែសម្រួល៖ ស្រីពៅ ប្រភព៖ mindset-habits
