បើចង់ក្លាយជាសិស្សឆ្នើមផ្នែកគណិតវិទ្យា កុំភ្លេចចំណុចទាំងនេះឲ្យសោះ
គណិតវិទ្យាគឺជាមុខវិជ្ជាដ៏សំខាន់បំផុតមួយនៅក្នុងចំណោមមុខវិជ្ជាដទៃៗទៀត។ ទោះតិចក្ដីច្រើនក្ដី គ្រប់គ្នាពិតជាពិបាកនឹងចៀសពីការមិនប្រើប្រាស់ចំណេះដឹងទាក់ទងនឹងគណិតវិទ្យាក្នុងការអនុវត្តជាក់ស្ដែងជាប្រចាំថ្ងៃណាស់។ ដូច្នេះ ការសិក្សានៅក្នុងសាលាអំពីមុខវិជ្ជានេះ គឺជាមូលដ្ឋានគ្រឹះដ៏សំខាន់មួយដែលអ្នកសិក្សាគ្រប់គ្នាត្រូវយកចិត្តទុកដាក់ និងដុសខាត់ចំណេះដឹងនេះឲ្យល្អប្រសើរជាប់ជានិច្ច។
បញ្ហាជាឧបសគ្គក្នុងដំណើរការណ៍ទទួលយកចំណេះដឹងនេះ ក៏តែងតែកើតឡើងមិនអាចចៀសបានដូចមុខវិជ្ជាផ្សេងៗដែរ ហើយខាងក្រោមនេះគឺជាគន្លឹះមួយចំនួនដែលនឹងមានប្រយោជន៍សម្រាប់ដោះស្រាយបញ្ហាទាំងនោះ។
១) បណ្ដុះទម្លាប់ហ្វឹកហាត់ដោះស្រាយលំហាត់ជាប្រចាំ៖ ការអង្គុយស្ដាប់គ្រូពន្យល់ពីទ្រឹស្ដីនីមួយៗ វាមិនគ្រប់គ្រាន់សម្រាប់ធានាបានពីភាពរីកចម្រើននៃចំណេះដឹងរបស់អ្នកក្នុងមុខវិជ្ជាគណនាដែលទាមទារការអនុវត្តដោយចាំបាច់មួយនេះទេ។ ចូរសម្ដែងការស្មោះត្រង់ចំពោះខ្លួនឯង នរណាក៏ធ្លាប់យកលេសមកការពារខ្លួនឯងពេលមិនចង់ធ្វើអ្វីមួយដែរ។ ប៉ុន្តែ តើអ្នកអាចដឹកនាំខ្លួនឯងជាមួយវិន័យតឹងរ៉ឹងដោយការរៀនហ្វឹកហាត់ដោះស្រាយលំហាត់គណិតជាប្រចាំ ដើម្បីជំរុញសមត្ថភាពឲ្យដល់កម្រិតខ្ពស់បានទេ ? បើអ្នកអាចធ្វើបាន នោះលទ្ធផលវិជ្ជមាននឹងធានាសម្រាប់អ្នក។
២) មើលឃើញពីសារសំខាន់នៃការសួរនាំ៖ សុភាសិតបុរាណជប៉ុនមួយពោលថា "បើអ្នកសួរគេ អ្នកនឹងក្លាយជាមនុស្សល្ងង់មួយថ្ងៃ ប៉ុន្តែបើអ្នកមិនសួរគេវិញ អ្នកនឹងក្លាយជាមនុស្សល្ងង់អស់មួយជីវិត"។ នៅពេលអ្នកស្រពិចស្រពិល មិនទាន់យល់ច្បាស់ក្នុងការដោះស្រាយលំហាត់គណិតនានា ឬទ្រឹស្ដីណាមួយ ហើយបើអ្នកមិនស្វះស្វែងរកជំនួយពីអ្នកដែលចេះជាងអ្នក មិនថាជាគ្រូ ឬមិត្តភ័ក្ដិនោះទេ អ្នកនឹងនៅតែមានភាពមិនច្បាស់លាស់ ហើយវានឹងធ្វើឲ្យអ្នកបង្កើតកំហុសចំពោះការអនុវត្តជាក់ស្ដែងរបស់អ្នកមិនខាន។
៣) ត្រូវចាប់ផ្ដើមដោយភាពស្ទាត់ជំនាញទៅលើមូលដ្ឋានគ្រឹះនៃគណិតវិទ្យាសិន៖ មូលដ្ឋានគ្រឹះនៃគណិតវិទ្យា សំដៅទៅលើមេគុណ ឬការសូត្រមេលេខ បន្ទាប់មកចាំសាកល្បងជាមួយការដោះស្រាយលំហាត់ពីជគណិតដូចជា សមភាព ចំណោទ រ៉ាឌីកាល់ និងក្រាបជាដើម។ បើអ្នកធ្វេសប្រហែសទៅលើមេគុណ វាមិនចម្លែកនោះទេដែលអ្នកនឹងជួបបញ្ហានៅពេលដោះស្រាយលំហាត់ផ្សេងៗពេលក្រោយមកទៀតនោះ។
៤) សាងទំនាក់ទំនងល្អជាមួយគ្រូរបស់អ្នក៖ ទំនាក់ទំនងល្អ នឹងបង្កើតនូវអារម្មណ៍ស្និទ្ធស្នាលជាមួយគ្នាទៅវិញទៅមក ហើយអ្នកនឹងមានភាពបើកចំហក្នុងការសាកសួរនាំទៅគ្រូរបស់អ្នក ដើម្បីឲ្យពួកគាត់ស្រាយចម្ងល់និងជម្រះនូវភាពស្រពិចស្រពិលទាំងឡាយរបស់អ្នកបាន។ គ្រូសប្បាយចិត្តបំផុត នៅពេលពួកគាត់ដឹងថាសិស្សរបស់ខ្លួនចាប់អារម្មណ៍នឹងអ្វីដែលពួកគេកំពុងរៀន ហើយពួកគាត់នឹងពេញចិត្តខ្នះខ្នែងជួយអ្នកជានិច្ច៕
ប្រែសម្រួល៖ ស្រីពៅ ប្រភព៖ www.education.com
