ស្ថានការណ៍៤យ៉ាងដែលអាចបញ្ជាក់ពីអត្តចរិតពិតរបស់អ្នកបាន
ការគិតរបស់មនុស្សគឺជាអ្នកឆ្លាក់ច្នៃនូវអត្តចរិតរបស់ពួកគេ។ ឬក៏ដូចព្រះពុទ្ធទ្រង់មានពុទ្ធដីកាថា៖ «ចិត្តគឺជាអ្វីគ្រប់យ៉ាង អ្នកនឹងក្លាយជាអ្វីដែលអ្នកគិត»។ វិធីដែលអ្នកជ្រើសរើសមើលទៅលើរាល់ស្ថានការណ៍ទាំងឡាយ និងវិធីដែលអ្នកជ្រើសរើសឆ្លើយតបទៅលើវាវិញ នឹងបញ្ជាក់បានថាតើអ្នកជាមនុស្សបែបណា។ ត្រង់នេះដូចបណ្ឌិត ស្ទីហ្វិន ខូវិយ៍បាននិយាយថា៖«ខ្ញុំមិនមែនជាផលិតផលកើតឡើងពីស្ថានការណ៍របស់ខ្ញុំនោះទេ។ ខ្ញុំគឺជាផលិតផលកើតឡើងពីការសម្រេចចិត្តរបស់ខ្ញុំ»។
រាល់អ្វីដែលកើតឡើងចំពោះយើងគឺជាអ្វីដែលយើងមិនអាចបដិសេធមិនឲ្យចូលមកក្នុងជីវិតយើងបានឡើយ យើងគ្មានសិទ្ធិអំណាចទៅគ្រប់គ្រងរឿងខាងក្រៅនោះឡើយ។ យ៉ាងណាមិញ អ្វីដែលស្ថិតនៅក្នុងព្រំដែនសិទ្ធិអំណាចក្រោមការក្ដោបក្ដាប់របស់យើង នោះគឺជាសិទ្ធិក្នុងការជ្រើសរើសឆ្លើយតបចំពោះរាល់ស្ថានការណ៍ទាំងអស់នោះឯង ហើយជម្រើសរបស់អ្នកនឹងឆ្លើយនឹងសំណួរថាតើអ្នកជាមនុស្សបែបណាយ៉ាងពិតប្រាកដ ជាពិសេសនៅក្នុងស្ថានការណ៍សំខាន់ៗដូចដែលមានបង្ហាញនៅខាងក្រោមនេះ។
១) ការលំបាកនិងឧបសគ្គនៅក្នុងជីវិត៖ មនុស្សម្នាក់ៗមិនខុសគ្នាត្រង់ណាឡើយ ខុសត្រង់ម្យ៉ាងគឺការគិតរបស់ពួកគេម្នាក់ៗប៉ុណ្ណោះ ដែលជាចម្លើយទៅកាន់សំណួរថាហេតុអ្វីមានមនុស្សបរាជ័យ ស្របពេលដែលមនុស្សឯទៀតសម្រេចជោគជ័យយ៉ាងត្រចះត្រចង់ក្នុងជីវិតរបស់ខ្លួន។ នៅពេលឧបសគ្គចូលមកកាត់ដំណើរជីវិតអ្នក តើអ្នកជ្រើសរើសមើលទៅលើវាជាគ្រោះអាក្រក់ហើយជ្រើសរើសអោនក្បាលទទួលយកវា ឬក៏មើលទៅលើវាជាការសាកល្បងប្រកួតប្រជែងយកឈ្នះលើវា។
២) ការឆ្លើយតបរបស់អ្នកនៅពេលកំហឹងលេចឡើងមក៖ នៅពេលអ្នកខឹង អ្នកដែលត្រូវរងគ្រោះមុនគេនោះគឺជាខ្លួនអ្នកនេះឯង។ នៅពេលមនុស្សត្រូវបានគ្រប់គ្រងដោយកំហឹងទាំងស្រុងហើយ ពួកគេប្រៀបបានទៅនឹងមនុស្សដែលបាត់បង់វិចារណញ្ញាណ មិនអាចបែងចែកខុសត្រូវដូច្នោះ។ ដូច្នេះតើអ្នកជ្រើសរើសបណ្ដោយឲ្យអារម្មណ៍ដឹកមុខអ្នកឲ្យជះកំហឹងដាក់អ្នកដទៃដោយខ្វះការពិចារណាឲ្យបានត្រឹមត្រូវជាមុន ឬក៏ទប់អារម្មណ៍ដែលកំពុងពុះកញ្ជ្រោលនោះឲ្យស្ងប់នៅក្រោមវិចារណញ្ញាណដែលមនុស្សមាន។
៣) ប្រភេទនៃទំនាក់ទំនងដែលទាក់ទាញចិត្តអ្នក៖ តាមរយៈរង្វង់មិត្តភ័ក្ដិបែបណាដែលអ្នកមាន វាក៏អាចបញ្ជាក់បានថាអ្នកជាមនុស្សបែបណាដែរ។ អត្តចរិតរបស់មនុស្សបែបណា វានឹងស្រូបទាញមនុស្សផ្សេងទៀតដែលមានអត្តចរិតប្រហាក់ប្រហែលនឹងគេមករួមដំណើរជាមិត្តជាមួយហើយ។ បើអ្នករួមដំណើរជិះទូកតែមួយ មិនមានគោលដៅចិត្តគំនិតរួមតែមួយនោះទេ ពួកគេពិបាកនឹងចុះសម្រុងគ្នាឆាប់សម្រេចទៅដល់គោលដៅណាស់។
៤) របៀបដែលអ្នកប្រើប្រាស់លុយ៖ តើអ្នកប្រើប្រាស់លុយដើម្បីវិនិយោគទៅលើអ្វីជាចម្បងបំផុត ? វិនិយោគទៅលើការបំពេញចំណង់តណ្ហាមួយចម្អែតកំពឹសរបស់អ្នក ឬវិនិយោគទៅលើផលប្រយោជន៍ក្នុងរយៈពេលវែងដូចជាការអប់រំជាដើម។ មកដល់ត្រង់នេះក៏នឹកឃើញសម្ដីមួយរបស់សូក្រាតថា ៖ «បើមនុស្សម្នាក់អួតអំពីទ្រព្យធនរបស់ខ្លួន មនុស្សនេះមិនគួរត្រូវបានគេលើកសរសើរទេ ដរាបណាគេមិនទាន់ដឹងថាមនុស្សនេះប្រើប្រាស់វាដោយរបៀបណានោះ»៕
ប្រែសម្រួល៖ ស្រីពៅ ប្រភព៖ lifehack
