បុរសវៀតណាមបីនាក់ចេញពីកម្ពុជា រត់គេចពីមណ្ឌលចត្តាឡឺស័កត្រូវអាជ្ញាធរវៀតណាមតាមចាប់
ថ្មីៗនេះ មានករណីរត់គេចចេញពីមណ្ឌល ឬកន្លែងធ្វើចត្តាឡីស័ក ច្រើនករណី នៅប្រទេសវៀតណាម ក្នុងនោះក៏មានករណីពាក់ព័ន្ធជាមួយនឹងបុរសវៀតណាម បីនាក់ ដែលត្រូវបានសារព័ត៌មានវៀតណាមចុះផ្សាយថា ម្នាក់មកធ្វើការនៅកម្ពុជា និងពីរនាក់ទៀតធ្វើដំណើរចេញពីកម្ពុជាចូលទៅវៀតណាម (មិនបញ្ជាក់ថាមកធ្វើការឬយ៉ាងណា) ក្នុងនោះក៏មានបុរសម្នាក់កំពុងរត់គេច ខណៈពីរនាក់ត្រូវបានចាប់ខ្លួនបានមកវិញ។
យោងតាមការចុះផ្សាយរបស់សារព័ត៌មាន VN Express ដែលបានរាយការណ៍កាលពីថ្ងៃទី៣០ ខែមីនា បានឱ្យដឹងថា ប៉ូលិសនៅភាគខាងត្បូងប្រទេសវៀតណាមបានចាប់ខ្លួនបុរសពីរនាក់បានមកវិញបន្ទាប់ពីបានរត់គេចពីមណ្ឌលធ្វើចត្តាឡីស័កនៅខេត្ត Kien Giang និងខេត្ត តៃនិញកាលពីចុងសប្ដាហ៍កន្លងទៅ។
បុរសឈ្មោះ Bui Ngoc Thuan អាយុ ២៧ឆ្នាំមកពីខេត្ត Kien Giang ក្រុង Ha Tien ជាបុគ្គលិកបម្រើការងារនៅកម្ពុជា (ប្រភពមិនបានបញ្ជាក់ឈ្មោះក្រុមហ៊ុន ឬអង្គភាព និងប្រភេទការងារនោះឡើយ) ដែលត្រូវបានបញ្ជូនទៅកាន់មណ្ឌលធ្វើចត្តាឡីស័ក បន្ទាប់ពីបុរសរូបនេះចេញពីកម្ពុជាចូលទៅវៀតណាមតាមច្រកអន្តរជាតិ Ha Tien កាលពីសុក្រ សប្ដាហ៍មុន។
នៅយប់ថ្ងៃសុក្រដដែលនោះ រូបគេបានលួចរត់ពីមណ្ឌលដើម្បីទៅជួបគ្រួសារ និងប្រពន្ធរបស់ខ្លួន ដោយជិះតាក់ស៊ី និងម៉ូតូឌុប។ ព្រឹកឡើង អាជ្ញាធរក៏បានចុះទៅស្រាវជ្រាវដល់ផ្ទះ និងស្នើសុំឱ្យមានកិច្ចសហការតែបុរសរូបនោះបានគុបសមត្ថកិច្ច ហើយក្រោយមកក៏ត្រូវបានសមត្ថកិច្ចចាប់ខ្លួនតែម្ដង។
បច្ចុប្បន្ន ទាំងភរិយា និងម្ដាយរបស់បុរសរូបនេះ ត្រូវបានបញ្ជូនទៅមណ្ឌលចត្តាឡីស័ក។ Thuan បានទទួលស្គាល់នូវកំហុសខ្លួនពីដំបូងប៉ុន្តែនៅតែតវ៉ាទៀតកាលពីរសៀលថ្ងៃអាទិត្យ ចុងសប្ដាហ៍កន្លងទៅ។ ទោះជាយ៉ាងនេះក្ដី រូបគេត្រូវបានសមត្ថកិច្ច និងមន្ត្រីសុខាភិបាលតាមដានយ៉ាងយកចិត្តទុកដាក់ ខណៈសុខភាពរបស់គេ និងសាច់ញាតិ មានសភាពល្អធម្មតា។ សមត្ថកិច្ចបាន និងកំពុងស្វែងរកអ្នករត់តាក់ស៊ី អ្នកបើកម៉ូតូឌុប និងអ្នកដែលពាក់ព័ន្ធដោយផ្ទាល់មកធ្វើចត្តាឡីស័កដោយឯកឯងនៅមណ្ឌល។
