តើប្រមុខរាជរដ្ឋាភិបាលជួបសន្ទនាអ្វីខ្លះតាមទូរស័ព្ទជាមួយរដ្ឋមន្ត្រីការបរទេសអាមេរិកព្រឹកនេះ?
នៅព្រឹកថ្ងៃទី ០៨ ខែមេសាឆ្នាំ ២០២០ នេះ ប្រមុខរាជរដ្ឋាភិបាលកម្ពុជា សម្តេចតេជោនាយករដ្ឋមន្ត្រីបានទទួលជួបសន្ទនាតាមទូរស័ព្ទជាមួយឯកឧត្ដម Mike Pompeo រដ្ឋមន្ត្រីការបរទេសអាមេរិកដើម្បីលើកឡើងពីគោលជំហររបស់ប្រទេសទាំងពីរជុំវិញការវិវត្តចុងក្រោយនៃស្ថានភាពជំងឺកូវីដ ១៩ និងការទំនាក់ទំនងរបស់ប្រទេសទាំងពីរនៅក្នុងក្របខ័ណ្ឌក្នុងតំបន់។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជានាថ្ងៃទី៨ ខែមេសានេះ។
នៅក្នុងជំនួបនេះ សម្តេចតេជោ និង ឯកឧត្ដម Mike Pompeo បានសម្ដែងនូវការពេញចិត្តចំពោះការជួយគ្នាទៅវិញ ទៅមកនៅក្នុងស្ថានការណ៍ដ៏លំបាកនេះដើម្បីប្រយុទ្ធប្រឆាំងទៅនឹងជំងឺកូវីដ ១៩នេះ។ ទន្ទឹមនឹងនេះសម្តេចតេជោ និងឯកឧត្ដម Mike Pompeo ក៏បានសម្តែងនូវសមានចិត្តក្រៀមក្រំចូលរួមរំលែកទុក្ខផងដែរចំពោះគ្រួសាររងគ្រោះទាំងឡាយនៅអាមេរិក និងតំបន់អាស៊ីដោយសារតែជំងឺកូវីដ ១៩នេះ ហើយសម្តេចក៏សូមផ្ដាំផ្ញើគាំទ្រយ៉ាងខ្លាំងចំពោះលោក Donald Trump ដើម្បីប្រយុទ្ធប្រឆាំងនឹងជំងឺនេះ។
ក្នុងក្របខ័ណ្ឌអាស៊ានវិញ តាមរយៈឯកឧត្ដម Mike Pompeo អាមេរិកនឹងបន្តជួយគាំទ្រដល់កិច្ចប្រឹងប្រែងដើម្បីសុខភាព សុវត្ថិភាព របស់ប្រជាជនកម្ពុជា និងគាំទ្រកម្ពុជាចំពោះកិច្ចសហប្រតិបត្តិការផ្នែកសន្តិសុខរបស់ ASEAN ។ ជាមួយគ្នានេះ ប្រមុខរដ្ឋាភិបាលក៏បានលើកឡើងផងដែរអំពីតួនាទីដ៏សំខាន់របស់អាមេរិកក្នុងតំបន់ដើម្បីចូលរួមកាត់បន្ថយគម្លាតរវាងប្រទេសនានានៅក្នុងតំបន់ទន្លេមេគង្គក្រោម និងសមាជិកអាស៊ានផ្សេងទៀត។
