បុគ្គលិកគួរមានសិល្បៈក្នុងការបញ្ចេញមតិយោបល់ដល់ថ្នាក់លើ (មិនខឹង ហើយអរគុណអ្នកវិញទៀត)
ទោះបីជាការផ្តល់មតិយោបល់ក្នុងន័យស្ថាបនាក៏ដោយ តែវាពិតជាមានសារៈសំខាន់ក្នុងការដឹងពីរបៀបបញ្ចេញមតិ។ ក្នុងនាមជាបុគ្គលិក មេរបស់យើងសុទ្ធតែធ្លាប់សួរពីលទ្ធផលនៃការងាររបស់ពួកគេ។ វាពិតជាពិបាកខ្លាំងណាស់ក្នុងការបញ្ចេញនូវមតិដែលមាននៅក្នុងខ្លួន។ ខាងក្រោមនេះជាគន្លឺះដែលជួយអ្នកក្នុងការផ្តល់យោបល់ទៅកាន់មេរបស់អ្នកពោលគឺ មិនខឹងហើយ អរគុណអ្នកវិញទៀត៖
១) សង្កេតពីបុគ្គលិកលក្ខណៈរបស់ថ្នាក់លើ៖ ប្រសិនជាអ្នកមិនច្បាស់ថាមេរបស់អ្នកជាមនុស្សដែលទទួលយកមតិដោយស្មោះត្រង់នោះ អ្នកគួរតែព្យាយាមសង្កេតពីបុគ្គលិកលក្ខណៈរបស់ពួកគាត់សិន ឬ ក៏អាចសួរជាមុន ដើម្បីដឹងតម្រុយខ្លះ។ នៅពេលអ្នកដឹងថា តើមេរបស់អ្នកជាមនុស្សប្រភេទណាហើយ នោះអ្នកអាចបញ្ចេញមតិបាន ជុំវិញបញ្ហាមួយចំនួនបាន។
២) ចាំពេលវេលាល្អ៖ អ្នកប្រហែលជាចង់ឲ្យមតិយោបល់ដល់មេរបស់អ្នកភ្លាមៗក្រោយពីមានអ្វីបានកើតឡើង។ ប៉ុន្តែ វាអាចមិនមែនជាឱកាសល្អឡើយ។ ប្រសិនជាអ្នកមិនអាចផ្តល់មតិយោបល់ភ្លាមៗទេ កត់ត្រាវាទុក ហើយរង់ចាំឱកាសល្អចាំនិយាយ ជៀសវាងភ្លើងកំពុងតែចេះ ហើយចាក់សាំងចូល អ៊ិចឹងហើយរឿងអីមិនឆេះខ្លាំង។
៣) របៀបនៃការនិយាយ៖ ទោះបីជាការផ្ញើសារមានភាពងាយស្រួល ប៉ុន្តែការនិយាយទល់មុខផ្ទាល់គឺវាប្រសើរជាង។ ម៉្យាងវិញទៀត ប្រសិនជាអ្នកមើលទៅស្ថានភាពមិនល្អ អ្នកអាចដកថយបានភ្លាមៗ តែប្រសិនជាអ្នកផ្ញើសារ អ្នកមិនដឹងពីស្ថានភាពរបស់មេរបស់អ្នកនោះទេ។
៤) សួរសំនួរ៖ ប្រសិនជាមេរបស់អ្នកមករកអ្នកសម្រាប់មតិយោបល់ អ្នកត្រូវប្រាកដថាមេរបស់អ្នកចង់បានអ្វី។ តើពួកគាត់ចង់ដឹងពីលទ្ធផលការងារទាំងមូលឬគ្រាន់តែគម្រោងការណាមួយ? ការសួរបញ្ជាក់នឹងជួយកាត់បន្ថយនូវភាពយល់ច្រឡំ៕
ប្រែសម្រួល៖ អុឹង មុយយូ ប្រភព៖ www.success.com