សូមអាន៖ សារព័ត៌មានវៀតណាម VN Express៖ ជនជាតិវៀតណាម ២រូបធ្វើតេស្តវិជ្ជមានកូវីដ១៩ បន្ទាប់ពីចាកចេញពីកម្ពុជា
មួយករណីផ្សេងទៀត គឺនៅខេត្តតៃនិញ។ លោក Nguyen Van Cuong នាយករក នាយកដ្ឋានសុខាភិបាលខេត្តតៃនិញ បានថ្លែងថា មន្ត្រីសុខាភិបាលបានជូនដំណឹងដល់អាជ្ញាធរមូលដ្ឋានដើម្បីស្វែងរកបុរសម្នាក់អាយុ ២៩ឆ្នាំឈ្មោះ Le Van Vu មកពីខេត្ត Trang។ បុរសម្នាក់នេះបានរត់គេចពីកន្លែងចត្តាឡីស័កនៅស្រុក Ben Cau កាលពីព្រឹកថ្ងៃអាទិត្យ សប្ដាហ៍មុន។ តាមសារព័ត៌មានវៀណាម ដដែលបានអះអាងថា រូបគេបានចាកចេញពីកម្ពុជាធ្វើដំណើរចូលទៅវៀតណាមតាមច្រកទ្វារអន្តរជាតិបាវិតកាលពីថ្ងៃទី១៩ ខែមីនា។ បុរសរូបនេះត្រូវបានមន្ត្រីសុខាភិបាលធ្វើការពិនិត្យ និងបានបញ្ជូលទៅកាន់មណ្ឌលចត្តាឡីស័កនៅស្រុក Ben Cau ដើម្បីយកសំណាកធ្វើតេស្តបន្ត។ មិនទាន់ទាំងបានធ្វើតេស្តសំណាកផង រូបគេក៏រត់គេចខ្លួនបាត់។ រហូតមកដល់រសៀលថ្ងៃទីអាទិត្យ ទើបសមត្ថកិច្ចរកឃើញ នៅស្រុក Tan Phu ក្រុង ព្រៃនគរ ហើយក៏បានបញ្ជូនរូបគេមកមណ្ឌលចត្តាឡីស័កវិញ។ មិនទាន់មានការបញ្ជាក់យ៉ាងណា អំពីលទ្ធផលនៃការធ្វើសំណាកបុរសរូបនេះនោះទេ។
ដោយឡែកករណីមួយទៀតដែរ គឺនៅខេត្តតៃនិញ ដូចគ្នា បុរសម្នាក់ទៀតអាយុ ២៨ឆ្នាំឈ្មោះ Nguyen Thanh Nam មកពីក្រុងហាណូយក៏បានរត់គេចពីការធ្វើតេស្តនៅមណ្ឌលចត្តាឡីស័កដែរកាលពីរសៀលថ្ងៃអាទិត្យ សប្ដាហ៍មុន។ បើតាមសារព័ត៌មានវៀតណាម Vietnam News និង VN Express អះអាងថា បុរសម្នាក់នេះ ក៏ធ្វើដំណើរចេញពីកម្ពុជាចូលទៅវៀតណាមតាមច្រកអន្តរជាតិបាវិតដែរ កាលពីថ្ងៃទី២០ ខែមីនា។ មិនទាន់មានការបញ្ជាក់លម្អិតយ៉ាងណាជុំវិញករណីចុងក្រោយនេះ ប៉ុន្តែបើតាមសេចក្ដីរាយការណ៍របស់សារព័ត៌មាន KhmerTimes នាថ្ងៃទី២ ខែមេសា នេះបានឱ្យដឹងថា សមត្ថកិច្ននៅមិនទាន់រកឃើញបុរសរូបនេះនៅឡើយទេ៕
ដោយ៖ រតនៈវិភូ
ប្រភព៖ VN Express, Vietnamnews.vn
