ឆ្ងល់ទេថាតើមនុស្សពិការភ្នែកអាចសុបិនបានដែរឫអត់ ?
គ្រប់គ្នាដឹងស្រាប់មកហើយថា តាមធម្មជាតិមនុស្សពិការភ្នែកគឺមិនមានសមត្ថភាពប្រើប្រាស់ភ្នែករបស់ពួកគេ ដើម្បីទទួលយកព័ត៌មាននៅជុំវិញខ្លួននោះទេ។ ដូច្នេះ ការសុបិនរបស់មនុស្សពិការភ្នែក អាចចោទជាចម្ងល់សម្រាប់មនុស្សភាគច្រើន។ តើមនុស្សពិការភ្នែកអាចសុបិនដូចមនុស្សធម្មតាបានទេ ? ចុះបើពួកគេសុបិនបាន តើពួកគេសុបិនឃើញអ្វី ? តើសុបិននោះខុសពីសុបិនរបស់មនុស្សធម្មតាទេ ?
សុបិនកើតឡើងនៅក្នុងដំណាក់កាលមួយនៃដំណេកដែលគេហៅថា rapid eye movement (REM) ដែលប្រព្រឹត្តទៅនឹងក្នុងខួរក្បាល។ ដោយសារដំណើរការណ៍នៃសុបិនកើតឡើងនៅក្នុងខួរក្បាលបែបនេះ ដូច្នេះមនុស្សពិការភ្នែកប្រាកដណាស់ថាពួកគេក៏អាចសុបិនដូចមនុស្សទូទៅដែរ។ យ៉ាងណាមិញ ទម្រង់នៃសុបិនរបស់ពួកគេមានភាពខុសគ្នាពីមនុស្សធម្មតា ព្រោះថាពួកគេប្រើប្រាស់ញាណផ្សេងៗរបស់ខ្លួនដូចជា ត្រចៀក អណ្ដាត កាយ ច្រមុះ និងមិនមែនភ្នែកដើម្បីទទួលយកព័ត៌មាន ហេតុនេះនៅក្នុងសុបិនរបស់ពួកគេក៏មិនបង្ហាញជាទម្រង់នៃរូបភាពដែលប្រើប្រាស់ចក្ខុវិញ្ញាណដូចមនុស្សទូទៅនោះដែរ។
ដោយឡែក សុបិនរបស់មនុស្សពិការភ្នែក បង្ហាញនៅក្នុងទម្រង់ជាលក្ខណៈប្រើប្រាស់សោតវិញ្ញាណ (ត្រចៀក) ជីវ្ហាវិញ្ញាណ (អណ្ដាត ដើម្បីដឹងពីរសជាតិ) កាយវិញ្ញាណ (ក្នុងទម្រង់ជាសុបិនមានចលនា) និងឃានវិញ្ញាណ (ច្រមុះ ដើម្បីស្រូបក្លិន) ដែលមានបង្ហាញនៅក្នុងសុបិនរបស់ពួកគេច្រើនជាងមនុស្សធម្មតាទៅទៀត។ អសមត្ថភាពក្នុងការប្រើប្រាស់ភ្នែក មិនមែនមានន័យថាពួកគេមិនអាចសុបិនបានក្នុងទម្រង់ជាការប្រើប្រាស់ចក្ខុវិញ្ញាណនោះទេដោយវាអាស្រ័យទៅលើវ័យដែលចក្ខុរបស់ពួកគេចាប់ផ្ដើមអសមត្ថភាពប្រើការលែងបាន។
សម្រាប់អ្នកដែលពិការភ្នែកនៅអាយុចាប់ពី៤ឫ៥ឆ្នាំឡើងទៅពួកគេមិនអាចសុបិនក្នុងទម្រង់ជាការប្រើប្រាស់ចក្ខុវិញ្ញាណបាននោះទេ ខណៈពេលដែលអ្នកដែលពិការភ្នែកនៅអាយុចាប់ពី៥ឫ៦ឆ្នាំឡើងទៅ សុបិនក្នុងទម្រង់បែបនេះនឹងអាចកើតឡើងទៅលើពួកគេបាន។ មួយវិញទៀត ដោយហេតុថាពួកគេមិនអាចបញ្ជាភ្នែកខ្លួនឯងបាន ពន្លឺមិនអាចចូលមកភ្នែករបស់ពួកគេបាននោះទេ ធ្វើឲ្យពួកគេមានជំងឺដំណេកដ៏កម្រម្យ៉ាងដែលរំខានពួកគេឲ្យពិបាកគេងលក់នៅពេលយប់ តែបែរជាងងុយគេងនៅពេលថ្ងៃ។ ដំណើរការណ៍បែបនេះ កើតឡើងជាវដ្ដតជាប់គ្នាជាច្រើនសប្ដាហ៍ ប៉ុន្តែបញ្ហាធម្មជាតិនេះអាចដោះស្រាយបានក្រោមជំនួយពីឱសថ៕
ប្រែសម្រួល៖ ស្រីពៅ ប្រភព៖ www.verywell.com
