តោះមកអានប្រវត្តិ!! បុគ្គលជោគជ័យដ៏អស្ចារ្យក្នុងលោក ៥រូប ដែលធ្លាប់ជាជនភៀសខ្លួន
នៅក្រោមការជួយសង្គ្រោះ និងទំនុកបម្រុងពីប្រទេសដទៃដែលបានផ្ដល់ឱកាសដល់ក្រុមជនភៀសខ្លួនទាំងឡាយ ដែលបានទទួលរងគ្រោះពីសោកនាដកម្ម និងអំពើសាហាវព្រៃផ្សៃកើតមានឡើងនៅក្នុងប្រទេសពួកគេ ក្នុងនោះជនដែលមានក្ដីសង្ឃឹមថ្មីចំនួន៥រូប បានធ្វើឲ្យពិភពលោកផ្លាស់ប្ដូរដោយសារសមិទ្ធផលស្នាដៃដ៏សំខាន់របស់ពួកគេ។ តើពួកគេទាំងនោះជានរណាខ្លះ និងថាតើសមិទ្ធផលស្នាដៃអ្វីដែលពួកគេបានធ្វើឲ្យមានការផ្លាស់ប្ដូរចំពោះពិភពលោក ?
១) Albert Einstein អ្នកវិទ្យាសាស្ត្រដ៏ល្បីល្បាញក្នុងប្រវត្តិសាស្ត្ររបស់ពិភពលោក Albert Einstein ជាជនភៀសខ្លួនមួយរូបរបស់ប្រទេសអាល្លឺម៉ង់ អំឡុងពេលនៃគោលនយោបាយរើសអើងពូជសាសន៍ពួកជ្វីសរបស់គណបក្សណាសីុហីុទ្លែ។ លក្ខខណ្ឌនេះបានក្លាយជាលទ្ធផលនៃការភៀសខ្លួនរបស់លោក និងប្រពន្ធរបស់លោក ទៅសហរដ្ឋអាមេរិក និងបន្តមកដោយជ័យជម្នះលើពានរង្វាន់ណូបែលផ្នែកវិទ្យាសាស្ត្ររបស់លោក។ ទោះជាការរស់នៅរបស់លោកលើទ្រនំថ្មីផ្ដល់នូវក្ដីសុខដល់លោកក៏ដោយ ក៏បុគ្គលដ៏អច្ឆរិយនេះ មិនដែលភ្លេចពីជនភៀសខ្លួនលំបាកវេទនាដទៃទៀតមកពីប្រទេសតែមួយនោះដែរ និងតែងតែខិតខំជាខ្លាំងក្នុងការជួយពួកគេឲ្យមានទីជម្រកស្នាក់អាស្រ័យដូចរូបលោកជានិច្ច។
២) Sergey Brin លោក Sergey Brin ជាសហគ្រិនដ៏ជោគជ័យមួយរូបរបស់អាមេរិក ប៉ុន្តែបុគ្គលបច្ចេកវិទ្យារបស់ពិភពលោករូបនេះ មិនមានដើមកំណើតជាជនជាតិអាមេរិកនោះឡើយ។ លោកក៏ជាជនភៀសខ្លួនម្នាក់ក្នុងចំណោមជនភៀសខ្លួនដទៃទៀតរបស់សហភាពសូវៀត និងនៅក្នុងឆ្នាំ១៩៧៩ដោយទទួលបានជំនួយពី Hebrew Immigrant Aid Society លោកនិងគ្រួសារ បានរៀបចំចាកចេញ ស្របពេលដែលមានការប្រឈមមុខនឹងកំណើននៃការរើសអើងពូជសាសន៍ពួកជ្វីសក្នុងប្រទេស។ រយៈកាលដំបូងនៃការផ្លាស់ប្ដូរ ការលំបាកបានបង្ហាញវត្តមានក្នុងជីវិតលោក តែយ៉ាងណាមិញ ក្នុងឆ្នាំ១៩៩៨ ក្រុមហ៊ុនGoogleត្រូវបានសហការបង្កើតដោយលោក Sergey Brinជាមួយនឹងលោក Larry Page។
