គិតមកត្រឹមថ្ងៃទី ២១ ខែមេសា ឆ្នាំ ២០២០ សិង្ហបុរីបានក្លាយជាប្រទេសដែលមានចំនួនអ្នកឆ្លងកូវីដ ១៩ ច្រើនជាងគេនៅក្នុងតំបន់អាស៊ីអាគ្នេយ៍យើងនេះ នេះ បើយោងតាមរបាយការណ៍ពីគេហទំព័រ World O Meter។

បើគិតត្រឹមថ្ងៃទី ២០ខែមេសាឆ្នាំ ២០២០ ម្សិលមិញនេះ សិង្ហបុរីបានរកឃើញករណីឆ្លងថ្មីរហូតដល់ទៅ ១ ៤២៦ (មួយពាន់បួនរយម្ភៃប្រាំមួយ) ករណី ត្រូវបានគេចាត់ទុកថាជាតួលេខខ្ពស់បំផុត ដែលនាំឲ្យចំនួនឆ្លងសរុបនៅទូទាំងប្រទេសកើតឡើងដល់ ៨ ០១៤ (ប្រាំបីពាន់ដប់បួន) ករណី នេះបើយោងតាមការលើកឡើងពីគេហទំព័រព័ត៌មាន Channel News Asia ចេញផ្សាយនៅថ្ងៃទី ២០ ខែមេសាឆ្នាំ ២០២០។ ករណីឆ្លងថ្មីដែលបានរកឃើញថាជាតួលេខខ្ពស់បំផុតប្រចាំថ្ងៃ ក្រសួងសុខាភិបាលរបស់សិង្ហបុរីបានធ្វើការបញ្ជាក់ថា មាន ១ ៣៦៩ករណី គឺជាកម្មករបរទេសដែលបម្រើការងារនៅក្នុងប្រទេសស្នាក់នៅអន្តេវាសិកដ្ឋាន តែពួកគេសុទ្ធតែជាកម្មករដែលមានលិខិតអនុញ្ញាតឲ្យធ្វើការងារត្រឹមត្រូវស្របច្បាប់។ 

អត្ថ​បទទាក់​ទង៖ តំណាង​WHOបក​ស្រាយ​​ពីហេតុផល​ដែលស្ថានភាព​កូវីដ​១៩​នៅ​​ប្រទេស​អ្នក​​​មាន​ធ្ងន់ធ្ងរ​ខ្លាំង​យើងមានតិច​

មន្ត្រីអ្នកនាំពាក្យរបស់ក្រសួងសុខាភិបាលសិង្ហបុរី បានប្រាប់ទៅភ្នាក់ងារសារព័ត៌មានក្នុងស្រុកមួយថា៖ «តួលេខដែលរកឃើញខ្ពស់បំផុត គឺយើងបានរកឃើញនៅក្នុងកន្លែងអន្តេវាសិដ្ឋានស្នាក់នៅរបស់កម្មករបរទេស។ ពុំមានរោគសញ្ញាក៏ដូចការរាយការណ៍ណាមួយថាពួកគេឈឺនោះទេ ប៉ុន្តែបន្ទាប់ពីមានការចុះទៅធ្វើតេស្តលើពួកគេភាគច្រើនគឺមានផលវិជ្ជមាន ប៉ុន្តែក្នុងចំណោមពួកគេភាគច្រើនគឺមានអាការៈស្រាល និងទទួលការឃ្លាំមើលយ៉ាងដិតដល់ក៏ដូចជាការដាក់នៅដាច់ដោយឡែក។

អត្ថ​បទទាក់​ទង៖ មេដឹកនាំស្ត្រី ៥​​ប្រទេសនេះ​ ​ទប់ស្កាត់កូវីដ​១៩​ បាន​ល្អ «មានលក្ខណៈរួមធំៗ»៣ចំណុច​

ចំពោះករណីឆ្លងថ្មីនៅក្នុងប្រទេសសិង្ហបុរីនេះ ៦៣% ត្រូវបានគេផ្សារភ្ជាប់ទៅនឹងការរស់នៅជាចង្កោមឬការប៉ះពាល់ដោយផ្ទាល់ក្នុងចង្កោមអ្នកដែលមានឆ្លងហើយបញ្ចេញរោគសញ្ញា។ គិតមកត្រឹមថ្ងៃទី ២១ នេះ អ្នកជាសះស្បើយក្នុងប្រទេសសិង្ហបុរីបានកើនឡើងប្រមាណជា ១០% ហើយ (៨០១នាក់) ហើយអ្នកដែលកំពុងសម្រាកព្យាបាលនៅក្នុងមន្ទីរពេទ្យចំនួន ២៣នាក់ ត្រូវបានគេរាយការណ៍ថាមានសភាពជំងឺធ្ងន់ធ្ងរនិងកំពុងទទួលបានការយកចិត្តទុកដាក់យ៉ាងខ្លាំងទៅលើការព្យាបាលពីគ្រូពេទ្យ។ អ្នកដែលបានចេញពីមន្ទីរពេទ្យក៏កំពុងដាក់ឲ្យនៅដាច់ដោយឡែកបន្តទៀតដើម្បីធានាបាននូវការមិនចំលងទៅក្នុងសហគមន៍ ឬការឆ្លងថ្មីឡើងវិញម្តងទៀត៕

អត្ថ​បទទាក់​ទង៖ ចិនរឹតត្បឹតការសិក្សាស្រាវជ្រាវទាំងឡាយណាទាក់ទងនឹងប្រភពវីរុសកូរ៉ូណា​

ដោយ៖ យ៉ាយ៉ា