៣) Madeleine Albright ជាមួយនឹងក្រុមគ្រួសារ លោកស្រីបានភៀសខ្លួនចាកចេញពីប្រទេសឆេកូស្លូវ៉ាគីក្នុងឆ្នាំ១៩៤៨ ដោយគ្មានអ្វីសោះនៅក្នុងខ្លួន។ បើទោះជាក្រោយពីការផ្លាស់ប្ដូរការតាំងលំនៅទៅសហរដ្ឋអាមេរិក ដែលលោកស្រីបានក្លាយជាលេខាធិការរដ្ឋស្រីដំបូងរបស់ប្រទេសមហាអំណាចនេះក្ដី ក៏មកទល់ពេលនេះ លោកស្រីមិនអាចបំភ្លេចនូវគុណបំណាច់ និងការស្វាគមន៍យ៉ាងកក់ក្ដៅពីមនុស្សរស់នៅក្នុងទីក្រុងDenverរបស់សហរដ្ឋអាមេរិកមកលើក្រុមគ្រួសារលោកស្រីនោះឡើយ។
៤) Henry Kissinger ទន្ទឹមនឹងការចូលមកតាំងលំនៅរបស់លោកHenry Kissingerជាមួយឪពុកម្ដាយ និងបងប្រុសក្នុងឆ្នាំ១៩៣៨នៅទីក្រុងញូវយ៉ក មតិសាធារណៈរបស់សហរដ្ឋអាមេរិក មានការប្រឆាំងជំទាស់នឹងការផ្ដល់ជម្រកសម្រាប់ជនភៀសខ្លួនរបស់ជនជាតិជ្វីសពីអំពើសហាវយង់ឃ្នងរបស់គណបក្សណាសីុ រហូតដល់ជាង៦៧%នៃពលរដ្ឋអាមេរិកទាំងអស់។ ជាហេតុនាំឲ្យ ការអនុញ្ញាតសម្រាប់ជនភៀសខ្លួនចូលមករស់នៅមានចំនួនតិចតួចប៉ុណ្ណោះ ឯម្ចាស់ពានរង្វាន់ណូបែលសន្តិភាពក្នុងឆ្នាំ១៩៧៣រូបនេះ ក៏មានសំណាងឋិតនៅក្នុងចំណោមអ្នកទាំងនោះដែរ។ ក្រោយពីបញ្ចប់ការសិក្សាពីសាកលវិទ្យាល័យហាវើដ លោកបានចូលបម្រើជាអ្នកប្រឹក្សាយោបល់សន្តិសុខជាតិរបស់សហរដ្ឋអាមេរិក និងជាលេខាធិការរដ្ឋផងដែរ។
៥) Sigmund Freud ជាមួយនឹងការបដិសេធជំទាស់ក្នុងការចាកចេញ បុគ្គលដ៏អស្ចារ្យមួយទៀតរបស់ពិភពលោក ដែលទទួលបានពានរង្វាន់Goethe Prize សម្រាប់ការទទួលស្គាល់លើការរួមចំណែកក្នុងផ្នែកចិត្តសាស្ត្រ និងវប្បធម៌អាល្លឺម៉ង់ លោក Sigmund Freud ត្រូវបានអ្នកព្យាបាលជំងឺផ្លូវចិត្តតាមបែបចិត្តសាស្ត្ររបស់អង់គ្លេសមួយរូប គឺលោក Ernest Jones ជំរុញឲ្យលោកធ្វើការចាកចេញ ព្រមទាំងបានរៀបចំការចាកចេញឲ្យលោកទៀតផង ស្របពេលនៃស្ថានការណ៍គ្រោះថ្នាក់នៃការចូលលុកលុយដោយពួកណាសីុទៅលើប្រទេសអូទ្រីសក្នុងឆ្នាំ១៩៣៨។ លោកបានទទួលអនិច្ចកម្មក្រោយពីបានចូលមកដល់ទឹកដីប្រទេសអង់គ្លេសបាន១ឆ្នាំ។ បើទោះជាបែបនេះក្ដី ក៏លោកត្រូវបានជ្រើសរើសជាជនភៀសខ្លួនមួយរូប ដែលបានរួមចំណែកយ៉ាងសំខាន់ទៅលើជីវិតពួកអង់គ្លេសដែរ៕
ប្រភព៖ Famous Psychologists
ប្រែសម្រួល៖ ស្រីពៅ ប្រភព៖ weforum
